يابـو سعـد بــاب حــب البـيـض سكـرتـه

يامرحبا يا سعد ترحيب كررته=
=عداد حرف(ن) قراه من الملا قاري
بديت مبدأ ولا ادري ليه غيرته=
=ليتك على نفس دربك يا سعد ساري
موقفك ياصاحبي لو كان بررته=
=الناس يمكن تصدق وإلا انا داري
عارفك قلبك خضر ماجفت شجرته=
=توك شباب وعلى فعل الشرف ضاري
وانا مامن فرق قلبي كل ما انذرته=
=يقطع علي الطريق بنص مشواري
والواقع اللي عن الموضوع صورته=
=عزالله انه على بعض العرب جاري
كم ثور وانت بكرامة يتبع بقرته=
=رغم عن انفه ورآها يمشي اجباري
ويبدل المشي ركض ليا تنهزرته=
=اسبق من اللي مفزّع والحدث طاري
ولو جودت مسكته من عند حنجرته=
=يمكن بوسط الحراج تقول ياشاري

فهد بن سعد السليمي