ارسل المطيري ورديت

فهد بن عبد الله المطيري (ابوخالد) ارسل لي قصيده تعبرعن نفسها
كان لابد من الرد عليها وقد قيدني بموضوع معين بقوله العب على المعنى
والقصيده لن اعلق عليها فهي واضحه للقارئ وهي :.

ــــقال الذي لاقال يخشى المناقيد = صاغ المعاني في كلام اختصاري
ماهو كلام راح كله سراميد = اللي يجيبونه خزام الصحاري
مرددين الزين والشين ترديد = ولافرقوا بين النهار وغداري
لوكان ورع تو ما يرضع الديد = ينشر له اللي باغي باختياري
شاعر يعدونه مثل زيد وعبيد = والاسم توه جايبه مستعاري
ويمجدون ليا نشر كل تمجيد= وضاعت حقوق الشعربوضح النهاري
ياهل الصحافه حددوا كل تحديد = لازم يجي للشعر ناقد اداري
الشعر يبغى له مثل علي بن زيد = والا الحويفي يوم والا الحداري
والا العريمه جدد الشعر تجديد = اللي قصيده مثل ضرب السواري
وغيره وغيره من جميع القواصيد = اللي لهم بالشعر مفعول ساري
ناس بحق الشعر تعطيه وتزيد = يصور المعنى بمظهر حضاري
العب على المعنى عسى عمرك سعيد= حيثك بسوق الشعر بايع وشاري

هذي قصيدة المطيري والنقد مرفوع والزعل ممنوع
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ

[size="4"]وهذاردي عليه:.[/size

وصل الكلام اللي على حق ومفيد = من شاعر سواه با سلوب ناري
يامرحبا به واعتبر جيته عيد = لوهو على بعض الشواعير زاري
يقول ضاع الشعر بكل تاكيد = كنه يقول الشر لعبة حواري
ومن غيرته يبغى تدخل علي زيد = وهو يدري ان الوضع يمشي جباري
ياطيب المعدن كلام الهرابيد = لورددوه اصله كلام تجاري
لايقبله عاقل ولايمكن يفيد = مالك ومال معلقين البواري
شعر بلا معنى نشوفه سراميد = راعيه يرجي من وراه المصاري
واحد يجي شعره مثل عاكس السيد = مستشعر يسوقها ما يداري
وشعر ليا اوحيته مغثه وتنكيد = من واحد بقوة نفوذه يماري
وناس تقول الشعر لكن مقاريد = مداحة المفلس طيور المذاري
عند الزعل سبابة لللاجاويد = عند الطمع تمدح اكبار العتاري
وناس تبي تدخل على الشعر تجديد = ليا عجزوا تطري عليهم طواري
وشعر يادانه دان شعر المساريد = وليا وصلهم علم صاروا حباري
وشعر يقاد بدون شرط ولاقيد = ممجوج لو يقراه مليون قاري
يجمع وينشر والهدف منه تمجيد = سوالف من كل معنى عواري
والصحف تنشر للموالين وتشيد = يفرض ولكن صاحب العقل داري
وشعر الحداثه ينشرونه عواميد = سموه شعر وهومن الذوق عاري
ذا موجز مني ولاودي ازيد = والا القضيه وامرها سيل جاري
وترى الكلام يصاد وقت الطلب صيد = ولايدرك الطيب قليل المساري
وتوجد ارجال تفهم الشعر وتجيد = تلقا لهم في كل نادي مواري
بالسلم حلم وبالملاقا بواريد = مدنين مدمين جمال ضواري
ونته تريد ويفعل الله مايريد = ومالك وما ل المنتحي والمباري
لاينفع معدل ولا يفيد تطريد = خل البحر تجري عليه الجواري
تسلم يابو خالد من المكر والكيد = عساك تسلم من لهيب الذواري
وصلوا عدد ما سارت العوص بالبيد = على النبي وعداد نبت البراري

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

ابو خالد المطيري قصيدة جزلة تحاكي واقع ويبحث عن الحلول

ابو خالدي الفريدي رد شافي وكافي بالأدلة والحكمة والتميز الفكري

اصح الله لسانيكما وآدام عزكما

	صحــت السنتكــم دمتم برعاية الله وحفظة

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

الحب الباقي
بخيتان البشري
بن فرهود
اشكركم على الاطلاع وعلى الاطراء وكل عام وانتم بخير

صح لسانك مدد بلاعدد
وبيض الله وجهك لاهنت ابوخالد على هذا الرد الجزل
ويعطيك ربي العافيه وكل عام وانت بخير

بيض الله وجهك لاهنت يابوخالد صح لسانك ولسان المطيري على هذه الدرر الثمينة
ويعطيك ربي العافيه وكل عام وانت بخير

ابوخالد الفريدي صح لسانك ولسان المطيري

تقبل تحياتي