ديوان قصايد الشاعر( ناصربن مصلح الحربي ) ... جميل النوايا ....

بسم الله الرحمن الرحيم

يانجم ياللي مطلع الشمس يخفيك=وترجع لنا يانجم في كل ليله
اليوم فكري بالقوافي يناديك =من بعدها كلٍ يروح فسبيله
أبيات فيها النصح يرسي بموانيك=والمعذره يانجم لو هي طويله
اسمع قصيدي قبل مالفجر يمحيك=على النوايا الصادقه والنبيله
قصيدةٍ بالقاف تبنى على إيك=في بحرها المسحوب أرخي هميله
من راس عذبات المكارم أبرويك=وياما رويتك بالمعاني الجزيله
بنصح بها نفسي قبل ذاك او ذيك=العقل حكمه والليالي دويله
يانفس توبي قبل الاقدار تنهيك=مالك عن المكتوب منهج وحيله
حكم القدر لا جاك ماظن يخطيك=إمّا يجيك اليوم ولآّ تجيله
من يآمن الدنيا بيلقى الهواليك=وان طالت أيّامه تراها قليله
والصبر مفتاح الهموم الدواليك=وبلسم جروح المعضلات الثقيله
فِعل الفضايل مع سواها تداويك= وكلٍ بعد دنياه يجني حصيله
لاتشتكي لنّاس تمسي وتشقيك=وشكوى لغير الله تراها ذليله
ارقى سنود واعتلي في هقاويك=وابعد جنابك عن دروب الرذيله
وحافظ على دينك ترى الدين يحميك=تكسب رضا ربك وتجني الفضيله
صنايع المعروف من الشر تنجيك=تحفظك باذن الله وعمرك تطيله
وبر الأبو والأم ربك يجازيك=جنّات عدنٍ في رياضٍ ضليله
واغنم زمانك لاصفت لك لياليك=واشكر بها الرحمن تبقى عليله
سود الليالي عسرها من جنى ايديك=وكلٍ بصاعه من ذنوبه يكيله
لا تطاوع ابليسك على السوء يغويك=ومن طاوع الشيطان يصبح عميله
وسواس فكره بالشقى لا يدهويك=تلقى الخساره بالمكاسب نزيله
عن مارد الانذال جنّب خطاويك=ومن عاشر الانذال يجني الفشيله
واحذر من اللي لا قسى الوقت يشنيك=ممشاه أعوج احذره لا تعيله
الصاحب اللي لا غلا السوم يشريك=احفظ وصاله ولا تدوّر بديله
والمال كثره لا يغرّك ويطغيك=إجمع حلاله والوسخ لا تشيله
وربك ليا منّه من الفضل معطيك=وفّه حقوقه قبل ربك يزيله
قم للضيوف اليا لفوا في أراضيك=واكرم لحاهم بالسمان الجزيله
درب الكرم والجود يرفع معاليك=درب الكرم ممشى النفوس الجليله
صدق الحديث لخير الافعال يهديك=وراع الكذب للخير نفسه بخيله
عند اللوازم لا يخيب الرجاء فيك=ما للوفاء غير الوفاء هو سبيله
والجار له حقٍ ولو كان موذيك=بالصبر والاحسان تشفي غليله
وبنت الردى ولو كان بالزين ترضيك=حذراك منها تتخذها حليله
ماتستوي لغيرك ولا تستوي ليك=وتلقى التعاسه في جناها نزيله
من ما يعيّب ياابيض الوجه تسقيك=وبين الرجال اسمك يقيّد هبيله
عليك باللي من حياها تشافيك=عليك في بنت الرجال الأصيله
تحفظ لك فراشك وتحيا وتحييك=وتصبر على سود الليالي الثقيله
تمت ويانفسي انا اليوم بوصيك=قبل الجميع ان كان عقلك دليله

ناصربن مصلح