ايام عشناها مع قروم و اخيار=واليوم عن دنيا الفنى راحليني

بسم الله الرحمن الرحيم

بمناسبة ذكرى وفاة والدي وعمي اليوم رحمهما الله وأسكنهما فسيح جناته وجميع موتى المسلمين

اقول :

بسم الله الرحمن تعداد ما دار = شمس وقمر بالكون متعاقبيني
من بعدها سار القلم بالورق سار = كنّ القلم والحرف متسابقيني
يكتب معاني ساقها كنّه إعصار=هزيز صوته اسمعه كل حيني
احساسها بالجوف قاسي وجبّار=ماترحم اللي في قيوده سجيني
في كل يوم يسجّ هاجوس الافكار=ويطري عليها مامضى من سنيني
ايام عشناها مع قروم و اخيار=واليوم عن دنيا الفنى راحليني
منها دموع العين بركانها ثار=ترمي قذايفها على رمش عيني
تجاوزت فيها الحٍمم خط الانذار = فيها الحنين جنود مستعمريني
خلّت هجوسي عبر ابيات الاشعار=يبني حروف الشوق للغايبيني
يوم اذكر الغالين كنّي على نار = نار الفراق ونار شوق الحنيني
شوق اليتيم اللي فقد شمعة الدار= كل ما ذكرها زاد صوت الونيني
يومٍ ابوي وعمّي بداخل الدار = في مجلسٍ بالطيب متقابليني
ابوي ابوي اللي على عز ووقار = عزيز قوم بخالقه مستعيني
من طيب راسه مكرم الضيف والجار=وفي واجبه عزمه أبد مايليني
عشرين عام وزود والقلب صبّار= على الفراق ويا عسى الله يعيني
ويالله عسانا يوم تكريم الابرار = في جنّة الفردوس متجاوريني
ولبو سعد تشتاق روحي و الانظار = صقرٍ ليا عدّوه سمح الجبيني
عضيد ابوي وسيف بالحق بتّار = حبه بقلبي ما محته السنيني
من طيبته يلقى السعد سابع الجار=على النقاء والدين ذرب اليميني
حنون بالفطره مع صغار وكبار=من صغر سنّي بطيبته محتويني
عزيزنفس وبالكرم عدّ مدرار=حكيم راعي شور رجلٍ فطيني
في مجلسه يجمع على الطيب الاخيار= وفيه الجزاله دائماً تهتويني
أيام كانت بالفرح تشعل أنوار =تسعد بها روحي مع الحاضريني
على النقاء والطيب والكل محضار =وعلى الفراق اليوم قلبي حزيني
وجدي عليهم وجد ظامي بالاسفار = تاه بطريقه مالقي له عويني
في كل درب امشيه لي فيه تذكار= امشي على جمر القهر بالهويني
لكنّها هذي تصاريف الاقدار=نصبرعليها وياعسى الله يعيني
عسى مزون الخير لاهلّت أمطار= تروي ثرآ قبره يسار ويميني
وتنبت من مزون الحيا ورد وازهار = وريح البَخَتري في ثراها يبيني
ويالله عسى الفردوس له مسكن ودار=مع النبي وخاتم المرسليني
ناصربن مصلح الاحمدي=