ديـوان الشـاعـر.../ جميل حميدان المزروعي

قالوا علامك قلت وش ماعلامي = قلبي مصوب والسبايب من العين
عيني تشاهد نورها كالظلامي = وسبتي بعد حدي قبل يوم الاثنين
لامي لحق لامي ولحقة لامي = بيني مابين البين والبين مابين
حاولت افسر من كلامي كلامي = وليا كلامي نون في وسط عينين
اللم ماهي لام الف ميم لامي = عينين عين وياء مابين نونين
حربي وحربة حرب تبغا سلامي = مبلي بلاة العشر في عام الالفين
حامي وجودة من وجودة يلامي = و ينة خذا وينة ما يدري على وين
حالم وحلمة حلم حالمة حامي = دينة قضى دينة بعد كان له دين
رامي رمى رمية ولاهو برامي = حاني حنى قوسة بما بين قوسين
ورد مواريد الهوى والغرامي = وانصاب منها الياء والنون والعين
حايل وحل حلالها بالحرامي = نخلة قطفت فنونها فوق سيفين
حلم العيون الساهرة ماينامي = حد الحدود وحدها سيف حدين
لامة من العالم ملام وملامي = وافطر على الحمرا على حد سكين
هل ياترى حربة تعود سلامي = والا قسا لينة قسا من بعد لين

الشرق الاوسط حالته حاله= من بعد ماثـارة براكينـة
غـزاة رجليـة وخيالـه = واختل واختلت موازينـة
مابيـن نقاضـة وفتالـه= تاهت عن الثاير عناوينـة
احد غزآ حاكمة واشتالـه = والا احد ماشاله ليا لحينة
كلً خـذا فالـه ومعدالـه = والمسعد اللي فاز بالزينة
ما باقي الا مـن تهيالـه = شيطان ظمة مع شياطينة
يبقاله من الوقت يبقالـه = قسمة يبا ياجية في حينة
ماينفعة يمنـاة وشمالـه = لو كان بالتصويت حامينة
كلٍ يبا يجزى على اعماله = في يوم تشهد ضده ايدينة
قلته وانا من دار ما حاله = الحايل اللي من حوالينـة
الطيب فاله والسعد فالـه = عنه العدوا لا جاه حادينة
لامن دعا داعيـه جينالـه = لو يطلب الارواح معطينة
تاريخنا يشهدلـه اجيالـه = تاريخ موثوقـة براهينـة
شعبٍ يسابق قوله افعالـه = وملوك راضيهم ومرضينة
آل السعود اللي لهم طاله = والمجد بالامجـاد راقينـة
ماقاله الله حكمهـم قالـه = دستورهم شرعة قوانينـة
العود ورث حكمه عيالـه = واللي مشاه العود ماشينة
يبقا الوطن لنا وحنا لـه = والله يديم الحكم وسنينـة

الموت حق ولا عن الموت مجناب = دربٍ وكل الناس في دربه ورود
مرحوم يابوناب ياراعي الناب = مرحوم ياللي لوفقدناك موجود
ماغاب منهو فالمواجيب ماغاب = له ذكر ذكره فالمواجيب معدود
ذكره تجاوز ذكر بن غانم ذياب = مشهودله بالطيب والطيب مشهود
انا اشهد انه كان للحرب حراب = كم من حسودٍ حط في عينه العود
شاعر تعلا بالشعر كل مرقاب = يوم ان غيره حاضر وماله وجود
من دون ربعه كان واقف على الباب = وقفت شجيع وباذلٍ كل مجهود
يرحمه من قدر على الخلق الاسباب = الواحد اللي كل خلقه له سجود
ماغاب من خلف يقولون ماغاب = واليوم من بعده على الباب ابوسعود
الله يبارك فيه للنار شباب = والناب في يمناه للخصم مجرود
يحفظه من نزل على محمد كتاب = الواحد اللي ماسواياه معبود

من دون حد السيف حنا على الحد = وارواحنا من دون حد الوطن روح
قول وفعل والفعل للقول يشهد = والقول دون الفعل ما منه مصلوح
حنا سعوديين تشهدلنا نجد = عن من بنا في نجدها مجد مايروح
عبدالعزيز اللي لتاريخنا عد = تاريخ حاضرنا بماضيه موشوح
بيتن بناه بعزم بالعزم مانهد = سلمه للي زادوا البيت بصروح
سعود سلم فيصل وخالد وفهد = سلم ملك مطنوخ طيب وطحطوح
عبدالله اللي ود شعبه وله ود = الشعب صدرة من مودته مشروح
الطيب من الوصف به صعب ينعد = كل وصف طيب له من الرب ممنوح
في جوده وفي مده البحر لا مد = كل الذي قدمه على الدرب ممسوح
الفقر من جوده من المملكه شد = جاه الغنى من مده وقال له روح
والشر من خيره بعد شاهده صد = والغش بعد اعلن له الحرب مذبوح
في خدمة البيتين حاضر على الوعد = خيره على زوارها مزنه يلوح
اللي مضى نقطة بحر فالذي بعد = في مدح قايد مدحنا فيه ممدوح
العهد له ولنايبه والي العهد = قايد دفاعن قدمه الخصم مدموح
والشعب كله للوطن ساعة الجد = درع وسيوف ومدفعيات ورموح
ياويل منه للوطن بالنظر لد = ما لامه الا تكثر ان لد بالنوح
لو كان وان السيل يتجاوز السد = ما للعدو من بيننا باب مفتوح
المجد قالوا للذي يصنع المجد = واحنا صنعنا مجد من طيبه يفوح
الامس يبني مجده اليوم للغد = والماضي لمستقبل الحاضر يروح
واليوم حنا ياوطن معك نسعد = ونلبسك بمناسبة عيدك وشوح
الخير مايبقى اذا مالقا الحمد = والحمد للي منجي من البحر نوح