ديوان الشاعر/جزاء بن صالح الحربي

قالو علامك دايم تقل زعلان=وياعل ما انته يابوصالح زعولي
قلت اسمحوا لي ياكريمين الايمان=تراي من نشداتكم ضاق جولي
ولا كل من يبحث ورى سر الانسان=يكشف عن اللي بالضماير يجولي
ومن قال انا افهم غاية القلب غلطان=القلب دونه مبهات القفولي
ولاني على بعض المواضيع شفقان=ولا احط راسي يم ضل يزولي
وامشي مع الطيب على قدر الامكان=ولانيب اطاول شخص مهوب طولي
وانا اليا شفت الاعور وسط عميان=اجنبه من خوف لا يصير حولي
واصد منه مع وسيعات الاوطان=لو كان حفيانه مواطي ذلولي
والناس كل له محبه وصدقان=وكل على محبوب قلبه ميولي
ورجل بلا هيبه مع الناس خسران=لو يحسب من رجال زحولي
والضحك في وجيه الرجاجيل نقصان=ان كان ماللضحك وقت واصولي
هذا وكل له محبه وصدقان=والله فرق ما بين صنف العقولي