برنامج الـ (whatsApp)، سببت وسواس=في مجتمع ناسي هموم السياسه
مره تجيب العلم، مبني على ساس= ومره تجيب العلم، من غير ساسه
كنك من السرعه أليا أقلعة لناس=مكوك من وكالة الجو ناسه
مايمنعك، جيش، وطواري، وحراس=دخلت حتى في قصور الرئاسه
صبيت قاز المشكله وسط الأقواس=على ضمير الشعب، تشعل حماسه
تروي حديث الترمذي وبن عباس=وتفتي بمسح الخف، مدة لباسه
زبونك، مطوع، وصايع، وبلاس= كل"على قده،، تفصل مقاسه
ترسل رسائل، تروي كبود يباس= تسكب على قلب الحزين الوناسه
وترسل رسائل، سطوها كنه الفاس=تضرب غصون المجتمع في شراسه
وترسل رسائل، كنها سوس الأضراس=تفسد جهود التربيه والدراسه
غير الكلام اللي على السطر منحاس= ذابت حبوب الغدر في قاع كاسه
أخر عباره منه، حطت بالأقواس= أرسل وتأجر,, لاتجيك أنتكاسه
أرسل على سبعه, وتسلم من الباس=وألا....يصيبك في حياتك تعاسه
التقنيه نهر",, يمر أكثر الناس =والدين ماه..ولايفيد إحتباسه
لاكن على علم, ودرايه, ومقياس= الجهل لامن خالط الشي حاسه
كم يعربي يتبعك، يامنكس الراس=يسمع صدى نغمتك, ويميل راسه
أحد" كسب بك فود،، وأحد" تغطراس= وأحد" كسب تقليد ربعه وناسه
خلك ياوجه الخير,, للخيرنبراس=والقلب في عرض المباحات واسه