@ كل الجماعه @عضيب بن هليل

بسم الله الرحمن الرحيم
هذه قصيده قلتها في مناسبه لقبيلتي في حل قضيه داخليه وكان على راسهم الشيخ / محمد بن عبدالمحسن الفرم والذي كان الاكثر اهتماما وسعيا للاصلاح في هذه القضيه حيث تكللت مساعيهم ـ ولله الحمد ـ بالنجاح بفضل جهودهم الحميده وكريم خصال المعنيين بها 0 وطيب معدنهم 0

بسم الكريم اللي خلق كل الاجناس=خلقه كثير وكافله عن ضياعه
اللي عزل نور النهار من الادماس =ربٍ سمك عرش السماء بارتفاعه
هاض الضمير ودق به مثل الاجراس=امهل طواريق المثل باندلاعه
عن اذنكم ناخذ مع الشرح مرواس=ابي اتحدث قدمكم ربع ساعه
ترى المثايل وصفهن صفر وانحاس=وفيهن ذهب ياعارفين البضاعه
ورجي عسانا بالمثل ناخذ الكاس=وقافي يشوق المهتوي لاستماعه
يامرحبا ترحيبةٍ مالها اجناس =باميرنا واحضور كل الجماعه
امير من ساسٍ تسيس على ساس=بدر ينور جونا في شعاعه
يا أبن الشجاع اللي للاخطار دواس=شريدة الفرسان سبع السباعه
بالسيف ينطح لابس الدرع والطاس=كم فارس يحذي جواده اقلااعه
فيه الشجاعه والكرم ماله اقياس=ذباح جل الذود وقت المجاعه
ياحرب ياللي جمعكم يرفع الراس=الله يوفق جمعكم باجتماعه
ياريف من حسه من الوقت حساس=حمله ثقيل وبه صواب الشناعه
حي الرجال اللي بهم قوة الباس=اللي منازلهم طويل الرفاعه
ترحيبة من قلب ولسان واحساس=دافع وفاء مالي وراها طماعه
يدفعني الواجب وانا اقول لاباس=الحر له عند اللزوم اندفاعه
عسا المساعي ماتعود بالافلاس=عندي على حسن النتيجه قناعه
ياللي مواقفكم جديده ودراس=ياهل السلوم الطيبه والبتاعه
اول سلفكم يوم دقلات الافراس=حاشو مقاليد الشرف والشجاعه
حرب الحريبه كان للحبل مساس=عدوهم دايم وقلبه زعاعه
دايم لهم في ديرة الخوف عساس=ويدفع لهم بعض القبايل ارتاعه
وحاضر سلفكم به شهامه ونوماس=والطيب يبقى للنشاما وداعه
يرجيكم اللي بالمهونه والاتعاس=لازال يرجي سعيكم واتساعه
تذرف دموعه والمعاليق يباس=ورعٍ يتيم وراح قلبه رعاعه
بين الضلوع اللي مثل لون الاقواس=قلبه يلوج ويلتفت للجماعه
يمسي ويصبح في مذله وهوجاس=ماعنده الانظرته واستماعه
غير الجدار وصكة الباب حراس=ومن غيركم يرجي الضعيف دفاعه
ياهل الحموه والمروه والاحساس=ماعند مجروح الضمير استطاعه
من خلقة الدنيا ترى الناس بالناس=والذيب ماياكل شرايح اذراعه
يالفرم حان الوقت والوضع حساس=يرجيك من طول عناه ونزاعه
عليك بالعلياء تراها هي الراس=اقولها من كل قلب وبراعه
واللي على يمناك وايسرك جلاس= يبون رايٍ ينقضي بانقطاعه
ودي تبت الرأي وتخلص الناس=وتخلي سبيل اللي يبي الانجضاعه
ترى المرق ماحصله طابخ الفأس=ولاينقه العطشان شرب النقاعه
لاصار مايبرز صناديد واضراس=يصير في رأي الرجال انهزاعه
الناس ماتشره على الهابط الهاس=اللي كلامه بين ضعف وكواعه
يشره على اللي به صعاطير واعطاس=رايه سديد وفيه عرف وجزاعه
وصلاة ربي عد ماهب نسناس=على نبيٍ فيه هدي وشفاعه
أفضل نبيٍ وضح الحق للناس=اللي على المسلم وجوب اتباعه

اخوكم الشاعر // عضيب بن هليل شلاح العلوي الحربي[/frame]

قصيدتك كفو وانت نوماس وعلمك غانم

الله الله الله

ياخي والله ابداع ومن زمان على هالقصائد


صح الله لسانك مليون يا مبدع والله لا يهينك


قصيده مسكته وكايفه وتستاهل القراءه اكثر من مره


تقبل فائق اعجابي وتقديري

السلام عليكم ورحمة الله وبركاته
سلمت ودمت أخوي الشاعر عضيب بن هليل على القصيدة جزله ورائعه وصح لسانك
أخوك ابوساره

سلمت ودمت أخوي الشاعر عضيب بن هليل على القصيدة جزله ورائعه وصح لسانك

صح لسانك وصح قلبك

باذخه وجميله


لاعدمناك ولا عدمنا هذا الحضور

الشاعر // عضيب بن هليل شلاح العلوي الحربي



صـ لسـانـكـ ـح ..


مــدد .. بـ .. لا .. عــدد ..

صح لسانك وبيص الله وجهك يالنشمي

كفو والله

قصيدة كلها عذوبه وجزاله ..

ومساحة للجزالة هنااا

صح لسانك يالذيب وسلم فكرك

دمت

صح لسانك وعلا شانك

والله يعطيك العافيه على القصيده الجزله

بيض الله وجهك

تحياتي