ديوان قصايد الشاعر( ناصربن مصلح الحربي ) ... جميل النوايا ....

بسم الله الرحمن الرحيم

البل عطايا الله هوات المناعير=محد(ن) يرخّص سعرها من غلاها
يا ما حلا درّ البكار المصاغير=لا جيب للضيفان حزّة قراها
شمخ الذرا فيهاعجيب التصاوير=الله خلقها اية(ن)هو حماها
ضرب بها الامثال رب المقادير=من بين لحم ودم اخرج دراها
ماتلتفت لو كان تمشي مشاوير=سفينة الصحراء وزينة ثراها
ان شفتها تمشي تسطّر طوابير=مثل السريه والفحل من وراها
إن حدّها الراعي تجنّه مغايير=تحفظ طريق(ن) قد مشنّّه خطاها
وان دارها الحلاّب حنّت مزامير=تملا له الماعون لو هو بغاها
وان جاء فحلها تنحني له مداوير=إيديرها وهو بالهدير ايدراها
قامت تزاحم فوق حوض(ن)مساوير=وقامت تفاهق من روى جم ماها
وان جاتني تعدي تزرفل مزافير=هزّة ظهرها والحويّر ذراها
حمر(ن) وجهم(ن) والحلا بالمغاتير=وصفر(ن) وشعلا(ن)ما تميّز غشاها
فجّ المناحر شامخات المظاهير=من شافها سبّح لمن هو عطاها
نرخص لها الغالي وكل الدنانير=ماهي خساره بالذهب لو شراها
ملقى لها لو جيت أببعد معاذير=الروح معها والجوارح تباها
في جلسة(ن)فيها وجيه(ن)مسافير=بين الربوع وقمرة(ن)في سماها
والذود في شبكه بارض(ن)مقافير=وشرحة صدر لا ما ندوّر سواها
فيها القلوب انظاف نطق وتفاكير=عن الردى والسوء ربك عماها
ناس(ن) كرام ماتحسب المخاسير=على الوفاء والطيب منبع نماها
والمعذره ان كان جتكم تقاصير=تمت وفكري حسب شوفي بناها

ناصربن مصلح