ديوان قصائد الشاعر(بخيتان البشري)

حريص والدنيا دروب وتحاويل
من هٓمته يمسي بها ماسلاها

الطيبة محصول ظفر الرياجيل
وما كل واحد لا زرعها جناها

الناس مثل الارض لا نحط ونشيل
البعض طين وبعض صبخة ثراها

والكايدة في وجه عزم الحلاحيل
لو مزنها برقه يلوح بسماها

تسهل وهي صعبة ليا جتّ تساهيل
وتصعب وهي سهلة على من شكاها

علوم ما تكشف بأدق التفاصيل
وعلومن اولها كشف ماوراها

ما كل صاحب فالوازم كما قيل
يطلع على هقوى صحيبه هقاها

اصحاب ضحكة سن وهروج تضليل
الوقت يظهر فالشدايد خفاها

واصحاب في كل المواقف مشاكيل
وفعولهم في كل ديرة صداها

الحر وصله مايجي بالمراسيل
ولا جات له حروة يجي في حراها

قلنا كما قال المثل دون تعديل
تكرم مدن من شان عين وغلاها

وندري عن المقسوم غيبه محاصيل
كم حي مات وحاجته ما لقاها
........