ديوان الشاعر/ سعد المحمدي

ياهل البحر ياخاطفين السفينه=ركابها خمسه وستين رجال
ربانها من ساكنين المدينه =واللي خطفها يم جده بالاقوال
تسريحها من شايبٍ عارفينه =لاقال علماَ مايجي بعده اجدال
في بحركم وشلون تبقى رهينه=لاصار مافيها على الناس مدخال
اما تواصل سيرها صوب سينه=والا طويت ارشاي وأصبحت رحال
وبحرت فيها في بحر خابرينه=ياما سبح نابه بالاقفاء والاقبال
ماهو رياء ياهل العلوم الثمينه = ولا دور الشهره ولا قصدي المال
لصبحت متعافي والاحوال زينه=ذا مطلبي ياهل الوفاء ساس الابطال
في حاجتاَ بالقلب صارت دفينه =مصبر على عوجا هل القيل والقال
نقطع لسان المعتدي مع يمينه=ان شفت دلوه يمنا ناشت الجال
والشكر للي قبلنا موجعينه =في وقتنا الماضي وفي وقتنا الحال
عطيت روس اقلام ناسٍ فطينه= عسى صدا صوتي يصل ناس عقال

سر ياقلم ببيات شعري وانـأ الـذي =اختار من جـزل المعانـي سمينهـا
سجل وعجل ياقلمنـا علـى الـورق =مـن غبتـاً ماهـز ماهـا قطينهـا
شاعـر وعـرف الطيبـة ماجهلتهـا =والمخطيـه مانـي ولأنـي عرينهـا
مـاذل نفسـي يـوم غيـري يذلهـا =ملعـون يارجـال نفسـه يهينـهـا
ومهضم حقوق الناس وطعن ظهورها =لو كـان مادينـي يالاجـواد دينهـا
يأهل النمايم والحسد ويـش علمكـم =انتـم يسـار الـقـوم ولا يمينـهـا
أقص جرتكـم علـى راس جرتـي =العـام يـوم النـاس نفهـم رطينهـا
واليـوم جرتكـم علـيـه تغـيـرت =والمشكلـة بالـورد مـدري بكينهـا
الصين وقتاً فـات تفخـر بصورهـا =واليوم مدري ويش صايـر بصينهـا
عطيت روس أقلام من مآب داخلـي =يجهل بها الجاهـل ويفهـم فطينهـا
مانـي مزودهـا وتكبـر فتوقـهـا =والعرف مايعرض على عـار فينهـا

مابين سين وشين حاجه كبيـره =اكبر من اللي بين فتح وحماسـي
داري بها رجال عنـده بصيـره =ويجهل بها رجال ماهو سياسـي
اخاف كسـراً ماتضمـه جبيـره =ويصير في بعض الامور انتكاسي
ونروح حبٍ في رحى مستديـره =يالله جنبنـا الفتـن والمـاًسـي
كلن يولـم بنـدقـه والذخـيـره =نشوف بسلوك الزمان التماسـي
الشرق دابه منزعج من صفيـره =وذليت لواني تقل ضلـع راسـي
لا صار حد السيف يأكل جفيـره =صرنا لبعض الناس لعبة كراسي
ياسين شين يدق للحـرب زيـره =لا يصيبكم دون القضيه نعاسـي
انذرتكم ياهل الوجيـه النويـره =ان ذار حربياً للاوضاع قاسـي
ماقل دل وكل رجـل وضميـره =ماقلتها لـو ماسمعنـا حساسـي

سلام مني يارجال الحويطات=يأهل الكرم والطيب وأهل الشجاعه
ياللي لكم بالمجد جلسه وقومات= أرجال دين وتحفظون الوداعه
اصحونكم للضيف دايم ثقيلات=له تذبحون الحيل وقت المجاعه
بالجار وحقوق الخوي كل الأوقات= وافين يالوافين في كل ساعه
وان ثارة البندق ولجو بالأصوات =رجالكم بالهوش ماهو رعاعه
مزبان من ضاقة عليه الوسيعات=أليا لعب صلف الهوا في شراعه
لو عندكم يمضي أسنينٍ طويلات=ماكنه ألا من قريب الجماعه
مايشكي الغربة ولا يخاف بوقات=من طيبكم ماهي سوالف لكاعه
وحنا الحروب أهل السيوف الشطيرا ت=لاشافنا الطماع عاف الطماعه
حقوقنا ما تنوخذ بالسهلات =كم شيخ دون الذود نلوي ذراعه
أهل الثلاث المعجزة فايتٍ فات=ماجاتنا في حب خشم وشفاعه
عندي على ماقول برهان وثبات=بتاريخ حرب مسجله بالطباعه
ماقلت غير الصدق ماهي دعايات=والدار عارف ثعلبه من سباعه

ياليتني ماجيت سـوق العبيكـان=
=لقيت فيه اللـي بعينـه رمانـي
قلت السلام وقال تايـه وغلطـان=
=قلت الغلط في عودك الخيزرانـي
وعيونك اللي رمشهن غصب فتان=
=اسهومهن بالقلب خلف الحواني
قال أنت في راسك مواويل وجنان=
=ان كان مافارقت لزهـم اخوانـي
وذليت من علمٍ يجي دون حسبان=
=وأنا رجل ليـه مكـان وكيانـي
وقفيت من سوق العبيكان زعلان=
=عفت التسوق في هذاك المكانـي
ياليتني بيـاع فـي كـل دكـان=
=يمكن علي يمـر جـال الثمانـي
عساه فينا يروف مدعوج الاعيان=
=اللي بمكـوا نـار حبـه كوانـي
أصبحت له مسجون والزين سجان=
=ياناس ويش اللي بحبـه بلانـي
قفـى وخلانـي وحيـدٍ للاحـزان=
=مجني علي وراح بالقلـب جانـي
أجاحد العبرات في كـل الاحيـان=
=مبغى علي أعداي تفـرح ثوانـي
واقول ياسامع كلامـي واللحـان=
=يلعنك ياحـبٍ يجيـب الهوانـي
حب السنين التاليه ياهل الشـان=
=راعيه مابيـن الخطـر والامانـي

سلام تسليمت وفاء يالبدارين = تسليمت المسلم على المسلميني
احلا من الحالي حلا يالكريمين= ومغلفاً با لورد والياسميني
جينا لكم من وادي الحمض عانين=من فوق جمسٍ يعجب الناظريني
لولا غلاكم يالرجال العزيزين =ماجيت عاني جعلكم سالميني
ياربعنا يامرجحين الموازين =لاثار عج الخيل بين القطيني
ان قيل ياهل الخيل منتم ذليلين =حماية التالي ذرى الخايفيني
حلوين في حاله وفي حال مرين= ياما غزيتم فوق خيل وهجيني
ماتاخذون الطارفه يالشجيعين=هرجٍ عليه من العداء شاهديني
ماتاخذون الا حلال اللمسمين =قومٍ مافيهم بالملاقاء دويني
وقت الضحى لاشافت العين للعين=الكسب منهم مقرعات الحنيني
حمراً ماتعطيها صديق وقريبن =ياما انذبح سبارهن كل حيني
وبالضيف والجيران دايم وفيين=وخويكم كنه حدى الوالديني
الطيب فيكم من قديمن وها لحين =ماهو وليد اليوم يالطيبيني
هذا الصحيح اللي عليه المضامين =غصباً على العدوان والحاسديني
ماقلت غير الصدق ماهي تخامين=الصدق بين والفاعيل تبيني
واعود للي جيت له يالفهيمين=مبروك يافيصل طويل اليميني
مبروك ماسويت يامكمل الدين =ياجامعاً مابين دنيا وديني
عساك من ضمن العباد السعيدين=ماتشتكي من جور غبر السنيني
ابوك للجزلات رمز وعناوين =صالح عسى ذريته صالحيني
معزب الخطار ريف المساكين=مدهال للقصين والا قربيني
من خوف لاتفسر على يسار ويمين=ويلقى بها مدخال لشامتيني
اقسم لكم بالي خلقنا من الطين=مالي ورى ماقلت يالسامعيني
غير الوفاء وشاهدة ناس وافين=شرواء رجا لٍ قدمنا جالسيني
تمت بعون اللي له الناس راجين=مفضل المسلم على الكافريني

النفـس لـدار وأهـل الـدار تواقـه = احبهـم حـب ماحـبـه ولاأنسـانـي
القلـب لبطيـت قـام يـزود دقاقـه = والدم الأحمرتوقـف وسـط شريانـي
أحبهـم حـب راعــي ذود لنيـاقـه = تلايد أمـراح مـن تاريـخ الاكوانـي
لاشحت الارض عنهن ماثنـى ساقـه = بالمال يصرف عليهن سـر وإعلانـي
مسكـان بالـدار لـو أنـه امشراقـه = أخير مـن مسكنـآ بقصـور لبنانـي
عشرين عام وعليهـا عـام ووساقـه = امربالـدار تقـل أنسـان عجـلانـي
بعد الجماعه يامعجـب نـار حراقـه = من لامني يبتلا فـي بعـد الاوطانـي
رجال من دون ربـع أحبالـه ادقاقـه = يشـدا لبيتـآ مشيـد دون سيسـانـي
لاهبت الريح طـاح البيـت وطياقـه = ماعـاد ينفـع بـه الترميـم يافلانـي
قلتـه وأنـا ماعلـي أبشـرك فـاقـه = في خير وسري مسار الذيب سرحانـي
حثالة النـاس عنهـم فـوق شوهاقـه = من خوف هرجة سفيه وقاصي ودانـي
لكـن لاشفـت مـزن يلـوح براقـه = يدفعني الشوق صوب اديـار حياني
قومآ على الطيب والمعـروف سباقـه = أمقديه في نهـار الكـون الأضعانـي
في وادي الحمض تمشي في هوى الناقه = ماهو بحـب الخشـوم بحـد شامانـي
وان وخذت البل على الطوعات لحاقـه = يردون حـوض المنايـاورد ضميانـي
لاشافهم من غزاهـم شانـت أخلاقـه = هوش المحاميد ماهوهـوش رعيانـي
كـم فارسـآ حولوبـه قبـل مزراقـه = لاثار عج الرمـك فـي كـل ميدانـي
وعلى كبير الصحـن للسمـن دفاقـه = وللضيف تذبح ربوعي حيل وسمانـي
نفوسهـم للخـوي يامعجـب ارقاقـه = وقصيرهم يحسبونه ضمـن الاخوانـي
ارسلتلـك مـن بنـات افكارنـا باقـه = والمعذره لاحصـل بالقـول نقصانـي
وختامها من صميـم القلـب واعماقـه = صلوا على المصطفى بختـام قيفانـي

ياوجودي وجد من حطوه في سجن انفرادي = لفقولـه تهمتـن منهـا بـري ولاعملـهـا
في ديارٍ لامجيب ولاسمع صـوت المنـادي = غير صوت السلسله في ساق رجله لانقلهـا
ماتهنـى بالطعـام ولاتهـنى بالـرقـادي = كل ماأقرع باب سجنه ينبعث بالروح املهـا
وتنقطع كل الآمال اليا قصرو له بالقيـادي = و الكلبشه باليدين الحـارس الظالـم دبلهـا
بعد عشر سنين واربع حرروه وجاك عادي = ايتذكـر ثـم ينسـى دار خلانـه واهلهـا
حافي الاقدام يمشي ليـن قـرب للبـلادي = شاف نور الدار بعيونه وباقـي ماوصلهـا
جاه من قال الحليله زوجوها بـا لعيـادي = والعيال الخمس قتلوا وأختهم زايـد نكلهـا
عمها خلا عليها النور من ضمن السـوادي = كل ماتشكي ضربها لين من جرمـه هبلهـا
واحتزم لثار لاكن طاح يوم الضغـط زادي = يوم فـاق يديـه والرجليـن داهمهـا شللها
حيلته دمع العيون اليا سمع ضحك السرادي = بعد ماهو راس قوم ولابغا الحاجه وصلهـا
ياوجودي وجد حاله كل ماهـب البـرادي = ايتشافا من بـلاه وياخـذ النـاس أبعملهـا
لديار اللي غلاها من طبع وسـط الفـوادي = حرها عندي بـراد وبردهـا يشفـي اعللها
لامشينا مع طرفها زان بالعيـن الحمـادي = وان مشينا وسطها ياناس يامحـلا نخلهـا
لو عطونا الشام فيها وانقره مع كـل وادي = ماعطينا شبر منها دون نرضي في بدلهـا
دار حرب اللي لهم تاريخ وامجاد ومبـادي = من جهلها ينشد اللي يالعـوارف ماجهلهـا
متعبين الخيل بالميدان في يـوم الطـرادي = تنذ ر القـوم العنيـده لاغزتهـا متختلهـا
بل الخوي قصة نويشي مثبته قصة وكـادي = ست دونه قصهم غير اليمين اللـي فصلهـا
سل سيفه من جفيره ومتطى ظهر الجوادي = ماتعذر قـال خالـي والمصيبـه محتملهـا
ياعسى ربي يبيحه يوم يجـزون العبـادي = يوم تجزاء كل نفساً عند ربي فـي عملهـا
ومن فدى بالروح جاره يوم صادوه الاعادي = معجزه غير البلالي ماسمعنـا مـن فعلهـا
دون قاصر بالقبايل حاضرتهـا والبـوادي = كل واحد دون حقه ينقض احبـال وفتلهـا

محلاك يالفكسار لو منت غالـي =عليك مايصعب طريقـاً مشيتـه
يشريه رجالٍ معـه راس مالـي =ولوكان معي فلوس مبطي شريته
مرتبـي دوبـه يكفـي عيالـي =والجيب مقدر قيمته لـو بغيتـه
غالي وانا واحد على قد حالـي =نـوب الريـال أدوره مالقيتـه
انشهد ان القل ذيـب الرجالـي =كم واحداًمثلـي بوجهـه قريتـه
صحيح مابه يالعوارف خمالي = لكن يقلـل بالعزايـم لقيتـه
لو انت رجالٍ تـروم المعالـي =يقصر خطى رجليك عن مابغيته
ويصير بين الناس مالك مجالي =حتى رفيقك يكرهـك لانصيتـه
المال طلع قاصريـن الحبالـي =كم من رديٍ طلع المال صيتـه
عوجاه عند الناس تمشي عدالي =لو كان ماتعرف هل الجود بيته
قلته وانا واحـد بعيـد المدالـي =في لازمي ولد الـردي مالفيتـه
وليا زبنت أزبن طويل الجبالـي =اللـي يـذري جانبـه لارقيتـه
أفراق يادنيـا مداهـا الزوالـي =معذور لوفيها شماغـي رميتـه

عديـت مرقابٍ عـلا كـل مرقـاب = رأس الطويـل اللـي تقانـب ذيابـه
أخـذت فوقـه عـدة أيـام بحسـاب = مابين يا أهل الشـأن بغـض ورحابـه
ورجعة أسال النفس عن بعض الأسباب = سـؤال واضـح والغمـوض الاجابـه
ولقيت في دنياء العجايـب والاعجـاب = تفسير للموضـوع عـن كـل جابـه
سكت مبغـي فتحـة أقفـال الأبـواب = اخاف من شرهـت صديـق وقرابـة
شرهت رجل عاقل من أصحاب وقراب = رجـال يحسـب لأتكـلـم حسـابـه
لو كان من طعنة غدر صرت منصاب = ياشين جرحًٍ فيـه بعـض الغرابـة
جرح الغدر متعالجـه كـل الاطبـاب = بـذات لامـنـه تـجـدد صـوابـه
ماني مجازي بالخطـى زيـد وذيـاب = بعـض المواقـف نعتبرهـا عيـابـه
لاصار مالي عندهـم عانيـا ً غـاب =خليتهـا تضـرب وسيـع الدعـابـه
قفلـت بيبـان القضيـه يالاصحـاب = مـدام علـت سيفنـا مـن نصـابـه
ماقول من شيا ً حصل صرت مرتـاب = يمـوت ذاك الـداب سمـه بنـابـه
ان طاب وإلا ياعسـى مابعـد طـاب = للـي علـى المقفـي تنابـح كـلابـه
ماعشت بين الناس في وسط سـرداب = شامخ شموخ طويـق وقـوى صلابـه
ماكـل رجـالٍ فتـل روس الاشنـاب = أليـا رقـص شيطانـهـا ينعـدابـه
وختامهـا منـي تحيـه يالاحباب = عـداد مـاسـار القـلـم بالكتـابـه