إلى العاصفه / حفيد الحجيري.( وانكان شوّقني ضبيّ التّهامي=بيردّني للكيف بنّه وهيله )

صح لسانك يابو عبيد و بيض الله وجهك على الابيات الجزيله والحقيقه انك شاعر قدير لا يملك شخصي المتواضع الا محاولة مجاراة ابداعك بما أستطيع ...
والعذر اذا لم ترقى ابياتي المتواضعه الى مستوى بدعك ،، والسموحه لو حصل قصور ......... وإليك الرد :

حيّ الكتاب وحيّ خط البهامي=وحيّ الهجوس اللي تجيب الجزيله
يا شاعرٍ فالعرف حرٍ قطامي=أصيل عرفه مكسب أهل الأصيله
لك حرف مثل الكيف يجلى عسامي=بالبنّ الأشقر مع خَضَر زنجبيله
يا مرحبا يا عزوتي يا حزامي=يوم اِصقلال المرهفات الصقيله
قدّام عمّا بك نزيح اللثامي=لا باس يا شاكِ الرموش الضليله
يا واردٍ عدٍّ وروده حيامي=عدّ الهوى ما أروى الكبود العليله
كم قبلكم صدرّ على العدّ ضامي= و دموع عينه فوق خدّه شليله
قيس الملوحّ عاش عشرين عامي=مجنون ليلى وآخرتها اِش حصيله
يا صقر صقّارك طلع خوش رامي=صاب الهدف والقلب ولعّ فتيله
والفارس اللي ما يشدّ الخطامي=وما يكبح جماح الهوى عزتيله
ماني بملحقكم عتاب و ملامي=بس أتفكرّ كيف تاه الدليله
الورد في سوقه يباع و يْسامي=واللي يهاب السوق وش له يميله!!
ليل الهوى ما ينجلي له ظلامي=وصُبحه كما برّاق صيفٍ تخيله
مدري يا خالد تبلغون المرامي=وألاّ عن الغاية تحول الوسيله
يابو عبيد إن كان ما به ليامي=قلبك لا يمشي درب ما يستويله
الودّ مسروقه في حكم الحرامي=وقاضَ الهوى مهما عدل فيه ميله

وسلامتكم

==@@ الحجـــــــــــــــــــــــيري @@==