ديوان الشاعر/ سعد المحمدي

اسمع وشوف وكن ماسمع وماشوف
اخلي الهزله تمر وتعدا

بالناس ماني تالي العمر مكلوف
من طاب طاب ومن تردا تردا

غير الكلام المتزن مالي اشفوف
وماني من اللي مهنته جاب ودا

يانجد عاصف بك من العام عاصوف
نزالك المغرب مع الصبح شدا

لقيت بك عاقل وحاسد وملقوف
ومكار وده مابنيته يهدا

مايقضي الازم ومايقري ضيوف
قلبه من الغيره تواكل وصدا

على الردى ومغالط الناس ملهوف
على حقوق الغير نوب ايتعدا

تجمهرت خلفه مساكين وضعوف
اللي يجيب الخام واللي يقدا

وانا رجل راعي جماله معروف
في يوم غابت بالقريب المبدا

اوضح لقصاص الاثر من جبل عوف
يشوفه اللي بالنظر ماتقدا