ابن زويبن .. يـثـنـي على الشاعر/ عضيب الحربي بقصيدة

السلام عليكم ورحمة الله وبركاته ..
إخواني الغالين أقدم لكم هذه الهديه ..
قصيدة للشاعر الكبير المعجزه عبد الله بن زويبن المعمري الحربي
وهو يمدح بها الداهيه عضيب ويمدح قبيلة حرب وكذلك سبيل بن سند ومحمد شبيب الحداري ..
أتمنى لكم وقت ممتع مع قصيدة ابن زويبن الشاعر العلم ..
الحقيقه يحق لنا الفخر بكل شعراء حرب سواء سبيل بن سند أو
الشاعر عضيب هليل او محمد الحداري فكلهم أعلام ويستحقون
المدح وعسى الله يبارك ببن زويبن ...

من اليمامه قم تولّم يا نديب = الله يفكك من عراقيل السفر
من فوق جيب(ن) من بلاده توْ جيب = من طبته للمملكه ما له شهر
اليا مشيت العصر مع ستر الحبيب= قبل تغيب الشمس وأنته بالحفر
ملفاك بيت(ن) للبعيد وللقريب= مشرّع(ن) بابه على طول الدهر
راعيه رجال(ن) عضب واسمه عضيب= اللي على الناموس والطيب اشتهر
ما هو كبير وشاربه مليان شيب= من كثر صكات الدهر ما هو كبر
مشيّبه كثر المصالا للهيب= والحمس فوق الجمر الأشقر والسهر
على دلال(ن) وزنهن نثر السريب= غثو(ن) على مقلع شجرة(ن) في مقر
وشيل الصواني في كبيرات العصيب= اللي مكبر وزنهن قطف الزهر
وتذويبة الحجه على راس الطليب = يالين يسقيه المراره والكدر
وبالشعر ما ينحاه من ينحا الشعيب= اليا تقضقض من علوه وانحدر
متوسقه مزن (ن) يصب الما صبيب= سيله يحوّل في جلاميد الصخر
اليا وصلته قول يا سقم الحريب= يا عضيب يا ساس الحميا والظفر
أنت وسبيل ابن سند وبن شبيب= مثل السيوف اللي يشقن النحر
كل(ن) من النوماس حاز أكبر نصيب = وقف بميقاف الشجاعه وانتصر
مثل مواقف مروية حد الذريب= شيخان حرب اللي يقودون الجبر
سواقة العطفه على الجمع المريب= لباسة الماهود والجوخ الحمر
على المهار اللي يموحنّ السبيب = ما يورحون الموت من زود الدجر
أخوان نوره فوق عجلات الهذيب= على ضحاياهم يسمّن الديَر
صويبهم لو عاش مده ما يطيب= الموت ما له عن ملاقاته مفر
صوابهم يطغى على طب الطبيب= مثل السرطان الخبيث اليا انتشر
وابن نحيت اليا عوا ذيب(ن) لذيب= ما ينهزم جمع الحروب اليا حضر
مقدم بني سالم هل الأصل العريب= دفانة الركبه على خط الخطر
وأخوان حسنا ويش اخلي ويش اجيب= خصيمهم عينه يلاطفها السهر
اليا صاح أبو جلال بالصوت الصليب= الخيل من وجهه تفر اليا زجر
اليا طاش مثل الهايج اللي له لسيب= ترجف قلوب الزمل منه اليا هدر
ولو أذكر الباقين طاروقي يشيب= مير السموحه يا حميدين السيَر
والصدق يا اكرام اللحى ما هو بعيب= مثل النهار اللي يمد به النظر
الشاعر اللي له مواقف والأديب= سيف (ن) اليا ماحد صدّى واندثر
بعض الرجال بماقفه مشعوف طيب= عند اللزوم يطش عمره بالبحر
اليا دعيته للمواقف يستجيب= يجيك ويجيب الجواهر والدرر
وبعض الرجال يجيبه الحق المصيب= يقضي اللزوم ولا يوطيها الوعر
وبعض الرجال يهيّب اللي ما يهيب= بس يتلوى مثل قصاص الاثر
أثر ذهيب(ن) مختلط له مع ذهيب= في وادي(ن) مليان رتاج وشجر
وبعض الرجال يحيّر القلب اللبيب= متقلب(ن) يمشي على بطن وظهر
وسوالفه مثل السراب مع الجذيب= يملا لك القيعه مياه بلا مطر
ويملا لك الطاسه من الحايل حليب= ويحط بيديك الثريا والقمر
ورشاه ما يطلعك من بطن القليب= لو هو بجنبك قال بقريح وصقر
وقت الرخا قدام وجهك ما يغيب= ووقت القسا ما عنه رداد الخبر
وبعض الرجال مرافقه صعب وتعيب= مثل السلاح اللي يعامل في حذر
ندرى شعوره مثل ما ندرى الغريب= ودري القزاز اللي اليا طاح انكسر
والناس مختلفين وارضاهم صعيب= وهذا هو المعروف عن طبع البشر

صح السان شاعرنا العلم عبدالله بن زويبن ..
الحقيقه يستحقون المدح كل من مدح وابن زويبن معجزة الشعر
كما هو معروف عنه وكلامه درر .. نسأل الله له الصحه والعافيه ..
دمتم بود ..

[table1="width:95%;"]

و الله يستاهلون المدح جميع شعراء حرب الذين ذكرهم معجزة الشعر
عبد الله بن زويبن المعمري
فـ جميعهم أهل مواقف مشرفة دون القبيلة و الكرم غير مستغرب منهم
و عز الله ماظلم نفسه بما قاله عن الشاعر/ عضيب الحربي
رحم الله سبيل الحصني و آطال الله في عمر الشاعرين/ عضيب و محمد بن شبيب الحداري على الطاعة.

و بيض الله وجهك يا اخوي بدر الهبيري على النقل الجميل . و انا لي عتاب عليك
بسبب انقطاعك منذ فترة طويلة . نرجوا الاستمرار معنا يابدر .
و استأذنك بنقل القصيدة إلى ملتقى قصائد و حقائق واقعية لأنه هو القسم المناسب لها. و دمت بخير

احسنت اخوى بدر باختيارك هذه المعلقه الرائعه وصح لسان الشاعر الكبير عبدالله زويبن الحربى . وهذا ليس غريبا عليه كشاعر مبدع ولا يعرف قدر الكبار الا صاحب همة مثلهم وبيض الله وجهه. وجميع من وردت اسمائهم .يستاهلون وكفو سواء من رموز شيوخ القبيله او شعرائها المبدعين والمدافعين عن ارثها وتاريخها.قبيلة انجبت هولاء تستحق الفخر والتغنى بامجادها .بارك الله فيك

هذا علاج الكبود
الله واكبر يابن زويبن شاعر ماراااااح يتكرر
وكثير من يتمنونه يا في صفهم او مووته بالعربي.
الله يحفظة ويراعاه ومشالله عليه
حملت القصيدة
.بعث همم.وشكر وتكريم.واحتماء موقف.وتصريحات.
وفركة خشم
مافيه على طول للقلب مافيه استثناءات
واتوقع ان العاقل والشاعر الاديب اللي يعرف ماله وماعليه
يفهم ولا يخوض معركة خاسره

وهنا يبان الشاعر الاديب من غيره

الشاعر المعجزه عبد الله زويبن المعمري

لله درك لله درك لله درك وصح لسانك وبيض الله وجهك

يستاهل الشاعر المدمر عضيب بن هليل العلوي كل مايقال فيه ولو كتبنا دواوين ما اوفيناه هو وابن سند والحداري

يحق لنا ان نفتخر بشعرائنا وموافقهم المشرفه


لاهنت يابدر الهبيري

صح لسان الشاعر العملاق عبدالله بن زويبن فهو شاعر فعلا معجزه وكثيرا من الشعار العمالقه امثال عبدالله بن عون وسلطان الهاجري وغيرهم قد اشادوا بعبقرية هذا الشاعر وتمنوا ان تكون ولو بعض قصائده لهم 00ومن ضمن الاعجاز بشعر عبدالله انه كل ماطالت القصيده تتضح بها القوة من جميع النواحي عكس جميع الشعار كالمعروف كل ماتطول القصيده تضعف00
شكرا على نقل هذه العملاقه ويستاهلون العمالقه الذين تطرق لهم الشاعر في قصيدته
الله يبقي الحي ويغفر للميت00
تحيتي وتقديري 00بانتظار جديدك00

صح لسان الشاعر وبيض الله وجهك ....

سلمت يمينك ياشاعرنا الجزل بدر بن عيد الهبيري
لاهنت على هذا النقل وجزل الاختيار لهذه المعلقه الجديده
لهذا الشاعر العلم وهذا الرمز للشعر النبطي ومعجزته شاعرنا الكبير
عبدالله بن زويبن المعمري الحربي صح لسانه مليار على هذه الهديه الثمينه واطال الله بعمره على
الطاعه ويستاهلون جميع من ذكر هم ماقال بهم والله يرحم الميت منهم ويبقي الحي والكل منهم ترجح موازينه عند الجميع ولنا الفخر بكل واحد منهم ويستاهلون هذه الاشاده وهذا الاطراء وهم اهلاَ له (( وذكر الحيا والطيبين ايبين)) والله يرحم شاعرنا العلم
سبيل بن سند الحصني وطولة العمر للشاعرين العلمين الكبيرين محمدبن شبيب الحداري الحربي وعضيب بن هليل العلوي الحربي وجزيل شكري لك يابو عيد على هذه الهديه الثمينه طال عمرك وعمر من اهداها للجميع

الله الله يابدر بن عيد الهبيري ..


صح لسان القايل وسلمت يد ا لناقل ..


يازين مراد الطيب بين الرجال والله ان كل من ذكرهم الشاعر الكبير بن زويبن انهم اهل للثنا الحي منهم والميت . . .


وعضيب بن هليل العلوي وتصديه لشعراء عتيبله موقف شرف وفخر يستحق عليه التكريم ولا اقل من قصيده ماجده فاخره كهذه القصيده وكفو بالمادح والممدوح . . .


ومحمد بن شبيب الحداري وتصديه لابن معيتق العنزي بكل اقتدار موقف مشرف وفاخر يستحق عليه التكريم ولا اقل من قصيده فاخره كهذه وكفو بالمادح والممدوح . . .


وسبيل بن سند صاحب القصيده الشهيره اللتي ضربت شهرتها الافاق اللتي وجهها للسديري . . .



وغيرهم الكثير ممن تصدوا لكل من سولت له نفسه ان ينال حرب بشي . . .



ومااروع قول الشاعر العربي عندما اشاد بمواقف الفخر وانها هي المكارم الحقه فقال ..


هذه المكارم لاقعبان من لبن ............ شيبا بماء فعادت ابوالا .