ديوان الشاعر عايد الوهبي

كان الجروح بشرعكم ذنب وأحزان=جيتك حزن يحمل ذنوب المجره
جيتك آسى فى بوح غربه وحرمان=جيتك مشاعر ثايره ألف مره
جيتك دموع ايتام فى ظل طغيان=جيتك ابوه ما لقت بك مبره
حرام لأطوى صفحة الحب لو كان=كل الجوارح تنعدم فى مره
وضلوع صدرى كلها تصير قضبان=سجن ٍ لقلب ٍ ما كفى الروح شره

طالعت عينك وشفت الموج في عينـك""=يصفق على رمشن اسود صار ساحلهـا
وقفت فوق الرموش وصحت لك وينك""=وابطيت واقف ولاحـدن رد ... سألهـا
عنـدي امانـه ولازم تاصـل ايدينـك""=قلبن كفخ بالضلـوع العـوج واشغلهـا
عزي لطيرن تولع فـي سمـاء زينـك""=ماعاد يشتاق لارضـن طـار واهملهـا
مجنـون حبـك ولا تهمـل مجانينـك""=خليتـهـا تتبـعـك....وارجـوك دللها
بخدودك الصبح يسكن مـن مساجينـك""=والليل دنـق علـى ارموشـك يكحلهـا
والشمس تفخر بالارض اتقول من طينك""=خلقـت هنوفـن عظيـم الشـان كملهـا
ارفق على الخلق.. لاتقـراء دواوينـك""=وشلـك مـع النـاس يومنـك تقاتلـهـا
شارون...محدن يردك عـن فلسطينـك""=لاصـار مابـه حمـاس ولا فصايلـهـأ
مبردك عينـن تسـن احـدود سكينـك""=رمشن يصيب الجسـد والـروح ينتلهـا
كن الجريمـه تعـدت مـع شرايينـك""=تـذوب بالعـرق يـوم العـرق ينقلهـا
ماحلـل الذبـح لا دينـي ولا ديـنـك""=ماغيـر رمـش العيـون السـود حللها
بفتح لك الباب ..وفكـر فـي ملايينـك""=وارموشـك اللـي حمـار الــدم بللها
ولاتقول ماهـو بنـا وعيونـك ادينـك""=في صفحه العين كـن الرمـش سجلهـا
ولابي تشهد.. اشفاك وخصرك ولينـك""=والله لـو علمـن بالحق.......تأكلـهـا

تبي ترجع تعيشني بذكرى حيـل مدفونـه=تبي من مات بيدينك يعيش وتذبحـه ثانـي
صحيح إني أبيع العمر لجل نظره من عيونه=ولكن ماوصلت فيني أذل نفسـي لخلانـي
عشقتك طفلةٍ حلوه بربـي حيـل مزيونـه=وكرهتك يابعد عمري بعد ماخنتي إحسانـي
أنا لجلك رضيت أمشي بدربٍ مايعرفونـه=أنا لجلك خسرت الكل وفوق الكل وجداني
سمعت ولا رضيت أفهم كلامٍ هم يقولونـه=نطق قلبي وقال إن الكـلام بواحـدٍ ثانـي
تحديت الزمن لجله رضيت السجن بعيونـه=تمنيت الزمن سجني وهو بالكون سجانـي
أنا ياحرب حبيتـه ولكـن بـاع مجنونـه=وأبي افهم انا منكم منو فينـا هـو الجانـي

نظرت حولي ما لقيتتـك قبالـي=غمضت شفتك نايم ٍ وسط عينـي
العين دارك يـا حَسيـن الدلالـي=يا اللي غرامك كاملـي يحتوينـي
إشتقتلك شـوق ٍ بربـي خيالـي=قمت أكتبه شعر ٍ وأسوقه هجيني
انا إرتباطي فيك فـوق المثالـي=سور ٍ عظيم وعاشقه شعب صيني
ويا ويل حالي ثم ياويـل حالـي=إن قلت لي حبك مضى من سنيني
وكانك جنوب إدري إنى شمالـي=ماأخضع عنيد وعزتي تهتوينـي
وكانك سحاب ٍ وبالسما حيل عالي=ما أطلع لها لكن مطرها يجينـي

لا و الذي سواك ماني مجافيـــــــــــك=بكره ظروف الوقت يمي يحدنـــــــــك
و ترجع عقب ما ضيع الوقت ماضيك=و تشوف وين أفكار عقلك خذنـــــــك
بغيت تنزل مع دموعي و أخليـــــك=لكن رموشي مارضن و إرفعنــــــك
وش فايدة لاصار عيني تعاديـــــــك=و باقي الجوارح كل أبوهن يبنـــــك
زعلان منك و اعتذر لك و اراضيـك=و من فوق حقي أطلب العذر منــــك
حتى لو صديت مااقدر أخليــــــــــك=مدام مابه بالنسا يشبهنــــــــــــــــــك
كن الضيا منك شموس تباريـــــــــك=و باقي الكواكب كلهن يحرسنـــــــك

دام القمر و الشمس منك يغارون = و الورد يزعل دام حسنك يذمه
أبسالك يا فتنه تخجل الكون = ليه الجمال بجيتك زاد همه
شفت الجمال بطلتك صار مفتون = و الورد ذابل ما لقى من يشمه
وشلون انا اللي مغرم فيك بجنون = كني يتيم مالقى من يضمه
ما كني الا دمعة داخل عيون = طفل كواه الوقت في موتت أمه
حب على صدر الزمن صار مدفون = و دموع عينن لملمتها الأكمه
ياللي الجبل دنق على راسك بهون = باسه و قال الحق اني أضمه
أدريك فتنه لكن القلب مجنون = ما يتركك و انتي فصيله بدمه

ذكرى فرح معها ألم فى معاناه = صوره تكرر فى عيون اليتيمه
ضحكة دموع أحزان وآه ورى آه = صوت الفرح مذبوح بآه أليمه
جوع وألم بعد الغنى آه ويلاه =وثياب ٍ بعد العز تلبس قديمه
ودموع ما تلقى كفوف المراعاه = عمر المشاعر ما تسمى جريمه
حتى شعرها أشتاق ألمس يمناه = واحلامها بعده أمانى عديمه
تصرخ بعالى الصوت يابوى عزاه =والصوت يرجع منجرح فى صميمه
ليت الفرح يهزم جيوش المعاناه =وقلوب كل الخلق تصبح رحيمه

حس وتفنن بالغلا وزود الكيل=معاد يكفيني انا أكون ذاتك
ابيك تهواني كما الأرض للسيل=وابيك أعمي وتعتبرني عصاتك
مثل الدموع بحد رمش ٍ مضاليل=وانا الكفوف اللي تلملم شتاتك
ابيك وقت ٍ يعجز يعيش به ليل =وابيك ليل ٍ واهتني في سباتك
وابيك حب ٍ يبتدي وينتهي بويل=لين الفرح فيني يعانق غلاتك
قولي لعطرك والغطي والمناديل=عن حبك اللي يعتبرني حياتك
قولي لهم انك كما مهرة الخيل=في عين مجنونك عظيمه صفاتك
كوني النجوم وضمنها بصبح سهيل=بعيش منك وفيك أغلي أمنياتك
بحققك وأحياك ياصفوة النيل=بأجمع سواد الليل وأنسج عباتك
ابكتبك شعر ٍ يردد مواويل=لين الجبل يقول للبحر فاتك
وإذا العواذل أبرهه صاحب الفيل=انا الطيور اللي بيديها نجاتك

يا هيه دام الغيوم البيض مملكتك=أنثر دموعك علي اتعيش مملكتي
تعبت اركب إجاباتى على أسئلتك=يومك تكاثر علي اتجاوب أسئلتي
كم مرةٍ طحت من عينى وأنا شلتك=وأقوم أرقع خطاك بضعف تجربتي
مشكلتى أنى أحبك وانت مشكلتك=إن أنت لاهي ولا تدرى بمشكلتي
عانقتك البارحه كلمه ولا قلتك=يا عين دامك سهرتى ليه ما قلتي
سهرت ليلي عل طيفك وسامرتك=في قلب عايد انا شفتك تربعتي

من كوكب الزهره الى حد برزان =جيتك مشاعر شمري عند ضيفه
جيتك شجاعة حرب بعيون ولهان =باحساس عاشق من وليف لوليفه
جيتك مثل فرحة شفا لروح مرضان =جيتك رصيد في حسابك تضيفه
جيتك كما برق سرى بليل هتان =فرحة طفل في غياب شخص يخيفه
جيتك يتيم عاش عمره بحرمان =مثل الشجر أصبح ربيعه خريفه
جيتك أمل في حلم يا كل الاوطان= باحساس جيل ما لقى له وظيفه
جيتك و انا كلي مآسي و حرمان =كني وطن مجروح و انتي نزيفه
يا فرحة الماضي على ثغر الأحزان= انتي معي و الا لجرحي حليفه
أبكتك قصه و انا فيك عنوان=لأهل القلوب الصادقه و النظيفه