ديوان الشاعر// حمود محمد العامر الحنيني

قصيده بمناسبة الحفل المقام بضيافة
نايف ابن عواد ابن جديع الحنيني وجماعته
لتهنئة الشيخ
نواف ابن غالب ابن سليمان الحنيني
لتعيينه رئيس مركز غسل
ونسئل الله العلي العظيم ان يوفقه لخدمة
الدين ثم المليك والوطن

يامرحبا ترحيب الاوطان بالسيل =في حفـلة نفـخر بها وانتباها
تنساق سوق المطيبه والفناجيل = تضفي على الحضار واللي دعاها
الذ واحلى من طعم شاطي النيل =واحلى من الشهد المصفى حلاها
ترحبتة باسم الرجال المشاكيل =أرجال يشرف فعلها مع نباها
مقدامهم زيزوم نايف على الجيل =مشيخته بَسَمَه مُوثق عراها
وريث عود ماعلى اسمه مداخيل =عواد رووس النايفات إعتلاها
ابن جديع مرجح الوزن والكيل =*بالطيب يوم الناس صعب قراها
ولايهون شيخ قلطوا لجله الحيل =*شيخ طمح للنايفات ورقاها
نواف بن غالب خيارالرياجيل =اللي رفيع بالوطن مستواها
من رووس قوم بالمواقف حلاحيل =جزل الفعول الكل عنهم رواها
تاريخهم معروف جيل بثرجيل =عند اللوازم وقت دورة رحاها
ساس ومقرالطيب ذخرالمشاكيل =من لابة يسعد بها من نصاها
مبروك يانواف جمله وتفصيل =على الثقه وانت اهلها وتحماها
ثقة ملوك للهدايه دواليل =كواكب حلت بعالي سماها
اهل العقيده والسيوف المصاقيل =امجادهم بالمجد كل قراها
بضلالهم مافيه عيال إتعيل =قضوا على الفتنه وجثوا نماها
مكسب ارضاهم للنشاما محاصيل =ونواف نال من الشرف منتهاها
نهج الحنيني مايجي فيه تاويل =واضح وضوح الشمس ساعة ضحاها
فيه الوفى بالعهد وقت النوازيل =وفيه الشجاعه والكرم مايضاها
ومثله يمثل لابته خيرتمثيل =قوس السعد بيدين رجل براها
وازكى الـخـتام بريــحة الـعـود والهيـل =على النبي الهاشمي مصطفاها

اللهم صلي محمد وعلى آلة وصحبة وسلم

هذه الابيات قلتها وسمعها الشيخ/ ناصربن محمد بن مريخان الجميلي فأسماها "الولاء والبراء"
اقول فيها

احب بعض الناس لوما قرب لي = واكره قريبي لاتخلا عن الدين
واحزن لياقالوا على الشين مبلي = وافرح ليا مني لقيته على الزين
اللي يبيع المسك لوما وهب لي = القى معه من ريح مسكه رياحين
واللي يشب الكير لوماعطب لي = ماضني اسلم من سنا كيره الشين
والمنحرف منبوذ لوينتسب لي = ماله موده بالضمايروتمكين
والملتزم بالدين يزداد نبلي = وايضا محبه عند ربعه والاقصين
من حبه الله دله افجوج سبلي = واسعد حياته بين ناس(ن) محبين

رد ثناء للأخ العزيز/ مشعل بن مبارك المغيري العتيبي

عزالله انك وافين يابوهاني= لكن انا يامغيري كيف ابوفيك
انانخيتك يوم عمي نخاني=وبذلت مجهودك عسى الله يعافيك
معروفك الاول تبعته بثاني=وملكتني بالطيب ضمن المماليك
ولاهي غريبه فزعتك يالحصاني= من صلب عود (ن) بالمراجل مربيك
ومن لابة(ن) مقدارها مايهاني=عتيبه الهيلا عريبه مجانيك
ذباحة الحايل كبارالصياني= لطامة العايل تفك الشرابيك
لهم على العليا صروح ومكاني=فزعات طيبهم عن الناس تغنيك
وانته حفيد مشيدين المباني= على الوفى والجود ترفع مبانيك
مني لك البيضا براس البياني= ياطيب المنسب حميده مساعيك
أقبل هديه صادقه من لساني=ببيات شعر(ن) يالوفي قلتها فيك
تعبيرعن مابخاطري يابوهاني= والا الوفى يامغيري ماقدر اوفيك

هذه الابيات لها مناسبه قلتها اشاده بالأخ العزيز/منصوربن محمد الفريــــدي
اقول فيها

الشعر ناقص بليا شعور=مايرفع اللي يرهمله
والله ماشهد شهادة زور=ولا جمل اللي ماهي جمله
المدح يستاهله منصور=يستاهله قايد الحمله
حر(ن) علا نايفات القور=به كل الاوصاف مكتمله
طيب الفريدي ماهو محصور=هداج راهي ماهوثمله
كل القبايل عطاها دور=ماخص طيبه على شمله