ديوان الشاعر/ سعد المحمدي

يابو عمر قطفت كل اثمرتها
قدام يخبط غصنها كل خباط

واليوم عايف غصنها وورقتها
عياف ياباين حياوي ومحتاط

من حشمة التسعه لويت ارقبتها
اللي اليا فسمتها مالها انقاط

قفيت وسمع بالشعيب ادبكتها
وجهي شمال وبيسري وادي ابواط

وسمعت بندق بالخبا ثورتها
جماعة الاخوان من بعد الاشواط

واصلت سيري والسحابه قفتها
سحابةٍ من ليف يابس وشخاط

اخيلها وسمع دوي ارعدتها
يمكن يسيل وبلها وادي الغاط

سعد المحمدي
،،،،،،،،،،،،،،،،،،،،،،،،،،،،،،،،،،
سعد رسم جزل البيوت ونحتها
على صفا صوح وعلى صدره انواط

قامت هواجيسه تزود حركتها
وانتم تعرفون ابو تركي اليا شاط

تقذف بحوره باليباس ازبدتها
وعلى مدار الشوف موجه ليا خاط

وقصيدته جتني وعارف نعتها
فكري مبرمجها على كل الانماط

التسع يوم ام الثلاث انجبتها
مجموعهن واحد يصحح للاغلاط

مهما المناطق والدير فرقتها
تاخذ على جمع الحفيفين مقلاط

وبعض الطرايد مالتفت في جهتها
وامجود البلجيك بمهاد وقشاط

باين العوفي