ديوان الشاعر نايف الحبلاني ( شاعر الحدث )

وجدي وجود اللي من الدين غرقان=دفاتـر ديونـه ملتهـا الأسـامـي
في كل يوم يجيـه عشريـن ديـان=ماهم خـوال وربـع والأ عمامـي
كل اعملاه اصحاب خبره وشيبـان=مشي الطمع فيها سـوات النوامـي
قـدام بيتـه كـلاً يلـد الأعـيـان=تقـول عـدً مزدحـم بالضـوامـي
ماتقبل المعـذار لـو كـان ماكـان=لو صاحوا الورعان بابـا يامامـي
الكـل قلبـه بالدنانيـر عشـقـان=ومن الطمع كلاً بصـدره وسامـي
تمسي وتصبح همها فـلان وفـلان=وكلاً علـى حقـه شجيـعً قطامـي
واللي ماجوه يجون مافيهـم امـان=مثبّتـه بيـن القـلـم والبهـامـي
في كمبياله ثابتـه والوعـد حـان=لو حط له من دون حالـه محامـي
ما باقي الا جيب شرطـه وسجّـان=ومرافقين ثنيـن خلفـي وامامـي
واللا وجود اللي على البير ضميان=ماشي دلو في فـج كلـه عسامـي
ولا فيه من حظه منـازل وسكـان=والطير فيه من الحـراره ماحامـي
مافيه غير الشيح محمر الأغصـان=بعد الخضار وريح نبـت الخزامـي
في يوم لو حظه ملازمـه مـا زان=من بعد فرض الظهر والوقت حامي
واقف يلد ايمين وايسـار حيـران=ومن الضماء مايستطيـع الكلامـي
على هنـوفً كنهـا البـدر لابـان=في ديرةً غالـب عليهـا الظلامـي
احترت لكن شايف البـدر عنـوان=ما تشبـه الا نـور بـدر التمامـي
اخدود بارق صيف والخشم شامـان=والموت لا لبسـت عليـه اللثامـي
اشهد لها بالزين من دون حقـران=في كل نسوان الرجـال الحشامـي
الطول باحلا طول والجسـم ريـان=من الحجـاز وكنهـا بنـت شامـي
لو شافها واحد ماله بالهوى شـان=رفع لها عقاله عجـب واحترامـي
لكنها راحت علـى غيـر برهـان=من دون سابق علم .. جفلة حرامي
حدي بهـا ليلـة ثلاثيـن شعبـان=اللي بعدها حـل شهـر الصيامـي
من يومها صبر وتحمّـل وكتمـان=ماغير من منـزل هلـى للدوامـي
همي تشعب صار له سرج واعنـان=واحصان ضاريبي على الاقتحامـي
الصبح له ميـدان والليـل ميـدان=ماعاد يهنانـي شـراب وطعامـي
واين انت ياوقتً مضى بين الاخوان=مارقد وقلبي فيـه كبـر الجرامـي
لي خال مـا يزهمنـي الا يانومـان=قدام اعـرف مردعـات الوشامـي
واليوم اساهر يصبح الصبح سهران=عينـي محاربهـا لذيـذ المنامـي
تطلع علي الشمس وتغيب ولهـان=بالبيت والباقـي نهـار استلامـي
مانـي بناسيهـا ولا نـي بقنعـان=استيسرت قلبـي وكامـل قوامـي
زرعت زرع الود والقلـب وديـان=ومرت سموم البعد واصبح حطامـي
ماغير من قيفـان وابـدأ بقيفـان=ماعـاد لـي حيـلً تقلـه عظامـي
كل المنى راحـت سـرابً بقيعـان=بالقيض فيها الزمل ضميـا حيامـي
من بعـد ماكنـا حبايـب وخـلان=واسهم غلاه تزيد مع كـل عامـي
مستوطن بداخل حشا قلب شفقـان=حبيتهـا واصبحـت ملـزم لزامـي
شوقي لها في داخلي فـوح بركـان=ويسوقني سوق الجمـل بالخطامـي
وش ينفع الصيّاح لا صاح ندمـان=حبي طغى لو حبـي إلهـا حرامـي
ما غير من شريان يسري بشريان=يمشي مع الشريان مشي السوامـي
والعيب قلبي قلب راغـب وطمعـان=وفيه الوفا من فوق مرسـاه نامـي
ازعل لا شفته ضايق البال زعـلان=ومعطيـه بالايـام كـل اهتمـامـي
اليـوم راح وكـل ليلـه بنقصـان=وقلبي ملاه الشوق واخلف نظامـي
اصبحت انا والهم رفقـه وصدقـان=وصبري نفذ من بعد ماهو حزامـي
تقطعـت كـل السبـل ياسليـمـان=مافادنـي طيبـي و كثـر التزامـي
اقفت وخلتني على قـرن شيطـان=ولا نلت منها الا القهـر والاثامـي
راحت بعد رحلة محبـه وصفطـان=و بعد السعد والضحك والانسجامـي
ما عاد اميز فوق ذاك الزمن شـان=شين الزمن والهجر صاروا خصامي
صاروا يابو خالد موانـع وعـدوان=وش يحتمل قلـبً مـلاه الغرامـي
والمشكله كله خطا انسان بانسـان=عزّز حصون البعد وانهى مرامـي
قبل الختام اعلنت في قسم الاعـلان=مع فرقة العزله بديـت انضمامـي
وانته بابو خالد ولد ذرف الايمـان=راع الوفا عضدي نهـار الزحامـي
ياللي مواقيعـك مواقيـع شيهـان=زبـن المراجـل يارفيـع المقامـي
ان جيت ابن عمك نسيبك مسيـان=قله ولـد غانـم عليـه السلامـي
اصبح ضحية غدر باين وهجـران=لو مات لا تكثـر عليـه الملامـي
كم غيره من اهل الهوى مات هويان=يالله ترزقنـا بحـسـن الختـامـي

هذه مراسله بيني وبين نايف الحرير العمري عندما طلبني طلب والحقيقه وعدته وقلت له خير ان شاءالله يوم السبت اتصل بي ولكن الرجال ما صبر ارسل من جوال اخيه ابو ريان ثلاث ابيات من باب التذكير ورديت عليه في حينها وهو يوم الجمعه الذي قبل السبت مباشره

ابيات للشاعر : نايف الحرير العمري

قم واضبط النيشان مع طلعت النور=واسرح على اللي للمسافه شفوقه
واغز الديار اللي بها الظبي مخبور=وقص الاثر قـدام لتطيـح فوقـه
ثم ايتني بالقايمه مانـت معـذور=راع القنص دايم عزومه سبوقـه

رد الشاعر نايف الحبلاني

رن الجهاز وقمت له كلـي شعـور=وارمش مثل نـوً تكاشـف بروقـه
جوّال ابو ريـان رجـال مستـور=ما غيّره عن منهج الديـن شوقـه
حامل رساله واضحه باربع سطـور=من صاحبً ما فيـه بـوره وبوقـه
أخوه نايف راعي العرف والشـور=راع البيوت اللي نشت من خفوقـه
وصلت جهازي ما توانت على الفور=وفي كل شطر اشواق روحه تسوقه
من قلبه اللي ما توالف على الزور=مضمونها واضح ونفسـه صدوقـه
وانا الحريص بلازمي دون مقصور=حرص الحرير لشوف زمله ونوقـه
قلـه يابـو ريـان بالله وماجـور=العلم واضح عنـد منهـو عنوقـه
ما خلفت لي نيه لها الطيب دستـور=نيّة وفاء للخيـر وضحـا سبوقـه
يرتاح ماله غير من يكمـل الـدور=صبره وحتى السبت يظهر شروقـه
وراه لو مرباعـه بوسـط لاهـور=والا تـرا دقنـي يارجـل محلوقـه
ماله ياغير الظبي لو دونـه سبـور=مذبوح من سرعي تراقص عروقـه
من ماقعه ما بين ريعان وصخـور=ريح الرعي ما صدّرت من شدوقـه
يمسي ويصبح طيّب القلب مسـرور=الصاحب اللـي حفزتنـي طروقـه

نايف الحبلاني ( شاعر الحدث )

مساحة المجلس مع العرض والطول = مترين في مترين ماشي مساحه
لكن وراء صغره له البارحه حول= ماحدً طرق بابه مساه و صباحه
عاماً مضى مقسوم بين اربع فصول = صبرت حتى القلب زادت جراحه
احترت بالموضوع مدري وش اقول = ان كان ماش ضيوف بطلق سراحه
ابيع اثاثه واقفل الباب بقفول = واكتب عليه معرّضاً للازاحه
على طلب راعيه ماهو بمجهول = اللي غلاق الدور يصبح براحه
مهبول !! قولو لي مهستر ومهبول = لا اظهرت ما بالقلب زاد إرتياحه
واللي مخالفني له الحق مدبول = عند الرجال اهل العدل والفصاحه
فيهم سعيد اليا حصل عقد واحلول = ياليت مايبخل على باقتراحه
رجال بالوقفات له علم مدلول = والعرف والمعروف لا بس وشاحه
واللي يجي من زمرة العرف مقبول = واسعد خبر لا قالوا اطلق سراحه

ياهجوسي حضّري محزمك حان الشعر حان = حضرتك يمناي بعد الله رب العالمين
اعتزيبك ياهجوسي واللسان الترجمان = يوم بعض الناس لامنه طلبها ماتبين
حضري لي كل مافي وسعك برفق وضمان = وانثري أبدع خيالك بين خشم وبين عين
أنتي رهن أشارتي في معركة شعري حصان = أنظم أشعاري بعد سرجه وسيفي لك عوين
مسرجه بالعرف والحكمه وتفكيري عنان = بقحم عناد القوافي لين قاسيها يلين
في ميادين الغزل مابين خوف وبين أمان = ساحة فيها سيوف الموت للعاشق تزين
وأبتدي بأول غراتي مدح في كل إتزان = في حبيبه حبها يزداد مع دور السنين
إعتلت ضلع المحبه مايزحزحها الزمان = رمزها الإخلاص والمعروف حين وكل حين
طيفها لا غبت رهن العين ماتخفى ثوان = وسكنت بالقلب مابين البطين وبين أذين
تسرح أفكار العرب لكن فكري في رسان = ماستطيع أسج ركبه عنه شام ولايمين
أعشقه عشق المطوع للصلاه وللأذان = وأعشقه عشق البدو للغيث والعلم الثمين
كل حرف من إسمه أعزه ويحمل له معان = أربع أحرف في حشا صدري لها قلبي عرين
قلتها واقولها من قلب وإحساس ولسان = وارسم بريشة صدوق فوق صفحات الحنين
وإستعنت بكامل حروف الهجاء باااقي كمااان = فيه شي بوسط قلبي ماذكر خافي دفين
أحتفظ به خايف من الناس وسهوم العيان = الحسد في تالي الأيام ملجاء الحاقدين
يحفظه ربي عشقته عشق لا حد الجنان = أستعن بالله وغير الله ربي ماستعين
إبتليت بحبها واصدر على ذلك بيان = يحمل بطيات صفحاته مجرد كلمتين
(أعشقه واهواه) كاتبها وصدري له مكان = من حبر صدق المشاعر مايغيره السنين

البارق اللي له بعد فرض العشا ضوح وشعاع =فوق الديار اللي سبب حبي لها من جالها
ام الجمال اللي يسّر القلب وعيونً وساع = حلت بها قدام ذو الحجه يهل هلالها
جعله يهل ويسقي الديره شهر دون انقطاع = حتى يعل اسهولها وشعابها وجبالها
فيها هنوفً خالها شامي ووالدها شجاع = من ديرة ابن سعود ياجعل السعاده فالها
حظه رمابه يوم راد الله نصا سهل البقاع = واستقطب ام الزين يوم الزين جا من خالها
تو استقرت ما معاها غير زينتها متاع = فيها الحلا كله وهو اللي رفع منزالها
الموت في منطوقها يفرض عليك الأستماع = مخالطه ضحك وغنج كل الدلع يحلالها
حبي لها بالقلب يلقح كل ليله باتساع = ماسك من ايمين الضلوع الحدب لين شمالها
اللي سبايبها ركبت اكبر بوابير الضياع = حمله من حمول العنا سيقت وانا جمالها
اصبحت انا والنوم لي مده مطاليب وصراع = مدري متى تلطف بحالي واعلن استقبالها
ارتحت من عنو السفر ما بين نزله وارتفاع = استوطنت والعقده الصعبه حضر حلالها
لكن اشوف الوضع باقي خايف ان الحلم ضاع = حتى وهي ماهي بعيده عاندت بوصالها
حدّت سكاكين الرزانه والتغطرس والخداع = واصبحت واحد من ضحايا كبرها واهمالها
وشيب عيني ما تخاف الله تحايل للوداع = ماتدري ان الحسنه الوحده بعشر امثالها
اجري على الله لو يصير اللي يصير امره مطاع = الصبر طيّب يمكن تعّود توسّع بالها
لو اعرف ان الصد والهجران لاع القلب لاع = ابا تحرا لين اشوف وحالنا من حالها
ما ضاع وقت ابجتهد والحاجه ام الاختراع = اما قنعت ورحت ولا جيتكم مشتالها

شاعر وله في قمة الشعر منزال= ماهو مجرد سرد لحن ومواقيف
بنات فكره بين نازل ورحال = رهن الأشاره من سلالة معاريف
لو تختفي عن فكره ايام واليال = عند الطلب جنّه سرايا مناكيف
الكل منهن مقبله تشرح البال = والهن مع الأنكاف صوت وغطاريف
ابوهن اللي يحسن القول لا قال = فكره لا راحت بين حكم وتواصيف
ينظم بيوت وكلها اصحاح واجزال = انعم من الفلين وارهف من السيف
من قلب صادق عنده العرف تمثال= ماراح خلف الدندنه والمعازيف
مشّرع للطيب والود مدخال = في جوف صدره بين لحم وغضاريف
سيمه خلقها الله على كل الأحوال = المحصي المعبود يعبد ولا شيف
بامره رست ماهمّها الوقت لو طال = معها الوفا والأستقامه مواليف
وان عوّدة للفتل والنقض حلاّل =وبالوقت ماضاقت عليه المحاريف
تدرون من قصدي هنا مين يارجال ؟؟؟؟ = القصد انا من ينكر اهل المواقيف
واللي بقلبه شك باقي ولا زال = الصيف مقبل والوعد عطلة الصيف

بسم الله الرحمن رازق حي في عمق البحار = الخالق اللي رافع السبع الشداد بلا عمد
فارض على العبد الصلاه مقسّمه ليل ونهار = نبدأ بذكره ربنا سبحانه الفرد الصمد
من بعد ماسميت اببدأ في كلامي باقتدار= مدام لي شعري ومخزونه عدد ماله عدد
في مهجتي واصبح حكر محفوظ مثل اي احتكار= ماقول غير الله يكافينا من انصار الحسد
ابدأ واقول الليل يابو جود خذها باختصار = جّدد جوازك من جوازات المدينه واستعد
انته وانا والحر دايم يعشق مخاوى الحرار = طالبك والدنيا كذا يبغالها عزم وجهد
حتى التذاكر خلها من مكتب اخطوط المطار = الموعد الساعه ثلاث العصر من يوم الاحد
تكفى دخيلك مالي الا الله ثم اهل الوقار = انت السند لا عوّد الطاري على ذكر السند
انت العضيد اليا تلعثم منطقي والفكر حار = كلي طمع في خوتك ماغير هالمقصد ابد
قدام لا يحرق عروق القلب حر الإنتظار = ليه ثلاث سنين يابو جود في هذا الصدد
ماعاد فيها عزّم الخاطر وصّدر له قرار = مضمونه الرحله وموعدها بعد واسم البلد
رحله سياحيه مافيها لا يمين ولا يسار = من خاطرً جيته على المقصود يومنه قصد
مال الرذيله في مقاصيده عناوين وشعار = اقولها من قلب صادق خذني في هذي ولد
ان قلت وان ماقلت يابو جود مافيها خيار = فرصه مدام الخير وافر شد حيلك واعتمد
خوتك مكسب وانتعرف زين ونشوف الديار = نمشي على قول المثل ماضاع من راح ونشد
رمز الطبيعه والطراوه كلها والأزدهار = اللي ماغير امطار حسب القول وبروق ورعد
وش عاد لا صار المطر هتان والدنيا خضار = على غروب الشمس كلاً نصّب الفرش وقعد
تنسى النوادي من صمل وقّع ومن روّح معار = وتنسى الليال اللي لا جيت البيت ما فالبيت احد
وتنسى العراق ومشنقة صدام واسلاح الدمار = وتنسى حماس وطالبان وشاااااشة الساحه بعد
واخر ماقول ان كان ماصّدرت صك الأعتذار = ود( المره ) لا خوانها واصحى تسلمها العهد
وامسك طريق الدايري والعصر موعدك المطار = كلاً يجهّز في تذااااكر رحلته حسب الوعد

مرحبا باللي غلاه يفوق غلوي للشقيق = الوفا طبعه وعنوان الصداقه مرجعه
يازبون المرجله ياللي على الرفقه شفيق = ياوسيع العرف ياراع المزايا المقنعه
الوفا والطيب والمعروف والقلب الذويق = كلها فيك المزايا اللي ذكرت الأربعه
كان ابو غانم مقّدم حضرتك رتبة فريق = في سرايا العرف ماغيرك وقت الزعزعه
وصلت ابياتك عبر موقع بواسلنا العريق = وافتخر من بدعها وبكل حرفً تبدعه
طيبتك لو وزّعت تضفي على كل الفريق = في سماء صيتك ومقدارك وشخصك مقلعه
انت ابو للجود يابو جود للشينه معيق = من وفاك ارخيت دون الشين سود الأقنعه
واثق الخطوه حكيم الراي مثلك مايبيق = يوم بعض الناس ضايع في دروب المعمعه
فيك عذب المفردات وصرت للجزله عشيق = عند مطلوبك تجيك بكل رغبه مسرعه
سيف عرفك في ميادين الوفا يبرق بريق = والقوافي تنحني لك ضيق والأ في سعه
كلها معنى وذوق ومدح والوصف الدقيق = صرت للاشعار والقيفان قصد ومطمعه
مدرسه في حنّكة التركيب والمعنى العميق = والقصيد يبان طيبه من رداه بمطلعه
افتخر بك والردي يالله لعله في حريق = كان للابداع قمه موضعك من موضعه

مادام اليوم ذكرى وطنيه واجب علينا المشاركه بقصيده وطنيه ...........

اقولها من قلب واحساس وضمير = واللي درا يخبر بها اللي ما درا
هذا الوطن له حب في قلبي كبير = بالصدر مرباعه وفي جسمي سرى
ماسك من اول ضلع للضلع الاخير = مع كل جنب الايمنا والايسرا
فيه الطمانينه وخير الله كثير = والحمد لله كل شي ميسّرا
فيه القصايد من غلاته ما تحير = رهن الاشاره فزعها فزع اخيرا
والروح وفحول المشاعر تستثير = ترزم تحت عوج الحنايا من يرا
بوجود قادتنا البواسل مستنير = دار احتوى صفوة مشايخ ووامرا
منبع قداسه والعرب ورد وصدير = من طيبه ام الطيب لين ام القرى
ومن المصايف وش ورا سودة عسير = تغني عن المصياف بالشام وورا
والطااااايف ونسمة هواه ازكى عبير = يناطح الرجال لا اقبل مع كرا
وله حب في جوف الضماير حب غير = حبه ودمي بالشرايين اخشرا
عز وفخر بقيادة الشهم الخبير = اللي لا جا للخير طاري ! لي طرا
عبدالله المحبوب ياعون الضرير = اللي على كل الوطن ستر وذرا
بلسم جروح الشعب مدهال الفقير = الله ياكم جرحً من افضاله برا
زبن الدخيل وراعي المد الوفير = خيره مثل صدق السحاب اليا امطرا
ضافي بخيره للكبير و للصغير = اللي قرا واللي بمهده ما قرا
هذا وابو خالد عضيده بالمسير = له وسط سوق الطيب بيع ومشترا
امير بالمنصب وبالوقفات امير = هداج تيما جم ما فيه اكدرا
والقرم نايف جابر العظم الكسير = سقم العدو قاطع محابيل الزرا
للداخليه قايد وعون ووزير = تفخر به شعوب العرب مدن وقرى
واختامها قولي من احساس وضمير = واللي درا يخبر به اللي مادرا
وان قلت حبه غير يعني حب غير = حبه ودمي بالشرايين اخشرا

مع تحيات شاعر الحدث : نايف الحبلاني ..