أبيات الشاعر الكبير/ بدر الحويفي. وردي عليه.

هذه الابيات رد ثناء لعشيرة العريمات
من الشاعر الكبير/ بدر بن عواد الحويفي.

قالوا مسيّر قلت يم العريمات=
= اللي لهم شرق البعيثه مرابي
أهل المروه والفعول الشريفات=
=مامنهم اللي بالمواجيب هابي
لاجاهم الزاير قبوله تحيات=
=والضيف لاجاء ماعطوه العلابي
طبعٍ لأهلهم بالسنين القديمات=
=الجود والشيمه ولين الجنابي
ويوم القبايل بين عنف وحزازات=
= جمع المعادي من خطرهم يهابي
ولهم بصعبات المواقيف وقفات=
=تشهد لهم صم الرمك والركابي
وان جاء نهارٍ به قواما وغارات=
=على الخصيم يمكنون الصوابي
كم شيخ قومٍ لاوصل حدهم مات=
= بمفجرات القفش والا الحرابي
عبرت موجز والختام الصلوات=
=على الرسول اللي جليسه صحابي

---------------------------------------
--------------------------------------

ردي على الشاعر الكبير/ بدر بن عواد الحويفي.

يقول من عدى بروس الطويلات=
= وفي قمة المرقاب رد الجوابي
ردٍ على راع البيوت الجزيلات =
= لمعلم الشعار درب الصوابي
يابدر بن عواد ياطيب الذات=
= ياشاعرٍ راسه على العز شابي
شاعر حكيم ولا تحب المضاهات=
= وأنته علم لك بالجزيرة كتابي
والمدح منكم يالسنافي مسرات=
=ياشاعر الجزلات والقاف طابي
وابرك نهارٍ جيتك للعريمات=
=مثلك مجيه ينحسبله حسابي
من روس ربعٍ فعلهم جد وإثبات=
= يشهد لهم تاريخ شيب وشبابي
وأهل الكرم والجود ماهي دعيات=
=رجالهم ماهو بخيل المخابي
واختامها الكمبود والمسك زافات=
=يضفي على محيا عزيز الجنابي

شاعر الواقع: سند مسند العريمه.

صح لسان الشاعر العلم
بدر الحويفي
وصح لسانك
يابو سعد على الرد الوافي والجزل

صح لسان بدر الحويفي قال الصحيح بيض الله وجهه

وصح لسانك يابو سعد رد وافي من شاعر متمكن بيض الله وجهك

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح بدنك يابوتركي لاهنت مروركم نتشرف به.

صح بدنك ياشاعرنا ابوهليل لاهنت وماعليكم زود بيض الله وجهك.

الحب الباقي صح بدنك مستشارنا المحبوب تسلم لاهنت.

صح ألسان الشاعربدرالحويفي على هذه الابيات الموجزه الكافيه عن عشيرة العريمات الكرام ويستاهلون.
صح ألسانك يابوسعد على ردك الطيب وكفو يالعريمات .تقبل تحياتي.

تستاهل العافيه والعلم الغانم اخي محمد سعود العلوي وصح بدنك
تسلم لاهنت ولا عليكم زود يا ابن العم. وشرفني مروركم العطر. تحياتي لك ودمت بخير

صح لسان الشاعر الكبير/ بدر بن عواد الحويفي
وصح لسانك شاعرنا سند العريمة
ونعم فيك وبربعك وتستاهلون المدح
أبيات جزله مًنَ أهل الجزاله الله يديم الغلا والمحبة بينكم
تحياتي وتقديري لكم .