شاعر الجــار ... و مدااااراااات شعبية

الشاعر المعروف عبدالعزيز بن حمود المرواني الحربي (أبا العون) شاعر مجيد للشعر له العديد من القصائد في جميع جوانب الشعر.. إليكم مقتطفات من قصائد شاعرنا:

نبدأ بأبيات من قصيدة قالها يمتدح فيها مؤسس هذا الكيان الشامخ الملك عبدالعزيز -رحمه الله- يقول فيها:

عبدالعزيز اللي ولاهـا بالظفـر=والسيف والحيلات لين احتالهـا
جر الجراير بالجزيرة واشتهـر=سبع سبع كـل السبـاع وزالهـا
نجم بدا نوره على وقت السحـر=هبت هبوبه ثـم شـال اخيالهـا
هبت هبوب النصر وابليس اندحر=ونادى مناديهـا بـروس اتلالهـا

ومن قصيدة أخرى يقول شاعرنا:

انا ليا ضاقت علـيّ المحاريـف=ماني على بدع المثايـل كتومـي
اخذ على زين المثايـل تصانيـف=ما طاب ولا الشين مالـه لزومـي
خص ليا عديت روس المشاريف=في راس لحلوح يكف الرجومـي
تلعب به الارياح بالقيض والصيف=بس الهبايب فوق راسه تحومـي

ومن قصيدة طويلة يتنمى فيها مشاهدة جيرانه الا أن الظروف لم تساعده، نختار منها قوله:

يا من خبر واحدٍ قلبه غـدا ضـده=وليا بغى له طريق يعترض شانـه
لو قلت ندله عن الجيـران مـاوده=عيّا لا ينسى غلا يا منيف جيرانـه
لا والله اللي عليّه طالـت المـده=واعدتهم والوعد قد طاف عنوانـه
صبرت لين الصبر مني وصل حده=والقلب وسط الضماير شب نيرانه

ومن قصيدة نختار منها هذين البيتين والذي يوضح فيها الشاعر نزاهة النفس واحترام حقوق الجيره:

من جارتي ماملا مناظر عيونـي=ولاني وانا ابو حمود قصاص جره
ولا اتابع الغرات لـو اتهمونـي=ولاني من اللـي يتبعهـن بغـره

ومن قصيدة أخرى نختار قوله:

خطو الولد ماص ما تلحق ملاحيقه=يزيد عن فعل ابوه وفعل الاجدادي
وخطوا الولد ما تبي شوفه وتخفيقه=يوم حصل فيه يا نيـاف لاعـادي

ومن قصيدة أخرى نختار قوله:

الطيب سنـدا والاجاويـد ترقـاه=والله يعين بعونـه المستحينـي
احدٍ خذا طيبه من افعـال يمنـاه=واحدٍ ورث طيبه من الوالدينـي
واحدٍ مهف مقيط بالبير ورشـاه=مافيـه لادنيـا ولافيـه ديـنـي
لو عاش عمر شعيب بقعاء تعشاه=لا ناقص زايـد ولا زاد شينـي

ومن قصيدة أخرى تتجلى أبياتها بالحكمة نختار منها قوله:

الـدر والمحـار عنـد الغطاطـيـس=ولاكل من غاص البحـور استفـادي
ولاكـل رجـالٍ براسـه حواسيـس=ولا كـل تلميـذٍ تعـلـم اسـتـادي
ولا كـل رمـايٍ يجيـد الملامـيـس=ولا كل من يركض ورى الصيد صادي
ولايامن الخايف من الخوف وينيـس=وحتيش لو هـو فـي محـلٍ بـرادي
ولا يدفي البـردان كثـر الهداريـس=الهمل يـا نايـف اليـا بـاد بـادي
والنـاس فيهـم طيبيـن وهلابيـس=هذا على ما قيـل حسـب اعتقـادي
والماء على مجراه يمشي اليا ريـس=الا ليـا عـارض طريقـه سـنـادي
والهرج مـا تجـر رجـالٍ مفاليـس=والكذب مـا ينفـع خطـاة الربـادي

صدر لشاعرنا ديوانه الأول يحمل اسم (شاعر الجار) يحمل في طياته الكثير من القصائد الجيده نتمنى لشاعرنا دوام التوفيق.. وإلى لقاء مع شاعر آخر.. ولكم تحياتي،،،،،

الكاتب / زهران عون الله المطيري ـ بريده
مدارات شعبيه ـ جريدة الجزيره

الله يرحمكـ يابو حموود

شاعر غني عن التعريف ومعرووف بشعر الحكمة

شكراً لك ياحميدان على النقل الطيب

وابا العووون قصيدة ماينمل منه معنى وجزاله

الله يرحم الشاعر/عبدالعزيز بن حمود المرواني الحربي

وبيض الله وجهك علىالنقل الرائع....


ودمت بود....

لاهنت على النقل الجميل
رحمه الله رحمة واسعه