شعر الغزل

شعر الغزل ماعاد له عندنا سوق = قفلت بابه فالسنين التوالي
ماعاد له معنى ولا عاد له ذوق = ولاعاد عند اهل الشعر له مجالي
االجيل ذا ماله على الشاعر احقوق = بعد الطبيعة روحت للزوالي
راح الجمال اللي يسوق الغكر سوق = اللي ليا شفته رسخ في خيالي
سحر الطبيعة ياخذ العقل برفوق = لاشافه الشاعر تغنى وقالي
يوم الغواني فيهن الزين مخلوق = غنيت من مابي ومما طرالي
الشعر الاسود فوق الامتان مفروق = اصل الجمال الشعر مابه جدالي
والوجه مثل البدر في ليل سمحوق = اليا بدا يضوي سواد الليالي
وعين (ن) تسوق السحر من داخل الموق = ترمي برمش فوقها له ظلالي
والعنق عنق الريم والخصر محزوق = كنه من المطعوم والزاد خالي
واليا مشى ممشاه دايم على الروق= لاريض(ن) مشيه ولا هو عجالي
اليانظرته صار في القلب خافوق = من زين ربات الحسن والدلالي
فكرت فيه وللشعر هزني شوق = اقوم واقعد لاتعدى اقبالي
من زود غرمي فيه غنيت طاروق = ابدع لحوني وارفع الصوت عالي
زين الطبيعة راح ماهو بملحوق= ماعاد تلقى في الطبيعة جمالي
بعد الطبيعي جا مزيف ومسروق = ماحن له قلبي ليا مابدالي
اام الجدايل شعرها اليوم محلوق = قص الشعر عادة في كل احتفالي
والوجه جابوا له من السوق مسحوق = مكياج حطنه لهن راسمالي
خلوه من كثر المساحيق محروق = اليا انتهى المكياج بان الخمالي
والخصر من زود الشحم تقل صندوق = تشكي وتبكي من حمول ثقالي
وليا مشت فوق السهل تشكي العوق = تحذف يمين ونوب تحذف شمالي
وصف(ن) ذكرته ماشمل كل مخلوق = لازال فالدنيا عزيز(ن) وغالي
استثني اللي قدرهم دايما فوق= حرار نسل احرار فول وتالي
ولاني بعشاق(ن) ولا لي معشوق = واستغفرك يارب ياذا الجلالي

صح لسانك مليون على القصيده
والله يـعـطـيـك الـعـافيـــــــــــة

بيض الله وجهك

الشاعر / حسين مريع العبيدي

صح السانك وأعتلا شانك على هذه القصيده الطيبه من شاعرها الجزل

ومادامك جبت كل هالوصف أعتقد أنك بعد ماقفلت بابه فتحت بابه

لله درك وبارك الله فيك على حضورك الرائع

ووفقك الله

ودمت بخير

صح السانك وأعتلا شانك على هذه القصيده الرااااائعه
اشهد انك صدقت
اعجبني وصفك لبعض بنات اليوم واضحكني

لله درك وبارك الله فيك على حضورك المميز

أم الجدايـل شعرهـا اليـوم محلـوق
قص الشعر عـادة فـي كـل احتفالـي
والوجه جابوا له من السـوق مسحـوق
مكيـاج حطـنـه لـهـن راسمـالـي
خلوه مـن كثـر المساحيـق محـروق
اليـا انتهـى المكيـاج بـان الخمالـي
والخصر من زود الشحم تقـل صنـدوق
تشكـي وتبكـي مـن حمـول ثقـالـي
وليا مشت فوق السهـل تشكـي العـوق
تحذف يميـن ونـوب تحـذف شمالـي
الشاعر القدير حسين مريع العبيدي
شكلك دايم تمشي بالاسواق ههههههههههه
اقسم بالله انك حطيت الاصبع على الجرح
صحيح البعض بالمكياج الله الله وبدونه تقل حارس مقبره





وصف(ن) ذكرته ماشمل كـل مخلـوق
لازال فالدنيـا عـزيـز(ن) وغـالـي
استثنـي اللـي قدرهـم دايمـا فــوق
حـرار نسـل احـرار فـول وتـالـي
ولانـي بعشـاق(ن) ولا لـي معشـوق
واستغفـرك يـارب يــاذا الجـلالـي
كلام جميل الجمال الحقيقي والطبيعي ماجود
لكن نادررررررررررر
صح لسانك وبيض الله وجهك
تحياتي وتقديري

الشعر الاسود فـوق الامتـان مفـروق
اصـل الجمـال الشعـر مابـه جدالـي


عزالله انك صادق لكن وين تلقاه الحين



الف مليون مليون صح السانك

وعلا شانك


قلت واجزلت

لاهنت ياشيخ


وبيض الله وجهك



تحيتي وتقديري

صح الله لسانك
ولاهنت
وسلم فكرك وبنانك
دمت برعاية الله وحفظة

الشيخ الشاعر / حسين العبيدي
صح لساانك مدد بلاعدد
قصيده رااائعه وجميله

لاهنت لاهنت لاهنت
على هذه الرااائعه


ننتظر جديدك

الاخ الكريم رابح الجحدلي
الاخ الكريم فهد مطلق السليمي
الاخ الكريم مساعد الجليدي
الاخ الكريم سعد المحمدي
الاخ الكريم محمد عبد الله البدراني
الاخ الكريم بن فرهود الحربي
الاخ الكريم ناهس الشعيفاني

سلمت رؤوسكم وصحت ابدانكم ولا يسعني الا تقديم الشكر لمروركم المشرف حفظكم الله
تقبلوا فائق الاحترام والتقدير

الشيخ الشاعر / حسين العبيدي صح لسانك
كلام جميل
الله يعطيك العافيه
/
\