قصيدة الألفيه للشاعر سالم بن عوض الحويمضي الحربي

21-11-11, 02:36 AM

بسم الله الرحمن الرحيم

الأخوه أعضاء المنتدى
يسرني المشاركه بهذه القصيده وهي أول قصيده أشارك فيها في ملتقى حرب
أتمنى أن تنال اعجابكم واستحسانكم

الفن اولف من ضميرن ما استراح=كنه يدَق من الجنابي والرماح
وانا شربت الما هماجه والقراح=وكل المشارب واردن قلبانها
والبا براني مثل بري المرسمه=حظن عليه نقص وازريت افهمه
ولا يلبي حاجتي يوم ازهمه=يوم القراده رفرفت جنحانها
والتا تحريت العقايب تنفرج=وان زاد حملي فوق متني ما هرج
حتى علينا الصبح نوره ينبلج=وسود الليالي صككت بيبانها
والثا ثمر زرعن زرعناها طفاس=ولاّ محاصيل الدنافيس الخساس
اللي لهم بالدنفسه عرقن وساس=الكل منهم راجحن ميزانها
والجيم جاني طيف عالية الردوف=من عقب لي عامين ماشفت الهنوف
عهديبها من دونها حدب السيوف=ثم جيت ماني ضاربن حسبانها
والحا حضنته لين خالفت الضلوع=برضاه ما هو غصب ألا طوع طوع
مع طيفه اللي زارني زين الطبوع=محدن لمس جسمه ولا فستانها
والخا خذيت اللي جنيت امن الورود=وسويت شين ما تسويه اليهود
نوب آحدر ثم نوب نرقابه سنود=امن القدم حتى رموش اعيانها
والدا دنيت ولا قنعت امن اليسير=ويا زين طعم الكيك من عقب المضير
ما غير انا وياه معدوم النظير=وهلت بصاف الدمع فوق اوجانها
والذا ذرفن الدمع خدرات العيون=ام الثمان البلج من بيض السنون
قال اشهد ان اللي يوردك الجنون=فرقاك من لاقادرن نسيانها
والرا رميت اللي شكيته من خلاف=غبر الليال اللي على مثلي شحاف
كل الصواديف الثقيلات الخفاف=ما فات مات وفايتن ركبانها
والزا زعيم الزين من فوق البني=مركوزة النهدين صافية الثني
ومهياف من فوق الردايف منحني=وامن القمر تال الشهر حجانها
والسين سلة خشمها مثل الصقيل=لا ثوّر غباره ضحى يومن طويل
والشلف من مضرابها تسمع صهيل=خيله بعد ما حذفت فرسانها
والشين شيّب مثلي وتوه شباب=ما هو بشايب جرب الدنيا وشاب
وادركت للدنيا جناحينن وناب=وياكم قبلي عضته نيبانها
والصا صبر صبرن صبرته مستديم=صبرن قصر دونه دها رجلن عظيم
واعوذ بك من كل شيطانن رجيم=واستغفر اللي قاضين في شانها
والضاد ضلع طويق وجبال السرات=كبر الحمول اللي عليه مركمات
وما للجمل غير الحمول الكايدات=وما قولها الا محتمن قيفانها
والطا طواني مشربي كاس الفراق=اللي مذاقه ما هو بأيا مذاق
لا سكرتن منها تموت ولا تطاق=وارحم طلوع الروح من جثمانها
والظا ظروف الوقت تحرمك المراد=وتخلف هقاويك القديمات الجداد
وتيسيرها من عند خلاق العباد=مثل الذلول مسيره برسانها
والعين عيني والفت سهر الليال=حتى لذيذ النوم ما جاله مجال
احدن ينام ومرقده صاف الدلال=وانا هجوسي ما رقد شيطانها
والغين غيبة صاحبي غصبن عليه=حال القدر بيني وبينه لا نجيه
هذا البلا واللي بلاني مبتليه=وعزي لعينن فارقت خلانها
والفا فنا عمرن مضالي ما اهتنيت=هذا النصيب ولا على الدنيا بكيت
وتفنابها يامن على الدنيا شقيت=وتفنابها الشيبان مع شبانها
والقاف قلبي من ورا حدب الضلوع=جوفه كما صفق الهنادي والدروع
ومالي سواة الا سجودي والركوع=للواحد اللي جل عن نسيانها
والكاف كفتني تجاريب السنين=والتجربه درسن مع الدنيا سمين
ولو انها ماهي دليل الجاهلين=كان العرب ما نشّدت شيبانها
والام لاتبدي بسرك يالبيب = لو كان عند أنسان من يمك قريب
قول المجرب ماهو بقول الطبيب = أمن الفضيحه يبعدك كتمانها
والميم مرينا على ذيك القبور=وشيّن تبيّن لي معا ماض العصور
جرح الفراق اللي على مثله صبور=اللي جرالي مع بعض سكانها
والنون نسري بالدجى مثل الذياب=نبا العشا قدام وابليا زهاب
والقافله سارت وينبحن الكلاب=يوم ان ما هرول عبث سرحانها
والها هوا بالي وغاية منتهاه=أنا وذريف الطول معسول الشفاه
فوق البريمي شاص مصنوع الطغاه=بفياض نجد وسايلن شعبانها
والواو واوجدي عليها ام الجعود=دلقن على صافي نحرها والنهود
وجد السجين ومحكمينه بالقيود=يوم اوشك القصار من رشدانها
واليا يمر العمر وحنا دالهين=وحوض المنيه من عليها واردين
هذا الصحيح وكل ابونا راحلين=ويا الله حسن الخاتمه ختمانها

ديوان الشاعر
منتدى الحوامضه الرسمي
www.alhwmdhe.com
وفي ملتقى حرب قريبا

TTTT111@hotmail.com