ديوان الشاعر/ سعد المحمدي

قصيده وجهتها لشاعر محمد عبدالله البدراني

يامحمد المسرحيه بان مخرجها=ومعدها مع جميع اهداف عوانه
عرفت سبار الاوس وكلب خزرجها=وشعيل داري من اللي يكرب أبطانه
أسكوتي اللي مضى ماودي أحرجها=ياعل راع الخطاء تنهاه خلانه
واليوم شلفاي مسمومه وأبا أدرجها=من فوق روسٍ من التطبيل كبرانه
أشوفها لي صفر الخيل تسرجها=اللي على مهرته واللي على أحصانه
ناسٍ على روسها بقعى تدحرجها=تفكر ان القنابل تشبه الدانه
ياهون مدخالها ياصعب مخرجها=شله على مبعدين الحوم شرهانه
الفين صاروخ مايشكى تعرجها =شحنتها لطلب خانه بعد خانه
وجهة لشرق يامحمد بوارجها=الصين ناوي بحرقه قبل يابانه
من غيرشهبٍ تزاحم في مدرجها=عند الطلب لارقص لشر شيطانه
ياذا الزمن فيك يامكثر خوارجها=كلن علينا يحاول يطلق ألسانه

ردالشاعر محمد عبدالله البدراني

المسرحيه يابو تركي امتفرجها = يضيق منها اللبيب وتزعل اقرانه
الضيقه اللي عسى ربي ايفرجها = وادنى المحامل الوجه الله سبحانه
وبعض العرب لو سكتنا مانهرجها = اشوى لنا لا تجي الغلطات بميانه
وان كانها يمنا هبت نيارجها = واقليّل العرف ماكفّاه سفهانه
اضرب على الروس في شلفاً مزارجها = مسمومةٍ وسمها من فوق حجانه
ولا كبرت الروس يامكثر ترجرجها = وعلاجها تحت ماطى الرجل منهانه
ومن شاف ماعاف ماوالله ايعرجها = من شاعر ٍ تعرف الشعار نيشانه
كم معترك والعداء دايم مضرجها = بدميها والفعايل دوم برهانه
والعشر والوتر ماغرت مخارجها = اخذت معها شهر والنفس طربانه
ولاضر بنت العرب الا تبرجها = ومكاسر الطيب معها ريح ريحانه
احسب حساب العوارف قبل مارجها = ومن شاف نفسه علينا اليوم حقرانه