ديوان الشاعر عجاب صالح الحنتمي المزيني

ان عاش راسي ومهلتني سنيني
وعفاني الله بالليال المقابيل

يابو خلف علمن عليه اليقيني
لاجيك لو دونك تكود المواصيل

زيارة الطيب من الطيبيني
لها على عمق الصداقه دواليل

غانم واحب مقابل الغانميني
شرواك ياحلو النباء ذابح الحيل

يامشيد المجلس قريب البطيني
يشوفه المرار في عتمة اليل

فيه النبا الطيب وفنجال صيني
وصينيتن مايشيلها فاتر الحيل

انشهد انه فاز دنيا وديني
عوض وريث اهل النضا واهل الخيل

لطيب والمعروف متوارثيني
جمع الوهوب مبعدين المصاويل

حمايت التالي وحصنن حصيني
عز الرفيق وللعدا طير ابابيل

عجاب صالح الحنتمي

جيت القصيم وكل حيي لقيته
اخواني الغالين وعيال الاخوان

كلن فرح في جيتي يوم جيته
يرحبون من الغلا سر واعلان

لامال حملي بالزمن ماقويته
شالوه عني محزمي فوق الامتان

ياعل يبطي حيهم مابكيته
ومن مات ربي يرحمه عالي الشان

وجيت الصديق اللي على الدرب بيته
به لضيوف وللقريبين صفطان

تركي يسلي خاطر لانصيته
قبال ابو راضي يبدد للاحزان

طيبه على الاجداد ماهو نبيته
كريم سبلا للكرم دوم عنوان

قافي على صدق الحقايق بنيته
ولاخير في هرجن على غير برهان

عجاب صالح الحنتمي

الله ياسرع الليالي والايام
يارب تكفي كل مسلم كدرها

دوراتها زاحة عن الحكم صدام
بعد القصور اللي بحكمه عمرها

وقبله وبعده من مشايخ وحكام
تعطي وجه وحيان تعطي ظهرها

فيها الحضيض اللي على دين الاسلام
صلى الفروض ونعمة الله شكرها

قدام يطوونه بقطعه من الخام
وجنازته مايشوف حين قبرها

رجال فيها له مكانه ومقدام
عينه على فعل الجمايل نظرها

مثل العقاب الصيرمي كل ماحام
وان غاص جاب الجوهره من بحرها

ورجال مابين المخاليق نمام
ان ماكسرها بالزمن ماجبرها

قدام مايقبض على الروح هدام
يارب عفوك والذنوب اتغفرها

عجاب صالح الحنتمي

ماباس ياموسى عسى الله ياشافيك
ماتشوف ياريف المشاكيل باسي

ياعل تبطي يارفيقي لياليك
وماتشوف في دنياك هم وعكاسي

على الوفاء والطيب دايم مباديك
مع طيب معدنك الذهب طيب راسي

انشهد انه يرفع الراس طاريك
ويزيدني طاريك طيب وحماسي

ياراعي الفزعات حبيت اواسيك
ببيات ياموسى من عقود ماسي

تليق بك وتليق باللي يحاليك
بنات فكري مغتلسها اغتلاسي

ماقل دل الله يعزك ويحميك
ويكفيك من جور الزمن والمآسي

عجاب صالح الحنتمي

الناس في ليل الشتاء ليلها ليل
متونسين وكل شي ٍ لهم طاب

لو طال يقضونه مزوح وتعاليل
متفاهمين وكلهم نزل واحباب

وانا بقلبي سم سودن مشاويل
مع العروق بتالي الليل ينساب

من جور دنيا نكلت في تنكيل
منها تقل في ثومة القلب مخلاب

خليتها ياشاربين الفناجيل
لو اقبلت لي ونفتح يمها باب

معاد باقي بالليال المقابيل
اكثر من اللي راح من عمر عجاب

ماتنفع الحيله وماينفع الحيل
ومليت دنيا كلها هم وتعاب

يالله ياممن على الوحي جبريل
عفوك بيومن ماعنه قيل مجناب

عجاب صالح الحنتمي

ياليت مامريت تالي نهارا
على محل اللي عسى الله يشافيه

دمعي على الخدين قام ايتبارا
وحار القدم والقلب كثر طواريه

محل ابن شرعان ريف الفقارا
به تفرح الخطار من يوم تلفيه

عالم فلك لاهل الفلك مستشارا
فطره من اللي بالي الععظم يحييه

ماله بتعليم المدارس مسارا
قاري وداري دون حين يقريه

من عزوتن فوق النضا والمهارا
كم فارسن من سرجها غصب ترميه

وبيوتهم فيها الشبب والبهارا
ونارن سناها تايه الليل يهديه

للضيف والجيران مثل المزارا
ومزبان للي وقته الشين واطيه

عريمات مافيهم ذليل وثبارا
تاريخهم معروف حاضر وماضيه

عجاب صالح الحنتمي

ياعل بيتن ماقلط فيه رجال
من بنيته ماحد تضلل بضله

يجيه عاصوفن يشيله ورى الجال
وراعيه تبقى جثته في محله

لاصار ماهو للرجاجيل مدهال
ومافيه للخطار فنجال دله

عساه فدوة بيت من يفني المال
ماشح في ماله وطيبه جبله

عن الشتاء يذري وبالقيض مقيال
مشيده واهل الشكاله تدله

بدر الحنيني مابها شك وجدال
انشهد انه حايز الطيب كله

مع الكرم ريف المهاجيف رجال
مقبول بين الناس ماحدن يمله

وابوه وخوانه لهم قدر وجلال
الطيب باهل الطيب دايم جبله

متوارثين الطيب من ماض الاجيال
وشجعان مافيهم دويني وذله

حنانيه يوم الدلي تصفق الجال
عن السبايا يجدعون الاجله

خيالت العليا مطانيخ وثقال
قبيلتن بمجادها مستقله

عجاب صالح الحنتمي

قبلك وبعدك ياشعيب الزبيره
الدرب للكشات ماهو سماحي

وانا ابدوي بالبر علق مصيره
هواي شب النار برضن براحي

وسجت خلا في دار خضراء مطيره
وصوت ام سالم بالمساء والصباحي

اخير وابرك يالوجيه السفيره
من القصور ومنتجعنا السياحي

تسوى حياة اللي شبوحه قصيره
لو اقبلت ماهو براعي مراحي

ان راح مايبعد بيومه مسيره
ساعه ويرجع هروله للمراحي

يامل قلبن فيه مثل السعيره
مدري تساقى فيه سمن ذحاحي

على الزمان اللي حياته يسيره
لو المعيشه فيه تبغى كفاحي

بالقيض نقرب للعدود الغزيره
لاهل الضعن تسمع عليه الصياحي

ولامال ظل البيت وقت الظهيره
وسهيل بان وبارق الوسم لاحي

تفرقو والكل يبكي قصيره
مع الديار الطيبه والفساحي

ياوقت فيك اليوم عايش بحيره
يالله حسن الخاتمه والصلاحي

عجاب صالح الحنتمي

سلام ياراع الوفاء والمواصيل
يارامي شديد رفيع المقامي

ياطيب الرفقه سقا دارك السيل
من ناشين برقه يشق الظلامي

بعد السلام وكيف روس الرجاجيل
خذ قول شايب حول سبعين عامي

ماشيبه ياوافي الشبر والكيل
غير الضروف وجرح الايام دامي

من تجربه عطاك موجز وتحليل
عساك تفهم غايته بالتمامي

الخوه اللي ماوراها محاصيل
خلك يمن واصحابها عنك شامي

مرافق الخايب سماجه وتقليل
من شان عالين النسب والمقامي

وعن الردى والظلم والقال والقيل
ابعد وخلك يارفيقي عصامي

مرافق الطيب مثل صافي الهيل
في وارد الرسلان والجمر حامي

عليك في خوت زحول الرجاجيل
ترفعك لو انك كسير العظامي

عجاب صالح الحنتمي

يالله ياللي ماخفى فيه تدري
يرازق الذره ويرازق الطير

تفرج همومن مستكنه بصدري
خلت معاليقه مثل واهج الكير

مالي يا علام سري وقدري
غير انت يفارج هموم المعاسير

شكيت من دنيا الغرابيل بدري
وطرتها طرد الصقاقير لطير

ابني وهد بعالم الزيف جدري
وحفى قدم رجلي طويل المشاوير

ازرع من الاشجار كادي وسدري
ويطلع محله ثوم مايبشر بخير

اهدرت فيها زهرة العمر هدري
وعيت معي تمشي بكل المعابير

ياما غدرتني سود الايام غدري
واليوم ماقوى غدرها يالمناعير

ان قلت مادري بالمقابيل مدري
يعلم بها من كون الكون لاغير

عجاب صالح الحنتمي