ديوان الشاعر منصور المعمري

أنا خذيت من الحزن ماكفاني= وانته اذا باقي حزن لايفوتك !!
إلحق عليه ووثقه بالمحاني= حتى يبين ( بنظرتك) ثم ( صوتك ) !!
ويبين وانته من ضميرك تعاني= وتظهر تفاصيل الحزن في سكوتك !!
إجمع طيوفه داخلك ( شكل ثاني )= وخله شرابك طول عمرك وقوتك !!
ياصاحبي لو الحزن مااحتواني= ماجابني أعشق ( حياتك ) و( موتك) !!
اعشق حياتك ياحياتي عشاني= أقطف معاها قحويانك وتوتك !!
وأعشق مماتك ( واعتبرني اناني )= لإني أخشى من ( شبَك عنكبوتك ) !!
أخاف منك ومنزلك في كياني= وأحس ( بالغربة ) وأنا ( في بيوتك ) !!
غريب يمكن !! والاكيد بزماني= إني بَحرك وباخراااااتك وحوتك !!

( كبار الأماني )

انا كذا لاضاق فيني زماني= وجهت وجهي للكريم ودعيته
إنه يحقق لي كبار الاماني= ويحيي ( العيون ) اللي من العام ميته
ويفكني من شر زلة لساني= ويسهّل الدرب الذي قد مشيته
للغالي اللي قبل ماانسى نساني= وانا لو انسى ( عالمي ) مانسيته
لإنه أول من تركني اعاني= ولإنه أكثر من لقلبي شكيته
والقلب وش هو غير ( بحر ومواني )= والحزن وش هو غير ( حلم وبنيته )
والمترف اللي لاطلبته عطاني= وانا وش املك غير قلب عطيته
يغيب وألقى موطنه بالمحاني= كن الخفوق بكل مافيه بيته
أحس معه الحب له شكل ثاني= أجمل من اللي في خيالي هقيته
شيَدت له ( موطن عظيم ) ونفاني= وشتت أحلام الصبا وأحتويته
ونظمت في وصفه جميل المعاني= وقلت الفرح من أجل عينك بكيته
علمته انه لو يجي في مكاني= بعت ( الليال الممتعه ) وأشتريته
عابث وإذا ضاعت دروبي لقاني= ويضيع لكن لابغيته لقيته
ألقاه مابين الوصل والحناني= وإذا تمادى بالمسافات جيته
وإن كان طال الوقت مارحت جاني= كنه يحس اني هناك أحتريته
محبته تزداد مثل الثواني= والقلب لولا عشرته مانهيته

( أصدق عباره )

صحيح العيش بيدينك حضـارة= ياأغلى من رمى قلبـي بنـاره ‍‍
أنا من مرت عيونـك عيونـي= سجدت لمالك الملـك استخـاره
عيـون ترسـم لقلبـي رحيلـه= من الايـام فـي فـن ومهـاره
حسبت اني مابين الناس عايـش= قبل ماالرمش يعطينـي اشـارة
عرفت ان العمر لولاك ضايـع= مثل أعمار ( أطفال الحجـارة )
وعرفت انك وزير في خفوقـي= تحكـم بـه وانـا قلبـي وزارة
وعرفت اشياء بالدنيـا غريبـه= خطا قلـب المولـع واعتـذارة
وتذكـرت السنـيـن الاولـيـه= من اللي قال لي بالناس جارة ؟؟؟
سنين تمـر والموعـد عيونـك= وليـل ينتظـر لقيـا نـهـاره
أحبـك كثـر ماجيـت بخيالـي= وكثر ماشنت الاهـداب غـارة
لإنـك عالمـي وايـام عمـري= وقلبي عيشتـه وانـت انتحـارة
وانـا ياسيـدي بكتـب لقلبـك= قبل مانفترق (أصـدق عبـارة)
ترى لو ضاع عمري في غرامك= حشـا لله مـاأعـده خـسـارة

( جوالي )

تقول جوالي على طول مشغول= ياليت قبل الشك طولت بالك
وتركت لي فرصة أجاوبك وأقول= إنك بتاريخ المحبة ( لحاااالك )
من الرياض العاصمة لين سيئول= ماجابت ارحام النساء في جمالك
أنت البداية والنهاية على طول= ريّح ظنونك ( طيّب الله فالك )
يامعجزة فاقت غرابة ( ابو الهول )= ياراسمالي ليتني راسمالك
حبك حبيبي شي ماهو بمعقول= ( رحماااااك ).. أنا في عالم الحب هالك
لعل عمرك يابعد عمري يطول= وأشوف لحظات الفرح من خلالك
علمني إنك بالمعاناة مسئول= وإن انشراحي ( واحد من عيالك )
أحس صوت الحزن في قلبي يقول= تعال شتتني بلحظة وصاااالك
تركتني بين السهر وال( بنادول )= وأشغلت بالي في ظنونك لذلك
لاتنزعج لوقلت لك بس ( يحووول )= حرام تقتل خافقي في سؤالك
لإنه أصلاً في محبتك مقتول= ولو تكرهه ماحب أحد ٍ بدااااالك
أنا وجوالي وقلبي وما انول= من الأماني كلبونااااا حلالك