ديوان الشاعر/ سعد المحمدي

يابو غنيم ان جيت دار الحـداري = اسلم وسلم لي على طيب الصيـت
اعداد ماهبـت هبـوب الـذواري= وعد النجوم وعد ما أصبحت و أمسيت
معزب الخطـار ذيـب الغـداري = مشـرّع البيبـان ماقفـل البيـت
يعرف محلـه ليـل وإلا نهـاري = بيّن مثل روس الجبال المناعيـت
للطيب في وجهه تشاف المـواري= ما قال من بعض المسايـل توذيـت
يذبح لضيفـه غاليـات المشـاري = والجار مايخفي عنه عود كبريـت
راع الدلال اللي على جال نـاري = أعماس راسك تطرده لاتقهويـت
ريف القريب وللخصم سم هـاري = حقايقٍ ماهـو مهايـط سرابيـت
خـوي جنبـه يامنـه بالمسـاري = ماقال من خوتـك يافـلان مليـت
البدو لا شالـو يشيـل المبـاري = بدّاء على نفسه قصيره وأنا أوحيت
ماعمرها صارت بكـل الديـاري= موقفه بالطيب من يبعـث الميـت
مواقفه دون القبيلـه جـهـاري= علمٍ مثبـت بالتواريـخ تثبـيـت
بين القبايـل بالحـداري نمـاري = وليا مدحت معرّب الجد ما أخطيـت
مدحي لشاعر حرب سر أفتخاري = وفي مدح راع الاولـه ماتوانيـت
شاعر كبير وللشعـر ما استعـاري = يسكّت الاخصام بالشعـر تسكيـت
من روس قومٍ للعـداء مـا تداري = اللي لهم تخضـع كبار الطواغيـت
لا حولـو بسيـوف وإلا شبـاري = قومٍ تشتت مقدم الجمـع تشتيـت
أهل المليحـا ناقليـن السـواري = والنعم فيهم عـد بالعيـن ماريـت
رجالهم قلبه من الخـوف عـاري = لاشبت الفتنـه عيـال العفاريـت
كم شيخ صبحهم لحمـر البكـاري = عليـه خلـي للعـذارى تناهيـت
لا صار كر وفر فـوق المهـاري = تارد على عد العداء صبح وتبيـت
اليا اختلـط بارودهـا والغبـاري = كم فارسٍ لاشافهـم قـال ذليـت
ما قلت غير الصد ق والكل داري= وأهل الحسد بهروجهم ما توحيـت
سود النوايا والعقـول الصغـاري= لأقبلت تضحك لـك وتشتمـك لأقفيـت
توحيد راي الناس صعب المداري = وأنا لهرج الصدق يالربع عديـت
ماقلتهـا ليـه مـرام وطــواري = ومسممين الهرج عنهـم تواريـت
أخلفت عنهـم بالبدايـه مسـاري = وفي قول جهال العرب ماتشقيـت
واختامهـا ياللي بالاسـرار داري = راجيك حسن الخاتمـه لا توفيـت