ديوان الشاعر عجاب صالح الحنتمي المزيني

غبر اليالي روحت ببو نواف
عزالله ان الفرم شيخ وفقيده

على النعش شالوه من فوق الاكتاف
والقبر ردو فوق راسه رديده

يالله ياللي بالمخاليق رواف
تقاه من نارن تلظى وقيده

بيته لهتاش الخلا دوم مضياف
كريم سبلا مايمد الزهيده

حفيد راع الصيت خيال الاطراف
شيخٍ يطوع روس قومن عنيده

يوم القبايل بين حاذف وحذاف
قبل التويتر والقلم والجريده

والفرم اخوه حسنى ذرى كل خواف
فارس تعرفه كل دار وبديده
عجاب صالح الحنتمي

سلام ياسلمان ريف المشاكيل
ياطيب الرفقه نضيف السريره

عداد ماهلت صدوق الهماليل
ودانها ضافي على كل ديره

يشق برقه لابرق مظلم اليل
وسيله مع الوديان يسمع هديره

غير الوفى ماله معاني وتاويل
من خوف هرج اهل النفوس الحقيره

اشيد ومدح طيبين الرجاجيل
شرواك ياسلمان ستر القصيره

حي القبال وحي حلو التعاليل
وحي الكرم والصدق حي العشيره

عيال راشد يوم وقت المصاويل
محزم ضفر يوم السنين الخطيره

كم شيخ فوقه ناقضات المجاديل
شقن عليه اثياب عز وستيره

اقبل يفكر كل دربه تساهيل
ورموه والخيل الاصايل مغيره

اكرم ساس اكرام جيلن بعد جيل
يتعب لهم راع الحوال الفقيره

مايرجع الا كل زمله محاميل
وقت المجاعه والامور العسيره

عجاب صالح الحنتمي

يابليس يالحاسد الشيطان
اخرجت ابونا من الجنه

تلعب على ضعيف الايمان
تلهيه بالفرض وسنه

خسران من يتبعك
خسران
مهما ضحك بالزمن سنه

ومالك على المتقي سلطان
لو مغرياتك لهن رنه

يحرقك بالذكر والقران
محسن برب الملا ضنه

عجاب صالح الحنتمي

مبروك ياشارع الديوان
اللي على ساس بنيانه

مفتوح لضيف والجيران
ماقفل القرم بيبانه

فيه البغاديد والرسلان
دايم على الجمر مليانه

والعود الازرق وكوم الضان
وحجاج يضحك لضيفانه

راعي هلا والكريم امعان
ماهس بالوقت ميزانه

يذكر على الطرقي التعبان
من بعد لاشاف ضيانه

بالله يارازق الانسان
مايفاجي القرم ديانه

ومن عين حاسد قليل ايمانه
مايذكر الرب سبحانه

عجاب صالح الحنتمي

يامصورين الضيف عيب ومناقيد
بدل كرامة ضيفكم تفضحونه

ماهي من سلوم العرب يالصنديد
لاتسمجون السلم لاتسمجونه

الضيف حقه كيف بيض البغاديد
وكبش ٍ من رعاة الغنم تشترونه

وحجاج يضحك مايجي فيه تعقيد
حلو النباء في واجبه تقرنونه

بعض العرب لو يذبحون المفاريد
لضيف فيها احراج لو تنشدونه

له قدمو ميسوركم يالاجاويد
راع الكرم كل الخلايق يبونه

والبخل مابه عز يذكر وتمجيد
راعيه ضيفان الشبب مايجونه

عجاب صالح الحنتمي

ياوادي الجافي سقتك الهماليل
الصبح سيل وغيبة الشمس ديمه

وانا على فراشي بعد هود اليل
ذكرت فيك الذكريات القديمه

لو ان دربك فيه بعض العراقيل
فيك اتونس بالحياه الكريمه

مدام باقي في ياونستي حيل
يكفي عن قصور البشر فيك خيمه

ماكل مجلس فيه توجد تعاليل
بعض المجالس غير ضلم ونميمه

شايب وفكري غير عن فكر هالجيل
ماهو ردى باهل الكرم والعزيمه

فقدة في دنياي نخبة رجاجيل
من بعدهم ماشوف للوقت قيمه

يالله ياعلام غيب المقابيل
يامسير الافلاك محيي هشيمه

رحمتك ياممن على الوحي جبريل
في يوم ماينفع نديم لنديمه
عجاب صالح الحنتمي

ليت اليالي ماخذة باجد سنيد
ياليتها قفت بواحد بداله

وبقى لنا باجد مثل نايف الحيد
دمث الجناب اللي يسلي قباله

غير الغنم يذبح سمان المفاريد
دايم على ناره ملايا دلاله

ومع الكرم والدين صاطي وصنديد
ويعطىي خفى المحتاج من حر ماله

ياعل له في جنة الخلد تخليد
امين يامنشي نواشي خياله

الكبد بعده كن فيها عباريد
والحال حال اللي برى الهم حاله

يالعبد خذ مني نصيحه وتاكيد
مايدوم غير الله جلا حلاله

العمر في دنياك ماهو سراميد
لابد مايلفيك قاصر حباله

عجاب صالح الحنتمي

قالو تريح قلت ماني بمرتاح
الادمي بين التعب والكفاحي

اول حياته للمواجيب نطاح
يسري قبل يطلع عليه الصباحي

وضيفةٍ والا مع الذود سراح
والا مع اللي ينقلون المساحي

وتالي حياته قالو العمر فضاح
عزي لمن عزمه تردى وطاحي

على مافاته يفرك الراح بالراح
ويمكن من الضيقه يلج الصياحي

يالعبد مايرجع من العمر ماراح
يالله حسن الخاتمه والصلاحي

عليك بالتقوى قبل تدبح ادباح
وتذري على قبرك هبوب الرياحي
عجاب صالح الحنتمي

ياناس والله ماتفيد التماني
العمر راح وماحصل ماتمنيت

ياما لها عديت راس البياني
اقبل وتقفي وتعبتني ومليت

لاما ارجعت عجاب عشره ثماني
الحيل واني والفكر فيه تشتيت

واليوم عندي يالله المستعاني
ياناس ماتسوى لها عود كبريت

عوضك يادنيا الشقى والهواني
الخالده بذن الولي حامي البيت

سبحانه اللي لاومر شي كاني
وأجال خلقه جل شانه بتوقيت

لو ضاق صدري للعرب مرحباني
وانا همومه ترهقه كل مامسيت

شكوى لغير الله ذل وهواني
بمري مفوض مخرج الحي من ميت

عجاب صالح الحنتمي

يابن زويد راعي الشاذليه
بالمجلس اللي لرجاجيل مدهال

الفجر لضيفان والاهليه
الباب فاتح والنباء يشرح البال

عاده عسى دنياك دايم رخيه
وان مت لك في جنة الخلد منزال

الطيب لك ميراث ماهو عريه
دايم ولك بالطيبه فال وعقال

ويوم الزمان الشين تطحن رحيه
ربعك هل العلياء شغاميم وبطال

ياما خذوها من بعيد الجويه
والملح قابس واحمر الدم شلال

خيالة العليا رجال الحميه
حنانيه من حرب ماضين الافعال

قلته وانا من عزوةٍ حنتميه
شجرة وفاء نذري وبالقيض مقيال

فعولهم في نجد ماهي خفيه
جدي سند ذكره مع الناس مازال

عقيد لاقاد السرب بالقزيه
في ساقته يمشي مجوخ وخيال

عجاب صالح الحنتمي