محمد الربيقي..*..فهد العازمي..(صاحبي توه صحى واحتاج شربة من صميلة )

هذه المحاورة بين الشاعرين ، الشاعر
المبدع و الراقي أينما حلّ محمد عبيد الربيقي
و الشاعر فهد نعيم العازمي..

العوازم فالبلاد أصحابنا مدة طويله..=..بيننا جيرة وعلمٍ غير من ماض الليالي
يافهد جاء لك مجال و صوت من عقب الكحيله..=..وأنت غالي والمجال اللي نسولف عنه غالي
=فهد العازمي:
العوازم فالبلاد و من رجال و من قبيله..=..وانت بالنسبة لنا يالحربي الصف الموالي
يا محمد ما رضيت ولا رضيتوا بالقليله..=..والصعيب يصير بالمشعاب ولاّ بالريالي
=محمد الربيقي:
المجال اللي نسولف عنه هذا أكبر دليله..=..كل ماهبّ الهواء حيد الغصون الخضر مالي
ياأهل البيت الجنوبي والقصور المستطيلة..=..اعرفوا نطق الكلام وميزوا وسم الجمالي
= فهد العازمي:
أنت غنيت إلك ليلة و اختصرت ألفين ليلة..=..ولاّ انا وقتي مشيب عارضي ياهملالي..!
بارك الله فالعميل اللي عرف قيمة عميلة..=..والجواب يجيك يا محمد على قد السؤالي
=محمد الربيقي:
أنت أظنّك ياعميلي شاعرٍ ما فيك حيلة..=..شفت ضوح البرق قلت البرق أظنّه بالشمالي..!
البعير أليا برك للحمل لابده يشيله..=..وإن عجز قلنا حلال يروح من ضمن الحلالي..!
= فهد العازمي:
الرجال يغامرون ويصنعون المستحيلة..=..مادرينا عن هذاك البرق لين السيل سالي
مانقول العولمة حاجة على الدنيا دخيلة..=..الغريب الناس يا محمد دخل فيها الخبالي
=محمد الربيقي:
صاحبي توه صحى و أحتاج شربة من صميلة..=..ما درى إن الماء قضى واللي بقاء ماهو بحالي
ربما تلقى وسيلة كان باقٍ لك وسيلة..=..و إن غدت يمكن تذكرها ليا هلّ الهلالي
=فهد العازمي:
عارفين الحمل الأيمن مار مدري وش عديلة..=..يالحروب اللي تحطون الخفاف مع الثقالي..!

مع تمنياتي لكم بمتابعه ممتعه،،

صح لسان الشعراء

والله يعطيك العافيه على النقل شاعرنا القدير فهد المحسن و فقدناك من فتره

ومن طول الغيبات جاب الغنايم

شاعرنا / فهد المحسن

بيض الله وجهك على هذا الجهد الكبير الذي تبذله تجاه ملتقى حرب بصفة عامة و محمد الربيقي بصفة خاصة .

و صح لسان الشاعرين / محمد الربيقي و فهد العازمي على هذه المحاورة الجميلة بمعانيها
و نتمنى التوفيق لشاعرنا / محمد الربيقي0

شاعرنا الجزل فهد المحسن لاهنت على هذا الاختيار الموفق وصحت السنت الشاعرين محمد الربيقي وفهد العازمي ومحاوره راقيه ورائعه سلمت يمينك وتقبل تحيتي

بارك الله فيك أخي فهد المحسن
على النقل الرائع
لهذه المحاورة الجميلة للشاعر المبدع محمد الربيقي و الشاعر فهد العازمي .

بيض الله وجهك على النقل
وصحة السنت الشاعرين محمد الربيقي وفهد العازمي

يعطيك العافية وسلموا الشعار الكبار على هذه المحاورة الجميلة ..

الرااائع
فهد المحسن تسلم
على النقل المميز
والجزل وصح لسان شاعرنا المبدع كعادته


اجمل تحيه وتقديرلك

اخي فهد المحسن

لك جزيل شكري وتقديري

بيض الله وجهك

وبيض الله وجه ابو عبيد عز الله انه بحر طامي

اتمنى له التوفيق في كل حياته

وصح الله لسانيهما على مما ابدعا من شعر جزيل ومعنى جميل

تقبل مروري بود

الاخوة الاعزاء..
حمود الجابري
حميدان العوفي
مضحي بن جمران
الحميدي المخلفي
الواصل
العطري
حمود الرزني
البلادي الحربي



كل الشكر والتقدير لكم على مروركم
والله لايهينكم ..تحياتي لكم