ديوان الشاعر علي الشيخ

النظر مثل السلام يفك باب
ياسلام الله سلام لكل جيل
من نبي الله سليمان الحساب
لا زمنا اليوم والمسرى طويل
شاهدي دعوة نبي مستجاب
انعطى ملك لغيره يستحيل
كان ودي لو يوم بشهر آب
امتلك عشره من الوزن الثقيل
لو بعدها ألقى مشاريه وعتاب
المهم تنفذ امري يا عقيل

انحتوا مبروك في كبد السحاب
كل حرف بطول ميل وعرض ميل
ونزلوا من كل حرف للتراب
اعمده من نور في حفلة دخيل
برمجوها لا وقف والقى خطاب
تنسكب سمن وعسل صافي يسيل
لا تقولون أسرف الشاعر وغاب
في خيالاته وجاب المستحيل
اعلموا تراي ما دقيت باب
اطلب العالم كثير ولا قليل
اقدح من الموهبه عود الثقاب
ويشتعل من قدحته راس الفتيل

لا مدحت امدح عزيزين الجناب
لا ضعيف ولا ذليل ولا كليل
اكرم من الشمس قدام الغياب
وأبخل من الليل عن مدح البخيل
وانت يا نواف ذيب من الذياب
مثل ابوك اتعب مدورة الجميل
طوق بمعروفة رقاب ورقاب
شفت شوف العين ما احتاج لدليل
وربعك تدوس المخاطر ما تهاب
حولهم ما للردى والله مقيل
اعتقد ما قلت شي إلا الصواب
المزايا سيل ضاق ابها المسيل
ويومني ما أسهبت ماهو بانسحاب
الشعر في طاعتي مرغم ذليل