ديوان الشاعر \ نافع الحربي

صفحة من الماضي محا رسمهااللمس = تلوح من لمس الأصابيع ملسا

فليتها للنور بطرافها رمس = وطويتها والليل بالأرض ماامسا

مرّتبي القدرة على مجلس الأمس = ووقفت به للغد واليوم وامسا

باقي تناتيفٍ حمسها الدهر حمس = غيدٍ حمسها تالي القيض حمسا

صافحتها بمعشرقاتٍ من الخمس = خمسٍ عليهن للمواجيب خمسا

معالمٍ كانت طمسها البطى طمس = كتبٍ طمسها رايح المزن طمسا

اقفيت منها خاطري ضايقٍ عمس = أكثر من ابن سرور ضيقة وعمسا

خواليٍ للريح بورودها همس = حديث عشقٍ بين الاحباب همسا

النمر يدمي مقلته بالزمن نِمس = ونمرود عرشه طاح وافناه نِمسا

قريت بالدنيا على حاجب الشمس = حرفٍ من الياقوت بخيوط شمسا

حرفٍ غمسته في لهب ضامري غمس = حتى غمس غض المعاليق غمسا

الليل خلاّ الارض واجبالها دمس = والصوت ماله مع دجى الليل رمسا


نافع مطر المرواني

دليت مع نقادة الشعر. دلوي

دليت مع نقّادة الشعر. دلوي = اموح فيها. لا حضر كل ميــــــــــــــاح

اخترت مطروق من الشعـر ملوي = بين الغموض وبين مفهوم الايضــــــــــاح

ارقابه اللي من المواجيب علـــوي = وصد به عن كل هابط وضحـــــــــضاح

هواي من هرجه على الكبد حلـوي = شيخ المراجل دايم الوجه وضــــــــــــاح

وشوم عن خبل من لنـاس دروي = مايفرق الخســــــران عن زود الارباح

مثل الخفيف اللي به الريـــــح تلوي = نتيف ريش طار مع هـــــــــوج الارياح

هواي من يجلى عن القلــب جلوي = هواجس فيها يضيقـــــــــــــن الارواح

مطنوخٍ اصل به من النبت تلــــوي = غض الورق فيه الزهر مابعــــــــد فاح

قفر ربيعـــــي من الناس خلـــــوي = ديمومة فيها تزاويل واشــــــــــــــــباح

باطرافها قطــــــــعان الاذواد فلوي = والطير بالحان التغاريد صـــــــــــــــداح

القابها عن بعــض الاحوال سلوي = مع خوة اللي للمواجيب. نطــــــــــــــاح

من فوق جيبٍ للتضــــــاريس يطوي = يطوي حزوم الارض مسرى ومصـــباح

مع درب غيثٍ لاخضر الارض يروي = زرقٍ ربابه يتبع الريح طــــــــــــــــفّاح

مهاملٍ باطرافها الذيب ياعــــــــــــوي = دلمٍ لياليها بها البرد لــــــــــــــــــــفاح

ماتشوف فيها النور بالارض يضــوي = الا النجوم ولايح البــــــــــــــرق لا لاح

قفرٍ عن الاوناس بالارض مــــــــدوي = شرقٍ من الهامل ورى عروق الاسياح

خبّة يباريـــها نوازي وحـــــــــــــنوي = يرسم بها الـــــــــزاهر براويز ووشاح

نافع مطر المرواني

والله ماتبع واحد مايبيني


والله ماتبع واحد مايبيني = لا والذي يسجد له الكون كله

رزقي على اللي يرزق العالميني = الواحد اللي كل صعبٍ يحله

انا ليا شفت الخوي المهيني = اناني الرفقة خبيث الجبلة

قطعت حبل الوصل بينه وبيني = مالي ومال أهل الطبوع المملة

غني عن صحبة خطات الدويني = اللي بقلبه من. اهل الطيب غلة

خويي النشمي هوى الغانميني = شيخ المراجل والوفا. عادتله

شهمٍ على دروب المروّة يعيني = من شبته مثل المراية اسجلّه

مايغيّره طول الزمن والسنيني = مثل الجدي بالافق هذا محله

دايم على للقطب الشمالي يبيني = بقصى الشمال وكل. تايه يدله

ياحبني لهل الوفاء واليميني = اللي. عليهم يشهدن الأدلة

رجال الشهامة والكلام الرزيني = هم كاسبين الطيب دقه وجله

ويبغضني لهل الردى الفاشليني = شذابة المقفي حمير الدملّة

خطوى الخبيث معذرب الطيبيني = يبي الوجاه ومعدنه قاعدلّه


نافع مطر المرواني

قلت الصحيح وراعي الطيب محمود

قريت ابيات للشاعر فالح عبيدالله ابن ظفر ذكر فيها اسم العبيد ابن رفدان الله يغفر له فا رجعت بي الذكريات ٤٥ سنة فاتذكرت ذالك الزمان ومن عاشوا فيه ومن ضمنهم العبيد ابن رفدان الله يرحمهم ويسكنهم الجنة جميعاً :
فهاضت المشاعر في هذه الابيات :


قلت الصحيح وراعي الطيب محمود = وزودت شوقي للديار وعربها

اشهد شهادة حق بثبات واشهود = ذكرتني هاك الليال وطربها

يوم العبيد يجدد الجود بالجود = والنار من جرم الموشم حطبها

الله على عهدٍ مضاء دونه اعقود = دونه جيوش الياس تندب اسربها

اقفى كما مزنٍ به ابروق وارعود = عليه رب الريح سلط سببها

ماباقي الا رسوم واسمول واعدود = وحتايفٍ مات الشجر من لهبها

راحت مراح الريش مع عاتي النود = ماتلتفت لو المصوّت ندبها

ياونتي ونّت من الناس ملهود = من كلمةٍ شبت بنفسه غضبها

قال الصحيح وكذب القول مقرود = والسالفة طالت وطوّل نشبها

على رجالٍ دونها الدرب مسدود = عليهم سطح الارض حامض اعنبها


نافع مطر المرواني

يشوقني من ضمّر الخيل صفراء





يشوقني من ضمّر الخيل صفراء = من خيل وافين الخصايل والافعال

في ناصيتها علم الاسرار يقراء = رمزٍ لتاريخ الشجاعة ولأبطال

يما عليها يدمر الجمع دمراء = خيال حربٍ يرهب القوم لا جال

يسمر صدور القوم بالرمح سمراء = غضنفرٍ بالخيل يفعل ليا قال

عليه مع لبّاسة الجوخ حمراء = جوخة شريفٍ دونها الموت يختال

على جوادٍ تطمر الخيل طمراء = من رجدها بالارض للأرض زلزال

قباء حوافرها من الجري جمراء = سوداء البراجم والقلايد والاقذال

تدمر اقوام واتعمر اقوام عمراء = من خيل حرب مطوعة كل من عال

كأنها تسقى من الطيش خمراء = لاشافت الفرسان تجري بالاقفال

عاداتها باوّل مقاديم نمراء = تضرب صفوف القوم بقفاي واقبال

يما عليها تصبر الخيل صبراء = من دون سودٍ بالفلا كنها جبال

شرابها من صافي ألمي خبراء = وماكولها نبت المذاري اليا سال


نافع مطر المرواني

نافع مطر

هذي شوامخ عقب والوادي الذي

ارسل علي واحد من الجماعة هذه المقاطع والصور لديرة احبها , فهاضة المشاعر في هذه الابيات

هذي شوامخ عقب والوادي الــذي = تمر طلحات النعايم مسايله

يما تحت ظل النعايم من الـــــهنا = عن لاهبٍ تشوي الزواحف قوايله

نزورهن لا حترت الشمس واسربت = جيلان فردة باشهب اللال جايلة

نختار من شرد الجوازي غصيبها = ومن ما يسر الحال ناخذ نفايلة

هذي مراعيف اقمرى علها الحيا = غيثٍ من الوسمي ترزم مخايلة

يضف فردة وقـــمرى مع سنافها = ويرسي بواحات الموشم دلايله

دارٍ تذكرني اهل الجـود والوفا = وعهدٍ طواه الياس واقفا بنايلـــه

كنا بها يوم الهوى يتبع الـهوى = قدام وضح الراس تكثـــر نزايله

دارٍ قضينا بارضها جل وقتــنا = دار المروّة والكريم وجمايله

جتنا بحد السيف ومقـارع القنا = بيومٍ تقاتل بالهنادي قبايلـــــه

يشهد على ماقلته ضفـيدع الذي = تطيح من راس الشعيــرة قتايله

قعدلهم بمشوّكٍ ينثر الحمر = شره برأس الشيـخ ثارت فتايله

وقفوا وخلوا بالفلا شمخ الذراى = عقب الطمــع اعذر من الراي فاتله

هذي فعايل حرب حرابة الدول = لا رازها قومٍ عن الحق عايلة

ختمت بحروف المعاني قصيدتي = وتم الجــواب وقفل القول قايله

نافع مطر المرواني