ديوان الشاعر عجاب صالح الحنتمي المزيني

وجدي وجود اللي بعد شبت النار
ونجرن على صوته يجون المسايير

وصينيتن يلقابها الضيف والجار
حيلن تقلط بعد كيف المباهير

يجونه الخطار من كل الاقطار
وجهه بشوش وماحسب للمخاسير

واليوم دارتبه دواليب الاقدار
ماصارله في تالي العمر تقدير

حطوه رادين العمل داخل الدار
اللي من اول عند بابه طوابير

هو ايتوجد مامضى له ومنهار
ودموع عينه فوق خده حوادير

وانا اتوجد يوم للبدو محدار
يوم السنين الاوله والمظاهير

وشوف القطين اللي على العد حضار
وصوت الرشاء فوق المحاله على البير

وسوالف الشيبان وافين الاشبار
اهل المعام البيض ستر الغنادير

ياطيب جيرتهم مواريث الاخيار
اكرام حتى بالسنين المعاسير

هذا منايه ياهل الكيف والكار
لو ان وقت اليوم عن مانبي غير
عجاب صالح الحنتمي