ديوان الشاعر عجاب صالح الحنتمي المزيني

كنا بدو ونحط فوق اللحم ملح
ونشره فوق البيوت المداويح

والنار نوقدها من السمر والطلح
ومن ماتيسر يالوجيه المفاليح

نخطي المخطي ونمشي مع الصلح
وبيوتنا ماقفلت بالمفاتيح

لاحجاج متعقد والا واحد ٍ كلح
واليوم ياكثر الخطا والنوابيح

يضحك على الوافين جلح ٍ ولد جلح
ماهو مضرينا على هبت الريح

عجاب صالح الحنتمي

الله خلق للادمي عقل وعيون
سبحانه المعبود سر وبياني

اغرق بغبات بالبحر جند فرعون
ونزل على المختار سبع المثاني

الرزق عنده عالم الغيب مضمون
علام مانخفيه خلف الحواني

بعده ترا بالناس داين ومديون
وقل الوفى يفاهمين المعاني

باللي ذكرته ياعرب وش تقولون
تكلمو ياطيبين المجاني

كم واحدٍ يشكي من العسر وديون
اليوم يشكيلي وبكره نساني

خرب على الطيب مخادع وملسون
وبالهرج وحقوق البشر مغلطاني

لابد مايصبح جنازه ومدفون
ماينفعه كثر الندم والتماني

عجاب صالح الحنتمي

يامذكر النايف سلام وتحيه
ياطيب السيره عريب الجدودي

يشدا لريح الهيل والشاذليه
في مجلسٍ له كل طيب يرودي

مدحي لمثلك يازبون الونيه
والله ماينقص بحقي يزودي

تفداك يامذكر وجيهٍ رديه
واهل النفاق وكل واحد حسودي

والا انت يطبخ كل راسك حميه
وكريم سبلا ياقوي العضودي

حفيد فارس مايهاب المنيه
مورد الهييب ماهو شرودي

من عزوةٍ ماهي علينا خفيه
ربعك بني غيدان سم الكبودي

لضد والا للقرايب وفيه
بلسم جروح وطيب ماله حدودي

عجاب صالح الحنتمي

مبروك ياسلطان يذخر جدي
الترقيه ياراعي المعدن الزين

يامحزمي في كل واجب تسدي
انشهد انك قدها ياحمر العين

والله لو انه بكيفي وودي
امديك ضابط ياعضيدي من سنين

المرجله تبغى صمود وتحدي
ماودها خامل وهامل ومسكين

رجال لظروف الزمن مستعدي
قوي عزمه دايم الدوم مايلين

ورجال عزمه كل يوم امتردي
وجهه يجيب الهم والحزن والبين

عجاب صالح الحنتمي

الطرقي اللي روح بزيد جمعان
يبي يجي كل البشر بالوعيده

عساه لاجاني على خير ويمان
ماني مخالف لشيم والعقيده

محبوب ماليه معادي وديان
ابغى الحياه الابده والسعيده

مرحوم ياللي ماشكو منه جيران
انشهد ان غياب مثله فقيده

عليه لو حزنت ماتفيده الاحزان
مافيه حين بعد موته يعيده

دنياك ماتمهل مشايخ ورعيان
دوراتها ياما خذت من وليده

والله ماباقي بها كاين كان
يغافل اسمع للعلوم الاكيده

عجاب صالح الحنتمي

عفا الحميدي جعل ربي يعافيه
عن قاتل ابنه طيب راس وشجاعه

راجي ماعند اللي عليم ٍ بخافيه
ماهو سوات اللي بالاموال باعه

ترفع له البيضاء على راس عاليه
راس الطويل اللي يكود ارتفاعه

من حق حرب اهل الكرم تفتخر فيه
هذا الفخر ماهو هياط ولكاعه

وتفخر برجال ٍ بفعله يحاليه
في كل يوم وكل ليله وساعه

فعله ماكل انسان يقدر يسويه
ماحط في دمه بسوقه بضاعه
يفداه من بالمال مالي مخابيه
نفسه بها للمال حب ودناعه

مافيه خير الله يمحى ذراريه
وان مات ماله عند ربه شفاعه

عجاب صالح الحنتمي

بار الزمان وشان في وجه عجاب
وماجابته سود اليالي خذنه

ماساعفت دنياه مع فعل الاسباب
ليت اليالي بالخفا علمنه

اسعالها ورقب على كل مرقاب
يوم الصبا في برد قارص وكنه

واليوم عنها بعد ماعارضي شاب
اقفيت عنها لو تجي مستسنه

اقفاي عايف للولي بالخفاء تاب
يوم احرقت دنياه هيله وبنه

فيها فقدة من القرايب والاصحاب
غالين خلف ابواب صورالمجنه

عليهم الخافق تقل فيه مشهاب
وردف ورا الونه ثلاثين ونه

عجاب صالح الحنتمي

اللي حلاله فوق تسعه وتسعين
ماسد عينه راح يطمع ببو شاه

بعض الطمع مذموم ماهو من الدين
غنا الحرير بقاف مبطي حفظناه

حط الخلاصه والهدف بين قوسين
اللي سمع قافه عرف ويش معناه

وانا جرالي ماجراله من سنين
واليوم ذكرني بها طيب مبناه

مع اختلاف اهدافها والمضامين
توافقت بطماع ناسٍ مهباه

انا علي نيه وبعض الغشيشين
حتى القريب اتحط له داه برداه

يوم الحساب ويوم نصب الموازين
ميعادكم في يوم مابه محاباه

يالله يارزاق عمي الثعابين
عفوك بيوم راجح العقل يخشاه

عجاب صالح الحنتمي

يامشعل السالم برا الحال باري
الراس شاب ومابقى بالجما سن

والشوف دوب اشوف بعض الاثاري
اهبي دنيا يوم فيها اتمعن

من بعد ماهاب الخلا والغداري
مايهمني بالدرب شهبٍ تعاون

واليوم يامشعل جلوسي جباري
سنين عمري يابيض الوجه قفن

يادوب ادل الدرب وسط الحواري
بعض الامور الهينه قبل صعبن

شكيت لك وانته بالاوضاع داري
من بعد راحن يارفيقي وماجن

شبل الوهوب مخضيبن الشباري
يوم المعارك بالجزيره تطاحن

وانته كفو مليان راسك حماري
جاذبك شايب له مكانه ومزبن

والجد لاجاله مع الناس طاري
يذكر ويشكر يارفيقي بلا من

عجاب صالح الحنتمي

ياجاري تريحيب قفن مناكيف
مع الطريق اللي قرب لنهايه

بعد النشاط وعد روس المشاريف
اليوم من رجلي تنصل حذايه

مع الكبر سكر وبعض التخاليف
امشي قدم ياجار ونظر ورايه

ياطيب الرفقه ويامكرم الضيف
قبال مثلك يارفيقي دوايه

قدامنا كم فرقن من مواليف
اما طوت لرشاك والا رشايه

دنيا دنيه ماعليها تحاسيف
دايم هواها مختلف عن هوايه

مانلت منها غير هم وتكاسيف
يالله ترحمني وتغفر خطايه

عجاب صالح الحنتمي