ديوان الشاعر عيسى رجعان الرشودي العوفي

سلامي عدد ماهل وبل المطر هتاف=من المزنه الغراء تهل الهماليلي
هماليل وسميه سرى برقها خطاف= ويزهم رعدها وانحدر عقبها السيلي
وعدد من دخل مكه بوسط الحرم طواف=شعاره بمكه بالدعا والتهاليلي
سلامي لضيف الله من الضامر الميلاف=من اولاد وائل من اسباع الرياجيلي
انا بسئلك يالشاعر اللي تجيد القاف=اباعرض سؤالي لك بجمله وتفصيلي
اشوفه وبعض الناس مثلي بعد قد شاف=اشوف القرايب حربها له مواويلي
يعادي ولدعمه على اتفه سبب واخلاف=واشوف النسا بالسوق مثل المهابيلي
تجوب الشوارع لبسها جاذب شفاف=ورجالها يتلي لها باردالحيلي
تبايع مع الهندي وتكشف له اللفاف=وكنه من الربع القريبين بالحيلي
وتركب مع السائق سواليف يالطاف=يشيل الولد عنها معزه وتجليلي
انا قلتها من حر مابي وهاض القاف=وانا شفتها بالعين ماهي بقاويلي
امور ياضيف الله تخل الحياه تعاف=وعساك ماتنقد كلامي وتحليلي
ترى من ضعف دينه ولامن وليه خاف=ولاراقب المعبود جته البهاذيلي
= ((عيسى الرشودي العوفي))=
هلا عد ماهلت مزون الوسم ذراف=عددوبل ياعيسى صدوق المخاييلي
وعددمن يزور الطائف لجوها مصطاف=وعدد مايصب الكيف بصفر المعاميلي
بخط لفاني مرسله مكرم الضياف=عزيزعلي ومن رجال مشاكيلي
سلمت وسلم من وصل الخط يالعراف=وباكلفه مندوب يوصل لك القيلي
انا عرف ابوتركي بفعل المكارم ناف=كريم السجايا للنشاما مداهيلي
لكم بالفخر منزال ياخلفة الاشراف=كسبتواه ياعيسى بدور المفاعيلي
من معطرة يوم اللقا شذرة الاسياف=صناديد حرب ليمتطوا صهوة الخيلي
سؤالك جوابه عل يلطف بنا لطاف=انا شايف ماشفت يالقرم في جيلي
لنا كم سنه تمر فينا سنين اعجاف=تعبت وعجزت اجد لها اي تاويلي
سوى غزوا غربي له مقاصد وله اهداف=وياللاسف تمشي وراه المساطيلي
ضعاف النفوس اللي لهم بالخنا ميقاف=مامعه امر تامر لابسات الخلاخيلي
تحت رايها يمشي على ماتبي ميلاف=ضعيف العقل لوكان جسمه جسم فيلي
وهن بالمعاصي يابطل مسرفات اسراف=عبايه على كتفين وبالكف منديلي
ولاعم كل البيض فيهن بنات اعفاف=اخص اللي تدوج نهارمع الليلي
وموضوعك الثاني ترى بالرجال اصناف=بهم ناقص وفيهم رجال حلاحيلي
وشوري تجنب خوة الخايب البلاف=لونه قريبك مابقربه محاصيلي
ترى اهل الردى لوكان تلبس ثياب انضاف=قلوب العفون السود دايم مغاليلي
وخلك مع اللي في دروب الفخرنواف=فهيم الرجال وكيفه البن والهيلي
وترى القارب لياعام يغرق بلا مجداف=وشديد العواصف يغرقن الاساطيلي
تقبل سلا م جاك ببيوت كالاصداف=مردا على اللي معه تحلى التعاليلي
وعددماترتل سورة الكهف والاعراف=على المصطفى صلواكما الجدي واسهيلي
= (( ضيف الله صالح فرحان العنزي