ديوان الشاعر/محمد العسيلي رحمه الله

وهذه مساجلة بين الشاعر محمد السديري والشاعر محمد العسيلي رحمهما الله تعالى.


يقول السديري:

اهلا عدد مامال ريح بنبنوب=من خاطر هرج الردا ماهذابه
أحلى من السلسال في صافي الكوب=وألذ من نقع المطر من ربابه
من خاطر يشفق على كل محبوب=ويجعل رفيقه دون كل القرابة
يكن له ماكن يوسف ليعقوب=ويحمى قفاه بحضربه مع غيابه
ويذريه ما يشكي عنا كل لا هوب=ويزيد له بالطيب عن ماهقى به
العمر من دونه رخيص ومجلوب=ولا يستمع بهروج حي حكى به
نفتح له صدور تذرا ورى جيوب=وعن ما يعيب منزهين شنابه
يا ابن العسيلي مابكم كل معيوب=حاشا ولا في طيبكم مايعابه
لكم على الجودا محاريف ودروب=وراسين مثل المعتلي من هضابه
ودياركم حامينها بكل مسلوب=وياما دخلتوا دونها من حرابة
وياما نثرتوا دونها الدم مسكوب=أروى لعطشان الثرى من ترابه
ياهل السبايا اللي لها الأصل منتوب=معمقات من عصور الصحابة
سلايل من فوقها حرب لحروب=دايم على الردات عوج رقابه
وإن جاء نهار مشعل الحرب مشبوب=فأنتم على الطوعات مثل الذيابة
نعم بكم والسيف مشهر ومقضوب=إن حل بأطراف الجهامة ضبابة
أعني بني سالم ومسروح ووهوب=ما اقولها بأهل الردى والخيابة
وادي الرمة من ولبكم صار مهيوب=بروس البلنزا مبعدين رحابه
وليا غزوا يمه غزاة لقوا شوب=وطبوا على بحر تلاطم غبابه
الطيب لأهل الطيب يذكر ومنسوب=وكل على طوله يفصل ثيابه
والناس في دنياك غالب ومغلوب=وكل على شفه يوجه ركابه
واللي من أفعال الردا فيه شاذوب=هذاك كساب الخناء في شبابه
اختر رفيق بالقسا يقضي النوب=وابعد عن المنزوع قل لا هلا به

ورد العسيلي:

قال العسيلي وان بدا راس مشذوب=مرقاب جرك مابضميري وجابه
وبديت باسم الله عن الكل مطلوب=سايق هماليل المطر من سحابه
وابديت مافي خاطري يمه وصوب=من خطار جاش وجهش كل مابه
اهلا هلا ترحيبة تقضي النوب=ترحيبة المشفق بروية غيابه
تحية مثل العسل صافي الذوب=وألذ من نقع المطر في شرابه
برسالة كلف بها لي مندوب=من أعز مخلوق وصلني جوابه
من السديري ما ركم فيه مكتوب=عبارات تطلق وجه من هو كتابه
كتابه تمليته وقربته حروب=وأشهدتهم واقع خطاه وصوابه
لا شك ما حصلت بالخط عذروب=مافيه موضوع عن الزين شابه
كلامه الطيب قفل كل دالوب=جميع دالوب عنه صك بابه
وأجاب على كل ماكان مطلوب=فهم سؤالي واعتنى بالإجابه
إجابة تفتح لها صدور وقلوب=وتغلق لها ابواب عليها رقابه
سلم وغنم من قام في كل ماجوب=وجاب الكلام اللي حسبنا حسابه
محمد فداك من الملاء كل زاروب=اللي صلاحه ما يعادل خرابه
حقك عليه ما انسب العلم مقلوب=وحقي عليك الصدق في كل جابه
لو كل علم يم حاكيه منسوب=وترجع مناقيده على من حكى به
لا شك احب الصدق والصدق مرغوب=عند الرجال اهل الشرف والمهابة
واصاحب اللي صحبته مابها عيوب=واجفى الجناب الللي يمله جنابه
واجنب اللي كل اما احتجته يذوب=ويروح ضحضاح تلاشا سرابه
تذهب مواعيده مواعيد عرقوب=أدراج ريح ? الله يخيب شبابه
واللي لبس لي بالصداقة مية ثوب=ماهو صديق ولا هبابي هبابه
هذا كلام اللي بدا راس مشذوب=رأس الطويل اللي تقطع سرابه