ديوان الشاعر/ عوض عواض الغيداني

الهنوف اللـي فريـده مزاياهـا=والله إن إفراق الاحباب موجعها
عقب ماني كنت مرهي بلاماهـا=أصبحت ذكرى بقلبـي مواقعهـا
والله انـه مابقـى إلا هداياهـا=والغـلا والذكريـات وتوابعهـا
يوم حظي عجز عنها واناابغاها=كتبت لغيري وأنا ميـتٍ معهـا
لعنبـو حـظٍ تـردى وخلاهـا=يوم جاته فرصت العمر ضيعهـا
إستحالـت وأخذوهـا دناياهـا=إطمعوها عقب ماكنت طامعهـا
إغصبوها ماحصل شيء برضاها=ماجداها غيـر هلـت مدامعهـا
وأصبحت صعبه ولاني بوياهـا=والقلوب القشر كبرت مواجعهـا
والله إني كل ماقلـت ابنساهـا=قابلتنـي صـدفـتٍ ماتوقعـهـا
ورجعتنـي للمحبـه وذكراهـا=والليال اللي مضت لي وأنا معها
كـل ماتطـري علـي أتمناهـا=عن هواها نفسي أزريت لاقنعها

لو البشـر تعلـم بغيـب الليالـي=لقيت كل إنسان عـارف مصيـره
لكن رحمه مـن عزيـز الجلالـي=غيب الليالي جعـل بالأمـر خيـره
نركض بها الدنيا يميـن وشمالـي=نـدور الأرزاق فـي كـل ديــره
نطرد ورى الدنيا بطـول الامالـي=كلٍ علـى ماقيـل يشعـب بعيـره
والموت في حبل الوريـد الموالـي=من انتهى اجله سلم أمـره لغيـره
ويالعبد دنيـاك آخرتهـا الزوالـي=لاتغـرك آمـال الحيـاة المثيـره
حافظ على دينك ترى العمر بالـي=إعبـادة المعبـود هـي البريـره
صوم وصلاه وحج وإحـذر تبالـي=في حب عـلام الخفـا والسريـره
وخلـك بطاعـة والدينـك مثالـي=مرضاتهـم يالعبـد طاعـه كبيـره
ووصل القريب وخل عنـك التعالـي=مقاطـع الأرحـام نـارٍ سعـيـره
وخلك لربعك مدهـلٍ بكـل حالـي=وبيتـك مقـرٍ للوجيـه السفيـره
بمعاشـرٍ طيـب وحلـو القبالـي=هذا يبـي شـورك وذا تستشيـره
وخلك على زلات ربعـك شمالـي=لاتدور الغلطـات لوهـي صغيـره
بالطيب جاز ليا حصل لـك مجالـي=ولا تجازي بالـردى مـن يثيـره
وإن طاح حظك بالرخيص إخذ غالي=الرخص يرخص والحقيره حقيـره
وإنهض ليا جاء واجبـك لاتبالـي=خلك مثل حد السيـوف الشطيـره
ترى الشجاعه عز بيـن الرجالـي=كـلٍ يهابـك والمـذلـه معـيـره
والطيب يرفع مـن مقـام العيالـي=ولا الردى راعيه يجـرح ضميـره
والكذب خيبه من سلـوب الخبالـي=والصدق نـورٍ للعـوارف ونيـره
والمرجله لو شفت صعبـة منالـي=الهـون مايعطيـك حبـة شعيـره
تبغى جهود مضاعفـه وإحتمالـي=ماهي بحاصلةٍ على هـون سيـره
وعقب التعب والصبر ترقى المعالي=وتجني ثمر صبر الزمان ومسيـره
نصيحـةٍ مابغـى وراهـا ريالـي=مهـداه منـي للوجيـه السفيـره

رفيقي اللي مايقف بالمهمات=وقت السعه لايعتبرني رفيقه
يكفي من هروج السعه كل مافات=في ساعت الشده تبين الحقيقه
عزلت من صدقان تقزير الاوقات=اهل المصالح والهروج الرقيقه
ربع الرخاء اللي تختفي عند الازمات=اليا بدأت حاجتك راحو سليقه
وقت الرخاء سوولك المستحيلات=ولاحتجتهم مثل السراب وبريقه
دار لزمان وشفت امورٍ كثيرات =كشف خفى قلب الشقيق وشقيقه
عشنا وشفنا وأول العمر سجات=نأخذ ونعطي والمنايا مويقه
خذنا تجارب والتجارب مفيدات=نساير الدنيا على اسهل طريقه
التجربه برهان عن كل شكات=تضهر مدى اخلاص الصديق لصديقه
طول المدى يضهر خفايا الاصيلات=والحر تعرف هدته وتحليقه
ماكل رجالٍ يحل الصعيبات=ولا كل من يبرك لحملٍ يطيقه
ابعد عن الخايب ترى العمر هقوات=الحر حر وكل عالي يويقه
مايلدغ المؤمن من الجحر مرّات=هذا مثل لاهل الاصول العريقه
بعدك عن اللي مايشرفك بالذات=حفظٍ لمقدارك مابين الخليقه
لايكتشف سدك عذولٍ وشمات=خله تنشف سود الايام ريقه
عليك بأهل الطيب وأهل المروات=عزك ليا صابك من الوقت ضيقه
ذخرك ليا صكك من الوقت صكات=ربعٍ يديهم بالمواقف طليقه
أشفق على الطيب ولطيب لذات=في حزته مثل العسل من رحيقه
الفرق واضح بين الاحياء والاموات=الحر يفهم والعليقه عليقه
ولا دايم الدنيا غناه ومسرات=تدور بين الثانيه والدقيقه
ومن لا إنتبه ماله على الناس شرهات=ماأحدٍ حسب له لو يولع حريقه

إلى متى؟ وأنـت تجرحنـي وتجفانـي!=اشكـي عليـك الجـروح ولاتعالجـنـي
إلى متى؟أخفي جـروح القلـب واعانـي=إلـى متى؟بالجفـا والصـد مزعجـنـي
ماهـو بمعقـول تجرحنـي وتنسـانـي=ولا هـو بمنطـق تصـد ولا تهرجنـي
لازم تغير مـن إسلوبـك علـى شانـي=تـرى طريقتـك هـاذي ماتخارجـنـي
أشكيلك الحـال وأشـرح ربـع ماجانـي=وأثرك في حبك تحـاول علـى سجنـي
الحـب بلـوى وأنـا حبـك تبـلانـي=ولا أدري متى يعطف الجاني على المجني
أخلصت لـك بالهـوى ياسيـد خلانـي=والله ماتلحـق جزايـه لـو تحججـنـي
شف لي طريقـه يكفـي منـك ماجانـي=القلـب مجـروح والسهـر متولجـنـي
قـدام بكـره تجـي مـاعـاد تلقـانـي=بالله يازيـن شـف حـلٍ يخارجـنـي

رفيقٍ مايقف وقت الشدايد رفقته تنعاف=غني(ن) عنه في وقت السعه ماأنته رفيقٍ له
رفيقك من يقاسمك الهموم ويحتمي الميقاف=ترى كلش طراته مثل ماقالوا على حله
رفيقك بالسعه ينكرك لاجاْت السنين عجاف=ليا منه وطاك الوقت صد وقالك خله
تعلمنا من أحداث التجارب قيمة الانصاف=عرفنا اللي يعقد الحبل واللي يقدر يحله
أخذنا بالحياه دروس والمبصر بعينه شاف=أحد يدمح خطأ ربعه وأحد يبحث ورى الزله
وأحد يطلع من ذراعه وأحد يطلع من الاكتاف=وأحد ضايع برايه وأد رايه للسنع دله
صحيح إن المواقف فارقه وإن الرجال أصناف=تشوف إخوان كلٍ له سلوب وطبع وجبله
حقايق والحقايق واضحه ماتجهل العراف=لبيب العقل يفهم مقصده قدام ياصل له
كتبنا وإختصرنا الهرج تركيزاً على الأهداف=ليا طال الكلام..المستمع لو جامله مله

الله انه يقطع الرجـل جحـاد الجميـل=لو عطيته كل طيبك ليا احتجتـه جحـد
والله ان مايجحد الطيبه رجـال اصيـل=اي رجلٍ يجحد الطيب عني ماش احـد
مشكله لاضاع طيبـك بجحـادٍ بخيـل=لاشبع من طيبك السبت ينساك الاحـد
ننخدع باهل المظاهر قليلين الحصيـل=والردي ستره عن العيب بالدنيا اللحـد
ماورى سودالليالي مـراح ولا مقيـل=وان تحداك اسود الوقت بظروفه تحـد
عد نفسك بالمواقف كما السيف الصقيل=حد سيـفٍ بالمهمـات مايبغـى محـد

يالله يالـلـي تعـلـم الـســر والـغـيـب=ياخـالـقٍ خلـقـه ومحـصـي عـددهــا
تفـرج لمـن يونـس بكبـده لواهيـب=لاأنــزاح هــمٍ جـالـه أمـــر وأدهـــا
سوت به سحـوت الليالـي تجاريـب=لاخلصـت هــاذي لـلاخـرى بعـدهـا
الوقت غثرب لـه جميـع المشاريـب=مافـيـه نـكـبـه صـابـتـه ماقـصـدهـا
يقنب من ضروفه كما يقنـب الذيـب=ومــن السـهـر كــم ليـلـةٍ مارقـدهـا
الوقت جرحه جـرح بيـن المحاديـب=الله يـاكــم مــــن رجــــالٍ لـهـدهــا
يالله دخيلـك مــن حـيـاة العواقـيـب=ومـن نكبـة الدنيـا وعيـشـة نكـدهـا
الصبـر مـر وطولـه الهـم والشـيـب=والـروح تاليـهـا السـكـون بلحـدهـا
واللي جداه يويـق روس المراقيـب=يـصـبـر لادور حـاجـتـه مـاوجـدهـا
ويطلب من المعبود معطي المطاليب=يجلـي عنـاء روحـه ويـأخـذ بيـدهـا
سبحانـه اللـي يعلـم السـر والغـيـب=هو منتهى الشكـوى وهـو معتمدهـا

يابو عيونٍ هدبها سود ووساعي=تكفى تجمل تراني رايحٍ فيها
بعض الحركات والله مالها الداعي=اللي عليه وأنا أحبك تسويها
أعرف سلوب اللكاعه والتلكاعي=لكن أجامل على شأنك وامشيها
أشعلت نار المحبه بين الاضلاعي=وتركتها عمد ماودك تطفيها
وأقفيت عني وأنا محتار بأوضاعي=ماغير اكيل الروابع وش تواليها
ياأهل ترى يشبع اللي بالهوى جاعي=ولا مع الجوع يهلك في مضاميها
سلهامتك بالعيون تنقض أوجاعي=سود النواعس تضيع من يراعيها
ارحم تراني من الحرمان ملتاعي=ياكبر لوعة غرامك بس اخفيها
تنام وأنا الفجر يذن وأنا واعي=ارجيك يامسبب جروحي تداويها
افرك كفوف الندم واطقق أصباعي=عل وعسى ميت الامآل تحييها
صبري قضى والعمر من سبتك ضاعي=إلى متى وأنت روحي معك مشقيها
اما تجمل معي يازين الاطباعي=ولا إترك الروح فيها مامكفيها
مافيه داعي تعذبني بلا داعي=تأخذ من الروح وأنته ماأنت معطيها

تبكي فلسطين الجريحة عربها=مليار مسلم تقل ماهم بمليار
رهينتن تندب ولااحدٍ ندبها=دم العرب بارد وهي دمها حار
ناسٍ تفكر في سلامة رتبها=ما فكرت بالخزي والذل والعار
تبكي صلاح الدين مطلق نشبها=اللي بذل من شانها غال الاعمار
نخوة مره حرر بلد من سببها=واليوم راح الثار من ياخذ الثار
ولاخير في لحيه ماتحمى شنبها=مادام ماتفزع ليا صار ما صار
ويبقى الامل بالله ثم اللي حسبها=عبدالله اللي بالمواقيف مغوار
يقدر يخلص نكبة اللي نكبها=لانه يثمن قيمه الدين والجار

إليا أذن المذن تعوذ من إبليس=لوحيت ذكر الله عليك إحترامه
نزل ماوسط إيديك مابه مجاليس=ترى الكسل عن طاعة الله رخامه
الله غني ولا عباده مفاليس=العبد ماربه بحاجة مقامه
لاتغرك الدنيا وجمع القراطيس=وتطيح من ركضٍ وراها العمامه
إحذر..!! ترى الدنيا مثل لقطة غليس=مامن وراها الا التعب والندامه
العمر فرصه والمنايا متاريس=ولاتنفع الاعذار يوم القيامه
دنيا متاع ولاعليها مقاييس=مادامت لخير العباد إستقامه
محمد اللي أسس الدين تأسيس=أفضل صلاة الله عليه وسلامه