ديوان الشاعر محمد حجيج الآحمدي ( بقايا وميض )

قد ماتقدر تزودني جروح = وقلبي المسكين له ربن يعينه
ووعدك مبكي ولا حتى انوح =ويش يفيد الدمع من فارق ضنينه
كان لي في سلطة امجادك طموح =كان قلبي ينتظر ثورة حنينه
بالاماني فيك شيدة الصروح =والمعاني فيك كم كانت ثمينه
وبين تحقيق الاماني والنزوح =اختلط برد الصبا مع ياسمينه
يسعد الله صاحب الوجه الصبوح= يوم قفا مارحمني برمش عينه
ماخبرت اني على المقفي صيوح=لين صاب السهم قلبي من يمينه
لين قفى كل مافيني يفوح= كن طين الارض جمرن مشعلينه
من سمع قولي يحسبني مزوح = مرخصين الدمع لجله مرخصينه
هل دمعي يحسبون الدمع بوح = قلت بوحي بكتبه بدمعه حزينه
كان لي في سلطة امجادك طموح =كان قلبي ينتظر ثورة حنينه
بالاماني فيك شيدة الصروح =والمعاني فيك كم كانت ثمينه
وبين تحقيق الاماني والنزوح =اختلط برد الصبا مع ياسمينه

انا من حرب وخيرة حرب ربعي ماعليهم زود=لهم ماضي ولهم حاضر فعول رجال مذكوره
ابن عساف وبن سلطان رسو للحدود حدود=و بن مطلق حباه الله بالحكمه وبالشوره
ثلاث شيوخ من ربعي لهم فالمعضلات ورود=اذا ماصاح صايح حرب لهم رايات منصوره
من الفقره الى طاشا الى نزلة ذوي محمود=ديارا تمن الخايف مابين الناس مخبوره
اذا ماجيتها فالصيف ولا فالليالي السود=تبي تسلم بحفظ الله من وقتك ومن جوره
اعد السالفه واروي لكم قصه عليها شهود=رجال تثبت الاقوال وبين الكل مشهوره
سقام المعركه قصه قبل تاريخ ال سعود=هجدنا الترك وكن الترك صاروا فارض ممطوره
نهار ان الفضاء ولع بريح الملح والبارود=وقفا قايد الباشا وخلى الترك محشوره
وبعد المعركه صار الحبل في يديننا معقود=نأمن كل خلق الله ولو له روح مهدوره
ومن لايحفظ التاريخ مايسلم من المنقود=سوات اللي يجي فاالبحر علمه فوق بابوره

سمه مثل مانت ناوي تسميه=الحب واحد والاسامي كثيره
القلب منزاله وهو يحتمي فيه=والعين هي اسباب قلبك تثيره
لو طعتني غض النظر لاتراعيه=يسهرك ليلك والمشاعر سهيره
ينحلك مثل العود لاجيت تبريه=والعود لانه زان يسهل مصيره
ماينجبر كسره ولاعاد تسقيه=والسوس في جنابه بناله حظيره
من يسلك دروبه تاهت خطاويه=مايعرف ان الدرب دربا عسيره
لايهتني بالزاد والفكر مشقيه=يصبح ويمسي فوق خيلا مغيره
مرات تنزل به ومرات تعليه=واللي سواتك لاسلاح و ذخيره
قالو قبل من صابه العشق يبكيه=ياجعلها تكون الأولى والاخيره

الغراب أليا تعلى صار صوته عالي= يزعجك بالصوت لامنك سمعته ينعق
حسبي الله لايفيد ولا يجيب ريالي= ودك انه في علوه قبل ينعق يشرق
لايصيد ولايعرف الصيد والمنزالي=عيشته من كل ميته من لحمها يسرق
الله اللي وزع الحكمه ونعم الوالي= ماخبرنها تجي مع كل من يتشدق
هذا قولي وخذ قياس القول ع الرجالي=كم عرفنا من رجال فا الجموع تفرق
ماتخاف الله ولا تسمع ندا العقالي=فالنميمة والوشاية ألسنتهم تنطق
لايعرفون الحقوق ويرخصون الغالي=يحسبون الناس تسمع حكيهم وتصدق
لوعطينا او خذينا منهم الاقوالي= نشهد الله والعباد ع الحديث المرفق
يحسدون الناس فا اول علمهم والتالي=جعل كل اللي فعوله مثل وصفي يغرق
في بحور(ن) مالها مقياس بالاميالي= واخر الدنيا جهنم في لهبها يحرق

اليا بغيت ام لعيالك تزوج احمديه=عاصمة والعاصم الله ماتجيك الا بطيبه
تحفظ عيالك وبيتك لو عددهم فوق ميه=وان تغير بك زمانك تحفظك ماهي غريبة
الحلا والزين فيها والكرم بنت اجوديه=واتقى فيها سجيه مثل عودا فاح طيبه
النساء مثل النجوم العاليات السمرديه=شي مانعرفه منها وفيها شي ينسريبه
احمديه ماتربت على الحضارة الهامشية=علمها من وحي ربي في المحافل تدعيبه
تربيتها طاعة الله والرسول وهي صبيه=ثم طاعة زوجها في شبته ولا في شيبه
سرها في بيتها ماينعرف منها خطيه= ومن تعثر به نصيبه عنها يبشر بالف خيبه

العيون السود من فوق اللثام= والجفون وظلها منظر عجب
والعابة مخصره ترسل سلام=والكعب في رجولها يطرب طرب
والخصر كنه من اعواد البشام=مالت افنونه مثل عذق الرطب
لاقصيره ولا طويله في القوام=رمشها يسحرك لونه والهدب
ملفته لو انها وسط الزحام= النساء فضه وهي معدن ذهب
مايلام اللي سواتي مايلام=لو تغير في ثواني وانجذ ب
اقبلت يمي وانا انوي الكلام=قلت خافي الله في نار ولهب
ناظرتني بطرفها قالت حرام=تعرف اللي يقول حامض ياعنب

قالوا علامك طار عن عينك النوم=قلت البلد نور بمقدم حبيبي
على البحر في فندقن خمسة نجوم=في دوره السادس نزل به طبيبي
ارسل رساله قال واين انت ذا اليوم=قلت انتظر موعدك جعله قريبي
قال الوعد بيني وبينك على الدوم=قبل الغروب ولا تجي في المغيبي
قلت ابشر بسعدك وذا علم معلوم=أتشوف مني كل شي عجيبي
رحت لوعدها أسابق الخيل والقوم=والشوق يسبقني ويلهب لهيبي
لابس عقال جديد وشماغ وهدوم=كني في ليلة عرس من كثر طيبي
مثل الصقر لانه على النايفات يحوم=طلعت فندقهم ولاحدن دريبي
وقفت خلف الباب خايف ومكلوم=اطرق بيمنايه والاخرى في جيبي
سمعت صوتا من ورى الباب مكتوم=يضحك وانا بالحيل قلبي صويبي
شفت الجمال اللي من الله مرسوم=ياليتها تبقى معي من نصيبي

محدن يموت يااهل الحياة ناقص عمر=كلا مصيره للفناء غصبـن يمـوت
كم غيبت دنياك مـن نـاس وبشـر=علو مبانيهـا وكـم لبسـو بشـوت
اختر طريقه تسعـدك قبـل القبـر=ترتاح في قبرك ولو هو وسط حوت
في مامضى وين أهل مدين والحجـر=أخبارهـم دلـت عليهـم والنحـوت
راحوا ولا يبقى لهـم غيـر الأثـر=ويش تنفع الاثارلو هي بنـك نـوت
سارع قبل تسمع نـدا ويـن المفـر=ماينفعك في حينهـا غيـر القنـوت
اسمع نصيحه وخذ من الدنيـا عبـر=العاقل اللي يتعـض منهـا ويفـوت
يابـن ادم الله ماخلقـك الا لأمــر=اعظم مـن الدنيـا وتشيـد البيـوت
اكثـر مـن التسبيـح لله وشـكـر=اللي رزقك العقل والمظهر وصـوت
ويش يعذرك لاجيت في يوم الحشـر=تلقف شمالك كل فعلك وسـط نـوت
فيها سواد الوجـه وتفتحلـك سقـر=لاواعذابـك كـان ماتبـت بثبـوت

لاجات عيوني بعينها تجفل وتركض بالعبا=هذا زمان اول تحول ياسعد من له رشا
حسبي عليكي مايجيكي خلاف يابنت الضبا=من شاهد عيونك تصلب كن كاسيه النشا
اقفت وهي عجلا تهز المتن مع ريح الصبا=وانا على مانا ولا اعرف ويش غشاني ماغشا
اه ياعين الغزال اللي وهبه الله هبا=من جمال عيونها تدهشك وهيا المدهشا
وقفته تغريك لو منته فطين وبك غبا=ياويل عمري يوم شفته فز قلبي وانتشا
محدن سبقني يوم جاه الموت قله مرحبا=خل العواذال يفرحون وكل واشي بي وشا
قمت ارفع الخطوه واظني مثل ذاك اللي حبا=سهم المنايا صابني من رمشها وقت العشا
من حينها وانا اشبه لعودً تعلها الدبا=تسمع انين وتسمع اصوات العظام مهشهشا
جسمي نحل غصبا علي وحل في قلبي وبا=ماله علاج الا العفاف ولانبي غيره حشا
قالوا لك الله خل عنك اللي تقول وخذ ربا=قلت العفو قلبي تعلق بالغزال اللي مشا
ماكنت اظن ان العيون جنود للحب يهبا=وانه مرض قاتل يصيب القلب وفي العالم فشا
انا كبير وسد مارب طاح من فارة سبا=والحب محدن يكبره غير الله الخالق يشا