اداب المجالس

اوحيت بالسـاحه كـــلام وتحـالــيل = عن نشرة الاخبار من كل اذاعه
ياكثـر ماوحـيته وياكــثر ماقـــــيل = حول المدار اللي طويل نزاعــه
واللي حصل باثنا السمر والتعـاليل = أوحيت بتلا الليل ثورة اسراعه
من يوم ثارت بان حس الرجـاجيل =متخالطٍٍ صوت الفزع والفراعه
أربع من الجـــهيل وأثنــين عقــيل = متخالفين الراي لو هم جماعه
أثنـــين منهــم ماعليــهم مــداخـيل = ضد أربعه من حاملين الوداعه
منـــهم شجــيع يعـتزي بأول الليل = ويشجع المزهاف خبث ولكاعه
ينشي لها لين انــها تلقــح الـــحيل = ثم غز عن وجه القضية كراعه
والرجل مايرضى على نفسه الميل = كل يعدي دون وجهه ذراعه
ذا قول من يبحر بها مثل مـاقــيـل = لا جهز المركب وكرب شراعه
يــدل دربــه لاأخــتفـن الـدوالــيـل = لافتر راس الدوكرة والرعاعه
فــي غبتن كــن البواخــر زنابيــل =من هن تعيف من الطمع والطماعه
يجهل بها اللـي بالســوا ليف حـــلحيل= بالهرج والا الفعل مذموم ناعه
ماودي أحــرق حمسة البن بالحــيل= حتى شواريبه تلذ بمتاعه
كان السوالف مثل سـوق الفناجيل=في مجلسٍٍ عقيل ورجال طاعه
تحــس بالتقـــدير وتحـس تجليــل = تجليلة الاداب ماهي مياعه
ومحدثه ياخـذ مجــاله ولا يطـــيل = لو شده المصغي بجل استماعه
حيث العوارف كيـفهم نوع تكحيل =ماهي علوم مغالطات وصعاعه
للــهــرج نقــاده وللــهرج تفـصـيل= والفرق بين الهارجين الوقاعه
واقرب مثل يطري على البال قد قيل = الصمت له ساعه وللهرج ساعه
وهرجٍ بلا معنى يغــث المشاكــيل = ماكل مايطري على البال تاعه
ولا صار ماعند الــمسولف مـكـاييل = تراه عن خافيه يكشف قناعه
واصمت به حكمه وله فيه تنفــيل =لاجا المجال اللي يفوق اطلاعه
إلا ومـع ذلـك وجـيه المــقــابــيـل = للعارف المدرك سوات الاشاعه
منهم تحــرك لـلمشاعر مــراسـيل = ولا يجي للواردات امتناعه
ولا الهـبود اللـي عـن السالفه سيل=ينفض خروجه من جرف باندفاعه
ثم راحت الدعوى سحوب ولها ذيل = واللي يمله يتهمه بالبشاعه
مادري يحسب انه وحيد من الجيل = مافيه مخلوق يساويه باعه
ولا معودها على الحط والشيـــــل = من خيل ابوه وحطها له قلاعه
من سوء حظه وهـقـوه الدعابـيــل =عرفه وتفكيره جفاف ومجاعه
بناس هيمــانٍٍ صــواريمٍ تهيــل = وأهل مواقف في بطولة شجاعه
كد واجــهم بمحــدبات ٍ مصــاقيل = تدوين ماضيهم معاجم طباعه
لو للادب ساحل مقاس ومواصـيل = حصلت للعقدين شريه وباعه
لبــس وســامٍ فيه للجــدي وســهيل = لسهيل مطلاعه وجدي بشعاعه
حتى اتهم وشر بروس الأنامـــيل = مقرب سلام المتهم من وداعه
هذا وانــــا باقول ليــــامن الســيل = من لا بنى بيته براس الرفاعه
ذكرى لراعي بيت من غير تقليل = بيته مثولث والخدم في رباعه
يبطـــي مشبه ماتجيه المعامــيل = وان كبرت القاله يعود اتباعه
ذكرى بها حظر التجوال بالليل = اقولها فوق السموع براعه
اخفيتها وارسلتها دون تأجيل = لشر زند وللحروب اندلاعه
بدق اصابه لا توريت تعديل = واحدث موديل الأسلحة والصناعه
اخص واستثنى اهل البن والهيل =اللي بهم راسي يزود ارتفاعه
من كل خصله من ذراري اسماعيل =ولهم على هدي الأ آله اجتماعه

غازي الزغيبي

صح لسانك واعتلى شانك وبيض الله وجهك ...
يعطيك العافيه ... على القصيدة الرائعه....
لا عدمنـــاكـ وننتظر جديدك....
اخيك ابوروان

.

حياك ياراعيها

راع الجزلات

صح لسانك يالقرم

تحياتي

صـ لسـانـكـ ـح ..
مــدد .. بـ .. لا .. عــدد ..
دمــتَ .. كمـا .. أنــت ..
بـ انتظـار .. الـ مـزيـد ..
أخي .. الـ كـريــم ...

صح لسانك صح لسانك صح لسانك

بيض الله وجهك على القصيدة الجزلة

الشاعر/ غازي الزغيبي
صح لسانك و بيض الله وجهك يا أبو طلال

على هالقصيدة الجزلة

قص

يده رائعه اخي الشاعر / غازي الزغيبي

ابدعت واجدت في رسم الأبجديات الرائعه

صح لسانك على هذا المداد الذي يزخر بالجزاله

ارق تحيه

صح اللسانك ابوطلال
اربع من الجهيل واثنين عقيل متخالفين الراي لوهم جماعه
جزلــــــــــــــــــــــــــــــــــــــــه

إبداع في القصيدة صح لسانك مليون



دام راسك على العز









ودمتم بخير

صح لساانك
ولله درك على هالقصيده
ولاعجب يالجزل