~~ رساله لك ِ يا إبنة حواء ~~

بسم الله الرحمن الرحيم
السلام عليكم و رحمة الله و بركاته ..

أبكتب الموضوع باللهجه العاميه طلبا ً للمزيد من الشفافيه ..

لأن أسطر الموضوع تمثل رساله خاصه لك ِ اختي الحبيبه ..

حبيت أتكلم بكل شفافيه و وضوح و جرأه ..

طبعا ً مثل ما حنا عارفات فيه نوعين من البنات من ناحية الشكل و المضمون ..

يعني تجي بنت ما لها هم إلا الميك أو اللبس وووووو و هي للأسف فارغه ..

أقصد عن هالبنت ( شكل بدون مضمون ) ..

يعني بصراحه شي مؤسف إننا نشوف بنات بهالوضع ..

تجلسين معها تطلع فيلسوفه بالمكياج و الماركات العالميه للأزياء ..

لكن إسأليها سؤال ثقافي .. أو بالأصح حاولي تديرين معها نقاش ..

على فكره النقاش اللي أقصده ماهو النقاش بالوضع السياسي او الإجتماعي أو الديني للأمه أو من هالنقاشات اللي نديرها بالمنتديات و الصحف ..

لكن حاولي تديرين أو تبدأين معها ( سوالف ) تلامس الواقع مثلا ً وضع الأسره ..
أو وضع البيئه اللي تعيش فيها ..

أو على الأقل وضعها هي النفسي و المعيشي ..

للأسف ما تلقينها قادره على الكلام أو بالأصح ماهي قادره تستجوب معك بحديثك ..

و هذا والله شي مؤسف بحق ,,
و للأسف إنه واقع الكثير من البنات ..

طيب نجي للنوعيه الثانيه : هذي عاد كل همها و شغلها بهالدنيا هو الكلام بالمجتمع و العولمه و الإمبرياليه ووووو ..

لكن تعالي شوفيها بمظهرها .. لا تجدين أي إهتمام بالشكل ..

مثل هالنوعيه تنفر الناس منها و من حديثها ..

أوكي وقت الجد جد و قت الترويح عن النفس مطلوب بعد ..

حنا بحاجه يا بنات لعمل موازنه بين ( الشكل و المضمون ) ..

شلون ؟؟؟؟


يعني أوكي نهتم بالشكل و اللبس و المكياج و بنفس الوقت ننمني ثقافتنا ..

نقرأ .. نستطلع .. نعرف كل جديد بالعالم ..

نعرف سلبيات أي قضيه و نحاول نتجنبها و نجنب أخواتنا و أطفالنا و مجتمعنا منها ..

نبحث بالإيجابيات .. ننمي مداركنا .. نزرع الأفكار الجميله بنفوس أطفالنا و إخواننا الصغار ..

نؤثر في المجتمع .. نرسم لنا قاعده واضحه في فن الحوار و التعامل مع الآخرين .

أنا متأكده إن كل وحده فينا فكرها ما شاء الله ممتاز ..

و تحمل ثقافه رائعه بمجال دراستها أو بمجال هوايتها ..

ترى غيرنا ما هن أحسن منا ..

ما نبيهم يقولون المرأه السعوديه حقة أكل و مرعى و قلة صنعه !!

ليش طايحه من عيونهم المرأه السعوديه !!

المرأه السعوديه تحمل من الفكر الممزوج بالأخلاق العاليه ما يجعلها ملكه ..

و تاج على رؤوسهم ..

يلا يا بنت السعوديه وريهم إنك قد التحدي ..

إقرأي .. طيب أوكي ما تحبين القراءه .. حاولي تحبينها ..

ليش حنا إنولدنا من بطون أمهاتنا و بيدينا كتب مثلا ً !!

فيه أشياء ما تستسيغها النفس يعني مثلا ً تقولين أنا ما أحب الطبخ يمكن هذا راجع لك ..

لكن القراءه أظنها أمر فطري في نفس الإنسان ..

أصلا أي إنسان يحب (يعرف )

ينمي مداركه .. ما يحب يوقف حياته عند معلومه معينه و يقفل مخه ..

ترى الإنسان بلا فكر و ثقافه مثل الشجره الضعيفه في مهب الريح ...

طيب إنتي بتكبرين و تتزوجين و تصيرين أم ..

تخيلي جاك ولدك و قال : يمه اليوم الأستاذ يكلمنا عن العولمه .. وش هي العولمه ذي ؟؟؟

وش تبين تقولين له ؟؟ و ش تردين عليه ؟؟؟

و الا الثاني يجي و يقولك : يمه صح أو خطأ اللي يفجرون عشان يساعدون إخواننا المسلمين ؟؟؟
وش بتقولين له و خاصه بهذه القضيه المشربكه ؟؟ و أنتي تعلمين إن الجهاد أمر ديني و في نفس الوقت التفجير و تدمير الممتلكات أمر محرم ؟؟

كيف توضحين له صغائر الأمور اللي تفصل بين الحق و الباطل بشكل يقدر يستوعبه إبنك ؟؟

أو جتك بنتك و قالت يمه عندي تعبير عن المراهقه و كيف نتعامل مع المراهق ؟؟؟

وش تبين تردين عليها ؟؟؟؟؟؟

أو مثلا شفتي بنتك داخلة النت و تتصفح المواقع .. كيف تبين توضحين إيجابيات و سلبيات النت .. بشكل يقنعها و يشبع تساؤلاتها ؟؟؟

أو تجيك بنتك و تقول: يمه إشتري لي عباة كتف ..

ولما تقولين لها عباة الراس أفضل

ترد عليك و تقول : بس أبله أمل لابسه عباة كتف ..

كيف توضحين لها إن المعلمه أكيد قدوه لطالباتها و في نفس الوقت الطالبه عندها عقل تفكر فيه و دين تقيس عليه أفكارها ..

مو كل شي سوته الأبله تروح تسويه الطالبه بحجة إن الأبله قدوة الطالبه!

إذا ما أقنعتيهم بالأجوبه فمصيرهم أصدقاء السوء و الإنحراف و التطرف !!




الـــشــــامــــخـــــه

الأخت الشامخه

مشكوره على جهودك الرائعه والمفيده

بارك الله فيك ويعطيك العافيه

تقبلي تحياتي

ودمتي بخير

يعطيج العافيه يالشامخه

ألف شكر على الموضوع

مشكورة اختي الشامخة وفعلا يجب ان تجمع الفتاة بين


جمال المنظر


والفكر المتقدم والواعي

ولايكمل الفكر الا بلقراءة والاطلاع


وايضا التفقه في امور الدين والعقيدة لنجادل من يجادلنا في ديننا


شكراااااااااااالكي يااالشامخة على الموضع


الاكثر من رائع اختي الغالية

كل الشكر و التقدير لكم جميعا ً

أسعدني حضوركم

بارك الله فيك

مشكوره اختي

أسعدني حضورك

الله عليك ياالشامخه والله كلامك درر ما ينمل منه

اختي انا معك في وجهة نضرك صحيح اصبحة لغة المكياج و الماركات العالميه

فيكل مجلس بنات درجه بنهم والله لاعد المجلس مثل زمان لافيه ذكر ولا اي محفز اسلامي ...
الا كلام القيل والقال افضل شي جلوس الوحده في بيتها احسن من هذه كله ...

ويجب على البنات الاتزام بالشكل الخارجي والداخلي .من حيت البس المحتشم

والاهتمام بمنضرها لان اقلب البنات يقلدون الغرب في لبسها وشكل الشعر وكل شي خارجي

تعالي وتكلمي معها ايشي من الناحيه الدينيه اوالعلميه تجديها لاعلم ولاثقافه

ليه هذه كله يصير في بنات الاسلام ؟الى الان مالقيت الجواب الشافي على سوالي

قديكون قلت القراءة والاطلاع الي المستجدات واكتفو بالذي حصلوه ايام الدراسه

اختي ابنتي تجي كل يوم من المدرسه وعقلها ملي باشى غريبه تكثر الاسئله

ماما صديقتي قالت كدى وفعلت كدى تصدقين انه اسئله كتيره ونتجوب انا وهي

عن طريق الاقناع والحجج الصحيحه حتي اتغلب على جميع اسئلتها

وتكون هي مغتنعا بالجواب والله على عهدي بالدراسه ماكان حال المدرس مثل الان

اختي الموضوع يطول النقاش فيه لانه لهو عدة محاور .والله يستر على بناتي

يارب العالمين في زمن المتغيرات

اختك امة الله

أمة الله . الله يخلي لك بناتك .


و أشكر لك حضورك الرائع و الغير مستغرب عليك اخيتي .

و إضافتك كانت جدا ً رائعه و أثرت الموضوع بكل ماهو مفيد لنا .