حقوق المرأة باللهجة الحجازية

قال ايش حقوق المراه

موضوع باللهجة الحجازية ويستاهل من يقراه

قال إيه ... حقوق المرأة .. قال

ما يرفع ضغطي شَي زَي كلمة حقوق المرأة .. وبالذات في السعودية .

وهادي المشكلة طلعت متى؟ بعد 11 سبتمبر ... سبحان الله .. يعني كانوا

من ألف وأربعمية سنه نايمين .. وفجأة كده صحيوا وقالوا: وه ياندامة .. إيش هادا؟

أتْـرِنُّو إحنا لنا حقوق؟! مادام كده ... الإنتخابات البلدية ليه ما نشارك فيها؟

وليه ما نروح هناك ونرقع بالصوت؟

يا أختي حلال عليكم البلدية كلها .. يعني إيش تبغوا تسووا؟ تحطوا ضوابط

إصدار الرخص لمحلات الحلاقة مثلا؟ والا تناقشوا سفلتة الشارع اللي يودي على

بيت أم إبتسام؟ والا ليه الشارع الفلاني ما فيه كوفيرة مغربية وكل اللي فيه

مصريات؟ يا أختي ريِّحي راسك .. اذا كثير من الرجال ما سوُّوا حاجه .... بالله

عليكي حتسيبي بيتك وعيالك وشغلك ... عشان تناقشي مشروع إنتخابي؟

هادا من تمام الفضاوه.

طيب قولوا لوحْدَه زواج أختها الليلة: بلاش تروحي للكوفيره اليوم يا مدام وتعالي

نناقش حقوق المرأة أو نحضر المجلس البلدي و نتخذ قرارات مهمة ..

وأترك لكم جوابها .. إيش يكون ؟؟

أما عن حقوق المرأة في السعودية .. فياسيدي الست هنا لها حقوق وواجبات

ما تتنازل عنها. مثلا: في بلدان كثير عربيه وأوروبيه تلاقي شحط طويل عريض

جالس في الباص ..وقدامه وحده في الشهر التاسع واقفه على رجولها وشايله طفل

تاني على كتفها ... إن الشحط يتحرك؟ .. أبدا...إن الثور يحس؟ ...لايمكن.!!

لكن هل يمكن يحصل هادا في السعودية؟ أبدا .. واللي يبغى يجرب ... الطريق قدامو ....

يا عمي العملية كلها دلع حريم في دلع حريم .. رايح أعطيكم بعض الأمثلة وقولوا لي

مين اللي آخِد حقُّو بالكامل وزياده؟ وهل عندنا المرأة متساوية مع الرجل ..

والا هي أحسن مِنُّو؟ قال حقوق المرأة .. قال.

منظر عام

رجال محترمين زي الورد واقفين أمام صراف في بنك .. وتِجي أختنا في الله

(اللي يقولو إنها مهضومة الحقوق) تتقدم للصراف مباشرة ولا على بالها من الطراطير

اللي واقفين من ساعات .. وبعضهم مستأذنين من عملهم. طيب ليه ما توقِّف تِمسك

سِرا ورا عشرين بنغالي... وثلاثين باكستاني... وخمسين سعودي... واثنين معقبين

معاهم شوية فواتير مقاس إكس لارج .. وإذا أحد كلمها وقال لها أتفضلي يا أختي

ترد عليه وتقول: لا، معليش. المرأة زَيّ الرجال .. خليني في الطابور .. زَيِّي زيكم؟! ...

ليش ما تقول كده؟! ... والا هي تماحيك وبَس! ونفس المنظر في الجوازات ..

والأحوال .. والتأمينات .. ويقدر أحد .. يقول إنه من ظهر أبوه .. يفتح فمُّه؟ ...

على طول يسمع العبارة الشهيرة .. ( عيب عليك .. إنت ما تستحي؟ .. هذه حرمة...

إنت ما عندك أهل!)) ..ويضطرالراجل إنُّه ينكتم ويسكت .. بل إن المرأة تشفع للراجل

جوزها عشان يتقدم على الرجال الباقين. في المطار .. مثلا .. ما تشوفهم يطلِّعوا

العوايل أوَّل .. وبعدين بقية الركاب؟

قال حقوق المرأة .. هه!

اقتصاديا

شوف الراجل... السبع... الغضنفر... المفتري...له ثوبين أو ثلاثة في السنة ..

يروح بها العمل، ويحضر بها عزايم وزواجات، ويقابل بها كبار المسؤولين،

الخ، الخ، الخ. والمرأة بسلامتها .. بقيمة أدوات مكياجها فقط... تقدر تفتح محل

خياطة رجالي محترم. ويا ريت تحط من مكياجها في البيت .. لأ. دا بَس للخروج ...

وقيمة صباع روج والا علبة بودره تساوي قيمة جوال جوزها ... وكمان ازيدك

من الشعر قصر .. مو بيت ... من حقوقها فستان لكل فرح... و مكياج... و

كوفيرة...وجزمة ..وشنطه. وكمان خُدوا هادي .. سابع بنت عمي ... ملكة أخت

جارتنا .. ولازم هديه ... واللطخ يدفع ... مو مهم الفلوس جات من فين ... المهم يدفع ...

والدنيا ممكن تنقلب على الراجل واللي خَلَّفوه علشان موضوع (مهم وحيوي)

زي كده ...

قال إيه! حقوق المرأة.

نفسيا

الزوج مطالب يكون أربعة وعشرين ساعة رومنسي ومبتسم، ولا يبقى جلف وإبن

ستين في سبعين. ويعني إيه عنده مشاكل في العمل؟! والا أقساط متأخره؟!

والا فواتير؟! والا مقاضي ما يعرف كيف يجيبها؟! مو مهم .. واجب عليه إنه يرجع

من العمل للبيت مروِّق ومبسوط وبَس .. كإنه كان في شرم الشيخ .. والست بسلامتها

من ساعة ما يرجع من عملو .. وقبل ما يفصخ حوايجو: شوف بزورتك

( لاحظوا .. بزورتك) طفَّشوني .. إيش رأيك نغير غرفة النوم؟ التلفون ما فيه حراره ..

جاتني رساله على الجوال يقولوا الفاتوره طلعت .. أَلحق سّدِّدو قبل ما يوقفوه

عن الخدمه ... ... ... .... ومع هادا كُّلو ..لازم يبقى رومانسي.

بينما هي وبكل سهولة تصحى بسلامتها في الضُّهر...وتجد الكارثة الكبرى....يوه ...

ما عندنا صلصه...وبكل رقة تتصل...ألو ألو ..أبو خالد موجود؟ ممكن أكلمه لو سمحت؟

ألو .. إيوه... أنا .. حتكون مين يعني؟... المهم .. جيب معاك غدا ... ماهو إنت يا فالح

نسيت تجيب صلصه معاك أمس. ولإنه موفاضي.. و قرفان من العمل.. يصدق المسكين

إنه هو إللي نسي ويقول بكل شجاعة ..... طيب.


وفوق هذا كله آخر السنه: طفشانه ...فين حتودينا ...والله بنت خالتي راحت أمريكا ..

وبنت عمي ما تصيف إلا فْ أوروبا... يا عيني علينا إللي ما نروح غير يا مصر ..

يا سوريا ... والسنة اللي غيَّرنا فيها .. رحنا ماليزيا.

وفي رمضان: تعبت ..أوف ...إنت داري عن حاجه؟ أنا أبغى خدامة... أنا خلااااااااص ..

ومن ثالث يوم رمضان ...مقاضي العيد من جده ...أختي جابت ملابس لها ولعيالها ..

إيش أقولَّك بس ... وخُد مشاوير لليييييييييييل ... والراجل المسكين لما ينزل السوق

مع مرته ما يقدر يشتري ولااااا شَي لنفسو، لأنو طول الوقت ماشي وراها من

دكان لدكان، وشايل زنابيل إلين ما كتفو يتخلع. وهي تطالع فيه وهو يتطوَّح

من ثقل الزنابيل .. ولا تقول لُو فزعه .. حتى لو بالكِدِب. وآخرتها بعد ما يرجع البيت

تقول لو إنه لِسَّه ما أشتريت ملابس العيد!!!!!! وإذا فكَّر ينزل السوق لحالو عشان يشتري

شي لنفسو ... على طول يكون مشبوه .. إيش ينزلك لوحدك وسط الحريم؟ ..

طيب إنت مو كنت معايا في السوق .. أحد قال لك لا تشتري؟

قال إيه؟ .. حقوق المرأة.

شرعا

المرأة لها حظ من أبوها .. وحظ من زوجها .. هادا غير أمها .. وأخوانها .. وأبناءها ..

والراجل مطالب إنو هو اللي يصرف عليها مهما كان عندها فلوس.

ثانيا: الرجال لازم يروحوا للمسجد خمس مرات في اليوم .. جمع وجماعات .. حر وبرد ..

ليل وصبح .. لازم يروحوا ... بينما الست تصلي تحت المكيف .. في غرفتها .. وأجرها

زي الرجال تماما ... ياعيني .. يا عيني .. والله الإسلام أعطاكم كتير .. وياريتو يِبان

فيكم.

إجتماعيا

الست كل أسبوع تخرج عند صاحباتها وما ترجع إلا متأخره .. وطبعا جوزها هو اللي

يوديها ويجيبها .. (يعني تبغاني أروح مع السواق في هادا الليل؟!) ..

وسعادتها ما تبدأ تتمكيج وتسرح شعرها إلا بعد العِشا .. وكل شويه تقول :خلَّصت ..

وهي ما سوت شي لِسَّه .. والراجل الغلبان جالس على أعصابو يستنيها تخلص ..

أخيرا تقول لُو: وي! إنت ما نزلت السياره؟ .. وَي .. هيا عشان لا نتأخر. المسكين

يجري في الدرج (عشان ما يأخرها) .. ويشغل السياره .. ويستَنِّي بسلامتها مو أقل

من ربع ساعة حتى تشَرِّف .. وطبعا ممنوع يقول لها: (إيش أخَّرِك؟) والا يا ويلو ..

وبعد ما يوصل 00


مقال للدكتورة : ليلى صالح عزوز

ههههههههههههه

الله يعطيك العافيه ويسعدك ياقمر ويسعد الدكتوره ليلى عزوز

شخصة الدواء ووصفت الدواء باسلوب شيق ومميز ومسلي وبنفس الوقت عملي

صراحه قمة الروعه والرقي ربي يسعدك ياقمر طيبه

شاهد ماشفشي حاقه دحنا غلابا

يالله بنصر(ن) يشيد فوق ويبنا=تنصر رجال(ن) مهشمتن جماجمها

من مطارق السيدات بكثر الطلابات
شكرا جزيل ياقمرطيبه يانصيرة الرجال وتقبلي جزيل شكري

قمر طيبه
موضوع رااائع جدا
يحكي واقع المرأة الحجازيه
اللي آخذه حقوقها كامله من قبل
ماتنشأ اصلا حقوق الانسان
سلمتي على هذا النقل
كل التحايا والتقدير
بن دواس

موضوع رائع تستحقي الشكر عليه وبصراحة الرجال حالهم يبكي بس مو كثير تمنياتي للجميع بحياة زوجية سعيدة ...الله يعطيك العافية ياقمر طيبة..
تقبلي تحياتي..وله قلبي،،

بعيدا عن الموضوع

شفتُ يا اخواني واخواتي الاسلوب اللي كتبت به الدكتورة ليلي عزوز

والله انه اسلوب علمي بحت رغم شعبيته اللفظية

يفهم مقصده ومحتواه المتعلم والغير متعلم

ويحفظ ويرسخ فالاذهان من قراءته لمرة واحدة دون التكرار لفهمه

بعيد عن التكلف والرصد باسلوب نحوي معقد


وصلت فكرتك يا دكتورة ليلي عزوز

وتحية الى براعة وصولك لفكر المتلقي



وتحية الى الاخت قمر طيبة على طيب وحسن اختيارها لهذا الموضوع

جريح الفرقا

أسعدني تواجدك كما أسعدك مضمون المقال

تقبل إحترامي أيها الشاعر

كن بخير

الشاعر مضحي بن جمران

لا والله لاأنتم غلابه ولاشئ

و إن جيت للحق الدكتورة بالغت شوي

و صح نقلت المقال عشان أعطيكم فرصة تعيدوا النظر

لكن الأكيد أني نصيرة المرأة فقط

والرجال الله يخليلهم الرجال



تواجدك إثراء للمتصفح

كن بخير

بن دواس

المقال باللهجة الحجازيه ولكن المقصودة المرأة السعوديه بمختلف المناطق00

و حصول المرأة على حقوقها دليل طيب و كرم وليها أيا كان اب او زوج او اخ00

فالكريم من أكرمها واللئيم من أهانها00


إضافتك أضاءت متصفحي

كن بخير

وله قلبي

إطلالتك إشراقة غاليتي

بس صدقيني حالهم مايبكي ولاشوي

و آخذين حقهم ثالث ومثلث بعد

لا تحزني عليهم 000

ماينخاف عليهم !!


دمت بخير 00وله