ديوان الشاعر/سند مسند العريمه الحربي

لا صار ماتبدع إبيوتٍ ثمينه=
= ريح ضميرك واترك الناس ترتاح
ياما سمعنا من قصايد عجينه=
= والمشكله حازت جماهير وأمداح
في عالمٍ تصفق يساره يمينه=
=وكل القصايد عنده إسمان وصحاح
ميزانهم صوتٍ تعالى رنينه =
= تلقى جماهيره لها صفق وصياح
خلوا تقاليد العرب والسكينه=
=في ليلهم مسراح والصبح ممراح
ويااللي على الشاطي تدف السفينه=
=عود على الساحل ترى مانت سباح
البحـــر يبـغـاله رجــالٍ رزيـنـه=
= له غـبـةٍ تـجـذب جـمـادات وارواح
وخلك على كشته قريب المدينه =
= دلــه وبــرادٍ له البـــال يــرتــاح

قدام لانبدأ بيوت القصيده=
=تحية الإسلام سنه وتنقال
سلام يارجال الوفاء والعقيده=
=عداد مايمطر من المزن همال
سلام شاعر والنشاما رصيده=
=مبدأ حياته في طريقه ولازال
والشعر جزله بالمواقف نجيده=
=وعقب السلام الزين نبداء بالأمثال
واقول ياجهينه ونعم البديده=
=دام الوفاء فيكم من أجيال لأجيال
العام زرتونا وجيه سعيده=
=لبيتم الدعوه على كل الأحوال
جيتم لشيخٍ بالمواقف وليده=
=في منزله يُقلط على الحيل ودلال
ابن جديع الطايله ما تكيده=
=كون لنا عرفة حشيمين وابطال
وتم التعارف والنشاما تزيده =
=منا ومنكم يا كريمين الأسبال
واليوم جيناكم بدعوه مجيده =
=من روسكم جزله على عالي العال
ياهل المكارم والفعول السديده=
=يوم العرب صولات رجلي وخيال
وبحفلكم عبرت باللي نريده=
=وختامها الكمبود والمسك يا رجال
ويالله عسى أيام النشاما مديده =
=أقولها من جد بقفاي وقبال

الشيخ شيخ العلم حام الشريعه =
= يا مجير الشيخه على غير تأسيس
والشيخ شيخ القوم وقت الوليعه =
= لا ثارت الهيجاء بضرب النواديس
والشيخ شيخ الجاه وقت الفزيعه =
= لا شربكت بقعاء عقود اللواليس
والشيخ رجالٍ عزومه شجيعه =
= بالطيب والفزعه وكسب النواميس
نفسه على فعل المراجل تطيعه =
= ما دار في باله طمع موكي الكيس
سد اللوازم للنشامى ربيعه =
= سلام يا تاج الفخر والنواميس
وباق البشر حاله وحال الطبيعه =
= وكلٍ على فعله تجيه المقاييس
احدٍ يمد الطيب وحدٍ يبيعه =
= وحدٍ يلمس شجرة الطيب تلميس
وحدٍ جزيل ونشكره في صنيعه =
= وحدٍ يخيب وقلعت النذل وبليس
فاتت على مثله افعولٍ رفيعه =
=وش عاد لو يسكن على برج باريس
مهف دخانٍ تفرق جميعه =
= مع درب صلفاتٍ تشيل الطعاميس
الموت لا جاله إركابه سريعه =
= ما ينفعه لو كدس المال تكديس
تقاسمو ماله إجموعٍ مجيعه =
=حق وحقيقة ما بها هرج تدليس
أوجزتها في موجزٍ نستطيعه =
= ولبستها من جوهر الشعر تلبيس

تكفى يابومتعب ولايهــون سلمـــان =
= نبغى دراسه للمواطن مفيده
تنهــي معاناة البطالــه والاسكـــان =
= وتنقذ حياة اللي بسالب رصيده
يااهل الوفاء والطيب من ماض الازمان=
= ويااهل المواقف والفعول المجيده
حنا تــرانا صفكـــم ســــر وإعــــلان =
= برقابنا بيعـــة شـــريعه جويده
مــانلتفت لفـــلان ولا نقلـــد إفلان =
= والشعب مومن والمساعي حميده
من وقت ابو تركي على سنــان وعنان =
= لوقت ابو متعب إحزام العقيده
واجمــل تحيه يامـــلك مالها أثمـــان =
= وعسى حياتك بالسعاده مديده
وثاني تحيــــه للوطـــن كفهـــا بان =
=من دافع إحساس المشاعر جديده
حب الوطن بقلوب شيبِِ وشبان=
= والشعب وافي والحكومه رشيده
وعداد مايمطر من المــزن هتــان=
= جزل التحايا في ختام القصيده

تراك لاكثرت مصادر دراهمك=
= لا تامن التقصير في حق ربك
لانك ورى الدنيا تكرب محازمك=
=في زودهـا يزداد عـاتي مهبك
تهرف هريف الذيب والهم زاحمك=
= والبنك من كثر الملايين حبـك
ولاينفعك بنكٍ بالإيداع رايمك=
= لا جـاء نهـارٍ بالمـقـابر مطبـك
أفنيت عمرك للدراهم تجشمك =
=وبقى العمل والمال ياشين كبك
راحت ملايينك وزالت معالمك =
=واللي مـدحك العام عوّد إلسبـك
وعقب العزاء تقسم مخازن غنايمك =
=ياللي سكنت بدار ماهـي مربك
والزوجة اللي ماضي الوقت تفهمك=
= جـاهـا عشـيـق لمالهـا ماحسبّك
وأرحم عيالك بالصحاصيح دمدمك=
= وقفيت عن دنيـاك لوجاه ربـك
وقدمك حسناتك وقدمك ظلايمك =
= ويا حسرتـك ون كـان مـالك لعبك

بالواقع الملموس نكتب قصيده=
=إيجاز للواقع حقيقه وتصوير
بالتجربة نكتب أمورٍ عديده =
=من كثر ما شفنا من الشر والخير
أول زمنّا يمشي السيل سيده =
=وتخضر ضفاف الأوديه والعثامير
واليوم سيل اليوم محدٍ يريده=
=سدّوا طريقه حايشين الدنانير
أهل الجشع وأهل النفوس المريده =
=من فعلهم صرنا سوات العصافير
ما همهم جرح الوطن مع صديده=
=ولاهمهم دمعٍ تحدر شخاتير
كلٍ يحسّب مكسبه وش رصيده=
=ويعطي عن الجوده ملخص وتقرير
بالكذب عايش والمهايط يزيده=
=ويمرر الكذبه على الناس تمرير
مير البقى باللي إفعوله سديده =
=حلال عسرات الليال المعاسير
نعمٍ بابو متعب إحزام العقيده=
=الحاكم العادل على كل تدبير
ونعمٍ بسلمان الوفاء هو عضيده =
=راسه خلايا جد حكمه وتطوير
لهم تحايا من ضميري عديده =
=عداد همال المزون المزابير
وعداد نبتٍ بالفياض الطريده=
=لا شعشعٍ بالوان زين النواوير
وأجمل تحيات العريمه جديده =
=وعسى الوطن يبقى على العز والخير

بسم الجديع أعلن تحية وترحيب =
=وحقٍ علينا مرحبا في ضيوفه
عـداد نجمٍ يسري الليـل ويغـيب=
=وعـداد هـمـالٍ تـراكـم إقـنوفـه
لا صب همال المزون المناصيب =
=مـا عـاد يبقـى بالفيافـي حفـوفه
ترحيبٍ أحلى من لبن شمخ النيب=
=في خايعٍ عشبه تداخل إصنوفه
برضٍ هواها يقعد الراس ويطيب =
=والفقع في بعض المواقع تشوفه
ترحيب بجهينه مثل سوقة الطيب=
=ولـشيوخهم تـرحيب يزداد نوفـه
جهنان في حلكم حان ترحيب =
=فـي محفلٍ زبن الحنيني يحوفـه
شامل حضور الكل جزله بترتيب=
=ترحيب شاعر قدمكم في وقوفه
يا ضيوف رجلٍ كاملٍ بالمواجيب =
=ابـن جـديع الـنادره مـا تطـوفـه
له هدتٍ يشبع بها الطير والذيب=
=يـوم الـقبايـل بالقتال إمـعـروفـه
واليوم له فزعه وجاه ومكاتيب=
=وله وقفةٍ تجدي إمصفق إكفوفه
وختامها الكمبود والمسك والطيب=
=وجزل التحايا باقةٍ في حروفه

يافايز أبدعتم بجزل التماثيل =
=طرقت موضوعٍ على الناس شامل
فيروس يوجد بالنساء والرجاجيل=
=تحليــل وضعه تبتلش به معـامـل
ماينعرف وش مصدره والتحاليل=
=والـدور هـذا دور زيـدي وعـامـل
ضفو مصالحنا وحنا مكابيـل =
=تـقـول هــوبٍ طـوقـنه فـرامـل
شبابنا حقين رشه وتضليل =
=والاجنبي سيطر على السوق هامل
صحيح قالو فيه مهله وترحيل =
=ولا راح عامل يطلب السوق عامل
مير الرجاء بعد الولي بالحلاحيل =
=حـكامنا والشعب ناتـج تكامـل
للضد ضد وللموالي هماليل =
=يمطر هللها في حساب الأرامل
وختامها الكمبود والبن والهيل =
=أختم به الموضوع للكل شامل

أرسل تهاني خالصة ليلة العيد=
=وحقٍ علينا للوجيه السفيره
للملتقى وأهله من إقريب وإبعيد=
=ونبدا بها الأول سعادة مديره
والثانية لاعضاه من دون تحديد=
=ولحرب ربعي في عموم الجزيره
غرد بها قلبي للاحباب تغريد=
=إهجوس شاعرمن دوافع ضميره
وتلفي على ربعي تحيه وتمجيد=
=أهل المحازم والسيوف الشطيره
وأهل الإصابه في قصارالبواريد=
=وأهل المواقف والفعول الشهيره
وإنجدد البيعه بالاسلام تجديد=
=للحاكم اللي قادنا بالمسيره
وختامها تسبيح ربي وتحميد=
=وللمصطفى منا صلاةٍ كثيره

الصمت زين وكثرته مابها فود =
= والهرج كثره شين والزين ذربه
وهرج يحقق مطلب فيه مقصود =
= اخير من صمت يضيق النحر به
وصمت يصون الرجل عن كل منقود =
= اخير من هرج على غير دربه
لخصتها بقصار تغني عن الزود =
= والماء قراحه يروي الكبد شربه