سالم العرم .. الذرب تطرب له رجاجيل ذربه

11-01-13, 08:05 PM

المدح من عميان الاريا مسبه
يوم المدايح من هل طيب طاله

واللي تعلى نايده كل قبه
غيره رجال ان كان راعي شكاله

وايامنا باحداثها مستشبه
وراع العدل ما يامن من المياله

لو كل من يسعى لشيئآ يذبه
ما طاح طائر بعد ما واق عاله

والنفس تلوي بالفتى صوب ذنبه
مثل الاعنه في رقبة الكحاله

والادمي لو كل شيئآ كسبه
ما حدن نقص ماله ولا زاد ماله

والعد لامنه تغثرب بشربه
صدر ولا تاقف على حد جاله

وهرج العرب مثل البحر في مصبه
لو يغرقك ما رواك لو في بياله

والقرم يظهر طيب ربعه وعقبه
والا الردي ما فال الاجواد فاله

ما تسعفه يمناه في شيل حربه
لو فالرخاء هيبه ومايل عقاله

دام الحسد والحقد ساكن بقلبه
يفرح اليا حصل بالاجواد عاله

ويقول هرجك فيه بعده وقربه
عن الهدف من زود غلن فباله

احدن مدح قولي والاخر يسبه
وانا على مبداي راعي جزاله

حتى النبي الهاشمي هو وصحبه
ناس تطاوع له وناس تعصاله

يوم الحبابي عز الله وحبه
قال القصيد وشاقني في مقاله

اخذت من قوله ولا خلفت دربه
من شأن لا الجاهل يسوي جداله

والذرب تطرب له رجاجيل ذربه
ولعيونهم يرخص غزايز حلاله

والا حشى ما من وراء ذيك كربه
ولا عاش من لا تارد الماء حباله

والكون قد رحنا لشرقه وغربه
ولابه جواب الا عرفنا سؤاله