محاورة بين سالم العرم وعبد المطلوب البدراني

ياسلام الله على ربعـآ لهـا بالمجـد هامـه=جيتها من طيب نفس وجيتها من غير داعـي
وياعسى اللي جمع اهل الطيب ما تفنى عظامه= الشجيع بن الشجيع بن الشجيع بن الشجاعي

مرحبا بك ياعريب الجـد ياعالـي مقامـه=بجيتك والله فرحنا الطيب يشرى ما يباعـي
ومن يبي درب العلا والمجد يرقى في سنامه=ياالله انك وفق اللي ذكرهم بالطيب ذاعـي

ماعليكـم زود والنشمـي ينومسنـا كلامـه=والسباع الكاسره ما تضيق من وجه السباعي
البعير اللي يشيل الحمـل وشـداد ومسامـه=بعد روح لا تصير الراعيه مـن دون راعـي

من يجي بالطيبة يفرض على الناس احترامه=المواقـف علمتنـا بالهجـوم وبالدفاعـي
بعد راح الله يعوضنـا بعيـر فـي خطامـه=الرعيه دونهـا قـوم كريميـن الطباعـي

ياولد عمي ترى مال الزعيم إلا الزعامه=لو كثير من العرب عينه عليها ما استطاعي
واحد الباقي وغيره نسئـل الله السلامـه= اتخاسر شيلهم لو هو على النقل الجماعي

وين راح ابن الزعيم اللي سلاحه في حزامه=ودي اشوفه يقود المعركه دون انقطاعـي
وبعضهم لو يختبر مايستحق ربع العلامـه=مير شلته بالنقل والا على الدفع الرباعـي

ابشر انه دون ميقافه علـى عـز وكرامـه= مايدور من وراء الميقاف شهره وانتفاعـي
ياطويل العمر هذي مـن علامـات القيامـه =ما تشوف الناس تحكي عن سنوات الضياعي

من يقف في لازمة يلقى على صدره وسامه=والله ان سهيل واضح وان بدأ منه الشعاعي
يا أبن اعمي اعرف انك من رياجيل الفهامه=البشر ضاعت وفيها ما نفع كل المساعـي

ما يجامـل للغشيـم إلا شبيهـه بالغشامـه=انت تعرف من وراء الضلعان بعيونه يراعي
قلهم لا يزاحمون الناس في سـوق اليمامـه=يجلسون مكرمين وفوقهم بشت(ن) سواعـي

ما يجامل بهالامور الا ضعيف بلا كرامـه=والرجال اهل المعرفه ما تقارن بالرعاعي
بعضهم لوهو يزاحم يختفي مثل النعامـه=يوم تخفي رأسها بالرمل والصياد واعي

سالم العرم

وعبد المطلوب البدراني


صح الله السنتكم على هذه المحاورة الممتعة

صح الله السنتكم وبيض الله وجيهكم

الله الله والله انكم مبدعين والله يوفقكم

صحت السنتكم

صحت السنتكم وبيض الله وجيهكم

صحت السنتكم وبيض الله وجيهكم علا هذا الطارووووووووق الكايف

اسجل اعجابي بالمحاوره ذات المعنى الصايب