ديوان الشاعر عايد الوهبي

حس وتفنن بالغلا وزود الكيل=معاد يكفيني انا أكون ذاتك
ابيك تهواني كما الأرض للسيل=وابيك أعمي وتعتبرني عصاتك
مثل الدموع بحد رمش ٍ مضاليل=وانا الكفوف اللي تلملم شتاتك
ابيك وقت ٍ يعجز يعيش به ليل =وابيك ليل ٍ واهتني في سباتك
وابيك حب ٍ يبتدي وينتهي بويل=لين الفرح فيني يعانق غلاتك
قولي لعطرك والغطي والمناديل=عن حبك اللي يعتبرني حياتك
قولي لهم انك كما مهرة الخيل=في عين مجنونك عظيمه صفاتك
كوني النجوم وضمنها بصبح سهيل=بعيش منك وفيك أغلي أمنياتك
بحققك وأحياك ياصفوة النيل=بأجمع سواد الليل وأنسج عباتك
ابكتبك شعر ٍ يردد مواويل=لين الجبل يقول للبحر فاتك
وإذا العواذل أبرهه صاحب الفيل=انا الطيور اللي بيديها نجاتك