ديوان الشاعر غازي بن مغيران الزغيبي

ياللي من العارض مشيتم محادير=تريضولـي ليـن أرتـب كلامـي
تريضولـي ساعـة يالمناعـيـر=وتجملوبـي والحقونـي مرامـي
وخوذوا سلام مثـل در الاباكيـر=في ضف من يثنون دون الجهامي
ودوه يم مصخر القـاف تصخيـر=تكفـون ودوا للزغيبـي سلامـي
وليا لفيتو عند غـازي خطاطيـر=كولو كرامتكـم بيـت الكرامـي
تلقون شغمـوم يديـر المباهيـر=ويكثـر الترحيـب والاهتمامـي
وتلقون بالمجلس ضيوف ومسايير=وكل على التقديـر والاحترامـي
ياثالث الاثنيـن مسيـت بالخيـر=ولاني بمكلـوف بعـد الاسامـي
خايف يصير بصافي الجو تعكيـر=وتصير دعوانا فطـور الصيامـي
والشك زايل يازبـون المخاسيـر=ولاني امبرق في جنايب حزامـي
والله ماغبط اللي يشيل البواكيـر=مادام لي سيف يقص العضامـي
لو حسب الزراع غزوا العصافيـر=ماقام ياغـازي بـزرع النوامـي
لي قصةٍ كثرت عليهـا التفاسيـر=وحرم بها جايز وحلـل حرامـي
قصة تحير صاحب العقـل تحييـر=واصبح لها في كل سوق ازدحامي
وانا مصدرها من الفكـر تصديـر=ورافع علمها فوق روس الزوامي
لاكن عليها يطرقـون النواظيـر=ناس تيـدم فـي محـل اليدامـي
في غيبتي يطلع لها طابـع غيـر=ويطلع لها راعي حميـه يحامـي
ونشت من القبله مزون مزابيـر=حي السحاب اللي يروي الضوامي
والثانيه عمهوجةٍ سنهـا صغيـر=طلـت علـي املثمـه باللثامـي
غندورةٍ ماهـي مثـل الغناديـر=منها كبر حلمي وعـزت مقامـي
واخذت وقت وصار بالجو تغييـر=وعود شوي شوي يجلا الغمامـي
وصورت لك ماصار بالفكر تصوير=وارسلت مكتوبي وبصمة بهامـي
ياشاعر شعرك يشوق الجماهيـر=عساي معك أقوم في نصف زامي