سلام إنذار أنا الليلة تراني مثل سيل العرم

سلام إنذار أنا الليلة تراني مثل سيل العرم=دبشكم لاتخلونه أمانه وأُبرُحوا الساحات
يقولون السنه ترمين روّح ترم وباقي ترم=وأشوف مدرس الاحيا سوات مدرس الاموات
نايف بن مياس الفريدي
هلا يامرحبا ياللي تسلم فوق راس الهرم=ترانا نفتخر باللي يجينا كثر الجيات
ترانا حاسمين المدرسه لحجاب والا الفرم=واذا ما انته مصدق في كلامي حلل الجينات
طلال المعبدي
لعلك للبقا لكن ترى به مدرسه للطرم=أحد لأكل يوكل وأحدٍ يبا عشا ويبات
ترى لحم الدواسر يالفريدي بين حل وحُرم=ولا ماارضى المصادم للفريدي مير هذي جات
نايف بن مياس الفريدي
انا لي سمعتن تردع ضميري لا ارتكب بك جرم=واقدر لابتي واخضع لحكم الشرع والايات
اشوف انك تحاول تنفخ النيره لاكن الشرم=يضيع ماتحاول تبذله لا تكثر النفخات
طلال المعبدي
نعرف المعرفه وأصحابها وأهل العنب والكرم=ولك غايه ولي مقصد ولي مقصد ولي غايات
قريتوا جوهر الموضوع لايكثر عليك البرم=وهاذي جات ولاذي وذي ب النات وذيب الشات
نايف بن مياس الفريدي
قطفنا من ورود المزرعه لاهل الهوى والغرم=وتلقا ماعملته محضرن لك والعمل نيات
علامك ياطلال اشغلتنا وانته بلاك العرم=تحاول تعتلي للمنزله لاكنها هيهات
طلال المعبدي
أما والله يالو ما سلمت من الهرم محترم=لأدندنها ربابي فوقكم ، باحت لكم باحات
بعد جات الملامه جانا يقطِع فالثياب ويرم=وزاده عنفوان اللي دعمه ورغِّبِه فالذات
نايف بن مياس الفريدي
نقدم لك علاجن للمرض لاكن زاد الورم=وانا توي دريت ان الربع يوجد بها عيات
ترى حسني مبارك نسمع انه معتقل بالشرم=وشرم الشيخ ما احدٍ يفرق الرمضا من الفيات
طلال المعبدي
ترى والله ما ينفعك ولو زان المراما فإرم=لو إنك في بلد شنقيط ولا فروضة التنهات
وفي بعض العرب للرقع وفي بعض العرب للخرم=وبعض الناس للحسنات وبعض الناس للسيات
نايف بن مياس الفريدي
عرفتك ياطلال اللي تسمى واحسب انك قرم=تحمل فوق وزرك من ملاقيف البشر سيات
انا قررت اغير بالتعامل بالعصا والصرم=لعله انه يتوب اللي يهرب للخزا والقات
طلال المعبدي
ليا مرت بك الطرقه أبا أقابلك فم الجرم=ديرنا ياعساها الغيث فالروحات والجيات
عليك البيض وصح الله لسانك لاعدمت الثرم=زوايدها نواقص يالفريدي كل آتٍ آت