ديوان الشاعر سالم البشري

أبو ذياب=
سلاااام ياسالم البشري=وشفيك بالصد تجزينا
ياشيخ رب الملاَ يدري=شرواك فالقلب ياخينا
سالم البشري=
ترحيب لاهل الوفا أشـري=ما ابيـع والكـل غالينـا
والآن عطني سبب حصري=ياللـي تقلّـي مجافيـنـا
أبو ذياب=
دام البقى بيننا يسري = وافي ولا خطيت شي فينا
حبيت أنشدك وأنت تدري=ياللي على البال ناسينا
سالم البشري=
تسلم ولانسيت من بدري=علمي وصل ياموفّينا
وحرف الوفا بيننا مقري=قدرك على الراس والعينا

صقر المراقيب=
سلام والطيب عادتنـا=ولطيب الراي مهدينه
نبغى حكم من شريعتنا=فاللي يجافي مودينـه
سالم البشري=
ترحيب واسمع إجابتنا=ياكاتب الخط قارينه
الفرع يحكم قضيتنا=والشرع خليه في حينه

بندر البشري=
سلام يالكوكب الدرّي=اللي مضى له شهر مابان
أشره عليكم ولا اورّي=ولاقول من ودكم قنعان
سالم البشري=
ترحيب بالطيب متذرّي=ماتخلفه ميلة الأزمان
والشك لاتقرّبه قدري=اللي لكم يارفيع الشان
بندر البشري=
عسى البقى والهوى قرّي=بعد صدفتك مع بخيتان
كم لي صابر ومتحري=وانشد مع الناس والعربان
سالم البشري=
أكيد جو المثل يغري=بوجودكم ينعش الوجدان
والبيت يابندر البشري=معروف مايضيّع العنوان
بندر البشري=
واحرقة القلب وامرّي=يابو علي سافر الربان
اللي على ربعه يذرّي=شامخ كما عالي الضلعان
سالم البشري=
يالله اجعل له القبري=روضه وأسْكنه عالي جنان
واوصيك بالدين والصبري=تخفف لك الهم والأحزان
بندر البشري=
انا على الصبر متضرّي=والحمد لله عظيم الشان
حافظ وصايتك في صدري=ولاابيّح السد مهما كان
سالم البشري=
من وكّل الله مايزري=والحمل ماهو بسيط الآن
وانته محنك على خبري= وقت الشدايد قوي ايمان

سـالــم الـبـشــري=
مايوفي الحرف لو وصفت=كم فرحة البال ياصحابـي
تقدير مني لكـم سطـرت=بالود والطيـب ترحابـي
ســـرور الـبـشـري=
ياراعـي الوافيـه كمّلـت=في مثلك الظـن ماخابـي
أبيات فيها الحقيقه اجملت=عسى البقا واللقا طابـي
سـالــم الـبـشــري=
وافي وياطيـب ماحـررت=رداً على محتـوى كتابـي
والآن باخذ معك ان شئت=جوله وباشكي لكم مابـي
ســـرور الـبـشـري=
على السعه والرحب لاهنت=ولاهان من يسمع خطابي
صامد وعن ماقفي ماحلت=كله لاجل خاطر احبابـي
سـالــم الـبـشــري=
في عالمي بعد ماأرهقـت=نفسي أبا الحـال يرقابـي
كل ماانتشابي أمل وارتحت=تلخبط الوضع وحسابـي
ســرور الـبـشـري=
النفس فارهاقها أخطأت=حتى سراج البخت غابي
واللي يقدم نهار السبت=يلقاه يوم الأحد رابـي
سـالــم الـبـشــري=
ليتك تأنيت أو فكـرت=في حل مقنع وإيجابي
أوفيت من صد مابطلت=طبعي ولاقلت سوّابـي
سرور البشري=
على حسب مشتكاك ابرمت=جابة وسدت لهـا بابـي
كملتها جابتـي ماحتـرت=تكميـل فالقيـل يزهابـي
ماكنت اقيس ولاحسبـت=تلحقنـي الـوم وعتابـي
وانته بوسق الشداد وكلت=بالوافية نلـت الأعجابـي
سالم البشري=
اشبك عن دروبنا حولت=واخذت منحى ومجنابي
وانا عن المشتكى فصلت=وقربت لك كل الابوابي
راجع جوابك بعد ماقلت=عيد النظر وف الاطلابي
وعلم الوفا فيك مابدلت=باقي سواة الجبل ثابي
سرور البشري=
مأخـذت منحـى ولاجنبـتب=باقـي وثابـي فمرقـابـي
فا لعلم والمعرفـه هيمنـت=بأخـلأق عظمـى وأدابـي
وحزت الشرف بإمتياز وكنت=مليك كالأسد فـا لغـابـي
وتسلم ياسا لم وإذا أثخنـت=منك العفو قافنا شـابـي
ما قلتها مدح بك بـل إنـت=يا عزوتـي عـز الأقرابـي

فـــواز الـزويـهــري=
سـلام سالـم لكـم تنحـاز=يالبشري اللي على الميثـاق
ياليت قلبي من اسمـك فـاز=و البشر بشر اللقا باشـواق
ســالــم الـبـشــري=
ترحيب مني لكـم واعـزاز=ياللي علـى الطيّبـة سبـاق
وانـا فحروتـك يـافـواز=مشتاق إنتـه وانـا مشتـاق
فـــواز الـزويـهــري=
ياسالم القلب يبغـى ايجـاز=فاللي نزلبه عريب اعـراق
والباب دونه قفـل ماجتـاز=والروح فيها الرجى خفـاق
ســالــم الـبـشــري=
مـادام تقديرهـم ممـتـاز=حايز على الطيب والأخلاق
لكل شفـرة رقـم وجهـاز=تفتح لك القفـل والأطـواق
فـــواز الـزويـهــري=
دونه كتايـب لهـم رجَـاز=من حام حول الحمى عـوّاق
وأنـا مسالـم وقلبـي نـاز=رميه بلطف الصفا ورفـاق
ســالــم الـبـشــري=
سايس أمورك بِلا اسْتفـزاز=حتى تلاقـي لهـم مطـراق
ما دام قلبـك لهـم معتـاز=إسعى لهم بالقـدم والسّـاق
فـــواز الـزويـهــري=
مندوب جاهم معـاه إيعـاز=من قلبي اللي أصابه احراق
فحسن السياسه لنا الإنجـاز=وفامر التصدي بهجره فـاق
ســالــم الـبـشــري=
لا صار جاه الخبر ما جـاز=شرحك وختمك على الأوراق
إقنـع ولا تتبـع المنـحـاز=ليل الشقي ينتهـي باشـراق
فـــواز الـزويـهــري=
ياسالم أنـت لقلبـي جـاز=عطني البصيره كفاني ارهاق
صاروخ نحوي جديد اطراز=الراس ذري لصدري شـاق
ســالــم الـبـشــري=
أعطيتـك الخبـز يالخبّـاز=وانصحْك يامتابـع البـرّاق
خلّك لصيد الفـرص نهّـاز=لامن بـدا واصعـد الآفـاق

صقر المراقيب=
شاعر وله علم بالشعـار=ومن شعره الكل صفق له
ابغاه يلعب معي مزمـار=على لحن يعجبـه نقلـه
سالم البشري=
سلمت يابادع الأشعار=لك حرف فالقيل نطربله
الليل هيّا وشب النار=ياصقرنا وابدأ الحفله
صقر المراقيب=
مادمه اللعب لـه حضّـار=وجمهور محسوب من اهله
إلى بـدا اللعـب لاتنـزار=وانصير في حال نؤسفله
سالم البشري=
من غير جمهور يالبيطار=مايصلح الشي من أصله
وان شفت خالد فيده الطار=عندي له طروق تصلحله
صقر المراقيب=
جيب الطواريـق لاتحتـار=والبوص حذرك تشوق لـه
والعب على الزير لعب اخيار=لي خاطرٍ دوم رايـق لـه
سالم البشري=
هيّا استمع طالع الأفكار=قلب المعنا شكى عقله
يقول فارض علي حصار=وانا اترجّى هنا وصله
صقر المراقيب=
اذني معك تسمع الاخبار=ياصاحب فحال يشفقله
مهما تكالت لك الاوزار=اشتاك بعد الحمو فصله
سالم البشري=
المشتكى جبت لك فحوار= مفهوم ياليت ترجعله
وابغى إفادة على معيار=لاجات من شخص تنسب له
صقر المراقيب=
رجعت لديّـت بالانظـار=العلـم مانـي موافقلـه
اخطيت في وجهت الرادار=وشرواك هرجي يصدّقله
سالـم عـلـي البـشـري=
أرفقت تحقيق عمّـا صـار=مابين الاخصام و الجـأ لِـه
وانا اعرف انّك حليم وقـار=معروف والناس تحسب لـه

سالم البشري=
ترحيب من قلبي الشاري=ترحيبة الخاطر المبسوط
وان كان يسمح لنا القاري=ناخذ معه فالمعاني شوط
أحمد العتيبي الزايدي=
أهلاً ولك ردنا فالحال=والرمز واضح بدون خطوط
آنا معك وان طرى طاري=القاف حسب الطلب مسفوط
سالم البشري=
مع هاجس الشوق مشواري=صابر وقلبي عليه ضغوط
كيف اتقي واهج الناري=وبنزيمها مع دمي مخلوط
أحمد العتيبي الزايدي=
الهاجس اللي معك ساري=رحلة سفر والسفر مشروط
زوّد عزيمتك باصراري=قيس الغلا واوزنه مضبوط

سالم البشري=
في وسط الامواج والأخطار=مبحر واقاوم بمجدافي
كيف ابلغ الشط والتيار=يمشي على عكس أهدافي
بحر الشعر=
النوخذه لانوى الأسفار=يحسى المخاطر والاصلافي
وبالعزم والصبر والإصرار=اللي بعيد المدى يشافي
سالم البشري=
طالت بنا رحلة الإبحار=ومرسى الأمل يابحر خافي
ومن حيرتي تاهت الأفكار=اللي توصّل لميلافي
بحر الشعر=
إبدا خطى الميل لاتحتار=بحنكة سياسي وعرافي
وان كان وِلفك أصيل وبار=يستقبل اخطاك باضعافي
$$$$$$$$$$$$$$$$$$$$=
سالم البشري=
سالم علي يابحر يشكرك=ويقول عذبه مجاراتك
بالطيب حرف الوفا يذكرك=وتشهد بذلك عباراتك
بحر الشعر=
ياصاح من ذا الذي ينكرك=مثل الصقر في إماراتك
الجود بين الملا يشهرك=وافي ونسعد بشوفاتك

محمد سعد اليوبي=
لا تلومني يوم جيت اشـوف=الـــحـــال والـــلـــي مـسـبـبـهــا
لمست بين السطور حروف=متبـعـثـرة .. وجـيــت ارتـبـهـا
سالم البشري=
ماتلام وابـن سعـد معـروف=لامـــــن قــراهـــا بـيـحـسـبـهـا
وماظن عنه السؤال يطوف=هــل شرقـهـا جــاب مغربـهـا؟
محمد سعد اليوبي=
يا سالم اللي علينا تحوف=كــثــيـــر مـــنــــه مــجــربــهــا
أحــدٍ ليـاجـات بـــه تـــروف=وأحــــدٍ تـجـيــه بمصـايـبـهـا
سالم البشري=
مهما صروف الزمان تلوف=والحظ عيّا يجاوبها
مايظل بند الأمل موقوف=ان كان تبغى مكاسبها
محمد سعد اليوبي=
مـفـتـاح بـــاب الأمـــل مـخـلـوف=فــــي الــلــي تــدســـم شـواربــهــا
ماهو مع اللي على المكشوف=مـــا يجيـبـهـا الا فــــي غـاربـهــا
سالم البشري=
نمشي على السائرالمألوف=والطيبه حظ كاسبها
ولانرتجي للوفا مصفوف=طبايع الناس تغلبها

محمد سعد اليوبي=
أركز حيا واستعز وساق=وهلّت ثعوله على الوادي
خلنا سحابه من البـرّاق=من قبل لايبثه الـرادي
سالم البشري=
ياكثر من خايله مشتاق=ويشوف مزن الحيا بادي
ويقول ليته لنا ينسـاق=ويحط وبله على بـلادي
محمد سعد اليوبي=
لاطاب ذاك النسيم وراق=مع الحيا وغرد الشادي
نقول يا الله من الأعماق=ما يتبع البرق رعـادي
سالم البشري=
خل الأماني علـى معـلاق=متعلقـه وارفـع الحـادي
لاتنتمي للطريـق الشـاق=ويجي لك السَّوْق من غادي
محمد سعد اليوبي=
ما بالأماني يجي مغلاق=لو بأرفع الصوت وآنادي
من بعد ما لخبط الأشواق=اللي معه دعم وإسنـادي
سالم البشري=
لوكنت حاسب على المشراق=ماكان وضعـك كـذا زادي
لاتزيد نفسك تعب وارهـاق=واستقبل المسألـة عـادي
محمد سعد اليوبي=
طاب اللحن وانتهى بعناق=صادق على روس الاشهادي
وبآعود وارتب الاوراق=وامشي على شور الاجوادي
سالم البشري=
أوفيت ياطيّب الأخلاق=مرادك الطيب ومرادي
لك حرف فالشعر واستحقاق=مايجهله حي ياستادي