ديوان الشاعر عجاب صالح الحنتمي المزيني

ياليتني ماجيت من عند الاسياح
وماهلت عيوني على الدار ماها

من قبل ماجيها مع الوقت مرتاح
من البطا نسيت حتى حصاها

واليوم لابله مثل علط الارماح
بقصى سويدا القلب دوا صداها

حاولت اعدي لي على راس لولاح
وشوف ماقدامها ماوراها

مير المرض والشوف والكبر ذباح
وقفيت نفسي ماتحقق مناها

وقمت اتذكر ماضي ٍ مثل الاشباح
وعدة الشريط وهم حالي براها

وجدي وجود اللي بعد ماعتزى طاح
قعدله اللي مايضيع قداها

من بعد ماهو للمجاويخ نطاح
ينزف صويب بدار يوحش خلاها

على الزمان اللي به البال مرتاح
خلف الضعون اللي تبعنا هواها

يشوقني برق الحيا كل مالاح
فوق الديار اللي ضعنا رعاها
عجاب صالح الحنتمي

دعوني الشافي مواريث الاخيار
هيف السمين مدلهين الغريبي

ولبيت دعواهم معزه ومقدار
لشبابهم واللي بسن المشيبي

والصبح فوق اللي طوا بعد الاقفار
مودع بعيد الدار عندك قريبي

ضحى وصلت ديار وافين الاشبار
في ضل شامخ برتفاعه مهيبي

قطن عسى عاليه تسقيه الامطار
ويسقي ماحوله من فياض وشعيبي

هامت بحبه حسب مسمع من اخبار
طميه اللي حبها له عجيبي

نسمع بقصة حبهم مع هل الدار
حتى قنوات الفضى له تجيبي

وختامها صلوا على سيد الابرار
مابان قرص الشمس بعد المغيبي
عجاب صالح الحنتمي

يالنفس عن بعض المشاهي والاطماع
كفي وخلي فيك عز وقناعه

دنياك دنيا كلها لهو ووجاع
لو اقبلت معاد فيها طماعه

وانا شباب اطق لي روس الاصباع
تقبل وتقفي ورهقتني قطاعه

واليوم لو جتني تهزع تهزاع
لقيتها وادي تقانب سباعه

كم واحدٍ منها شكى هم وصداع
بعد الغناه اصبح بثوب المجاعه

مدام فيها من بناها من القاع
وشيد بها قصرٍ طويل الرتفاعه

غافل وجاه اللي للرواح نزاع
له ماشفع ماله وكثر الجماعه

يالله تهديني على درب الاسناع
وجعلنا عندك قبول وشفاعه

عجاب صالح الحنتمي

الله ياتحث الثرا من رجاجيل
ماتقول عاشو باليالي دقايق

قفت بهم دنيا الشقى والبهاذيل
حقايقن ياللي تبون الحقايق

خسران يامدور وراها محاصيل
لو قمت تسبرها بكل الطرايق

اليا اقبلت بعد الضما تارد النيل
وان ادبرت بالقلب شبة حرايق

الربح فيها كل ماهود الليل
سجده لوجه الله رب الخلايق

وصل القريب ومعرفة لرجاجيل
اللي بهم مدح المناعير لايق

اهل مجالس بين ذكر وتعاليل
يدلهون اللي من الوقت ضايق

عجاب صالح الحنتمي

لا وهني الطير عنده جناحي
اليا طرت له ديرتن يمها طار

مايحتري من راس غيره سماحي
مايقهره عن مايبي كل قهار

وانا تكدر خاطري من مطاحي
رجلي تقل فيها ثلاثين مسمار

ان جيت اضمد بالمشافي جراحي
قالو كبير وطبنا فيك محتار

وعطوني مهدي وموعد صباحي
بعد شهر وانا تقل داخلي نار

الصبر مني تالي الوقت باحي
غير الظروف اشكي من الوقت الاضرار

وانا بدوي ماني براعي مطاحي
هواي سجه مع بعيدات الاقفار

لاشفت براقن على نجد لاحي
شعاني البراق لو مملك حوار

عجاب صالح الحنتمي

مادامت الصحه لناس ٍ صحيحين
كمن نصيح اصبح عليل الفوادي

فانين ماباقي على الارض حيين
يالله حسن الخاتمه والرشادي

فقيرها واللي رصيده ملايين
عزي لطايش باول العمر غادي

ليا نصحته قال بكره وبعدين
عنيد مايسمع كلام المنادي

ياسامع اسمع من كلامي عناوين
للفايده ماهي علوم ودوادي

خلك مع اللي بالمساجد مصلين
وابعد عن دروب الردا والفسادي

والوالدين برهم ياحمر العين
حذراك عينك لايجيها الرقادي

ولرحم والجيره حقوق وقوانين
انشد تعلمك العرب بالمهادي

موجز ومن يبغى العلا دربه ايمين
ازرع وتلقى حسب زرعك حصادي
عجاب صالح الحنتمي

عسى المطر يسقي نفود الثويرات
وماحولها من كل ديره وشعبان

فيها لبو شرعان صوله وجولات
ستين عام وفوقها وابو شرعان

عايش بها ماعاش جيل الحضارات
قضى حياته بين روضن ووديان

مرتاح بال وماملك له عقارات
اختار عن شوف البلد شوف الاضعان

عالم فلك من دون سابق دراسات
له يشهدون اللي لهم بالفلك شان

واليوم مايشوف القمر والمجرات
في غرفة التنويم والجسم هزلان

يارب سياته تبدل بحسنات
عليه لالفو جديدات الاكفان

يالادمي ماكل ليله سلامات
من لاعتبر يصبح مع الوقت ندمان

عجاب صالح الحنتمي

البارحه مع هجعت الناس فزيت
تقول قارصني مع الرجل دابي

لو مادعيت اللي خلقني وصليت
نقلت مابين الخلايق صوابي

من بعض ماشوفه على الحال ذليت
زل الشباب وراس عجاب شابي

ياكثر ماسمع من خبر لاتوحيت
هذا مريض وذاك تحت الترابي

دنيا تشتت صفوة الربع تشتيت
ياكثر من هو في سجل الغيابي

غياب ياهل العرف مهما تحريت
مافيه عوده لين يوم الحسابي

يصعب عليه ذكرهم لو تقصيت
مير الوكاد اني عليهم سطابي

همن يفتت ثومة القلب تفتيت
لاغمضت عيني دقايق عثابي

دايم يداهمني على غير توقيت
حتى علي ايضيق واسع ثيابي

وطعمت حاليها تقل مر حلتيت
دنيا عطتني بالشباب العلابي

واليوم عنها تالي العمر قفيت
وجهزت عنها للاخيره زهابي

عجاب صالح الحنتمي

ياناس دورات اليالي سريعه
يازين فيها العافيه والسلامه

من كثر مافيها خوافي وجيعه
حتى بها الماموم يسبق لمامه

وبين القرايب زاد هجر وقطيعه
مدري حسد مدفون والا غشامه

الحسد تنفاه القيم والشريعه
راعيه بحجاجه تشوف العلامه

لو كان سره للملا مايذيعه
لابد مايدلك بحسده كلامه

يقوله اللي مايعرف الخديعه
صادق وراعي معرفه وستقامه

للاخره ودع لنفسه وديعه
والفانيه تكفيه فيها العمامه

لاصار مايشكي بوقته هزيعه
مرتاح لو مرخي زمانه حزامه
عجاب صالح الحنتمي

مرحوم ياللي لك مكانه وتقدير
بدر الربيقي راعي الدين والجاه

من الشيوخ اللي تصد الطوابير
وضابط خدم دينه وتعرف احمياه

يوم المعارك بمهات الجنازير
قاد الكتايب ماحسب قوة اعداه

شدنا وشادو فيه بعض الشواعير
عسى جنان الخد داره ومثواه

عزا قبيلة حرب فيه المغاوير
عياله اللي ماخذه من مزياه

مشو على ممشاه روس المناعير
عسى لهم من عالم الغيب منجاه

من وقت فيه الشر يغلب على الخير
احيان كله للخلايق معاناه

يالله ياللي من عدم ترزق اطير
العافيه في وقت كثرة رزياه

عجاب صالح السالمي