سهرة شباب وعلوم ارجال

المكان :- بيت شعر في ارض الله الواسعه . نار وشاي وقهوة وعلوم رجال
الزمان :- ليلة خميس .
المناسبة :- سهرة شباب يومية .
الابطال :-ابو سعود + ابو سيف+ ابو فهد+ ابو سلطان +عبدالله + سلمان + محمد + المعزب
... خلونا نشوف السهره هذي وش يصير فيها من علوم رجال وسوالف ونسوي زوم عليها ونلقي عليها الضوء
----------احداث السهرة -----------------
اربعة شباب يلعبون ورقة .. سلمان ومحمد وابو سعود وابو فهد ..
ابو سيف وابو سلطان جالسين حول النار ويسولوفن مع بعض .... وجنبهم عبدالله جالس يشرب معسل ..
المعزب جالس جنب النار ومعاه الريموت يلعب بجواله ..
ابو سيف يقول لابو سلطان :- وش رايك نسافر اندونيسيا .. يقولون رهيبه مره ورخيصه والغيم يدخل عليك وانت جالس بشقتك .
هذا اللي مهبلكم يعني الغيم ... هذا حنا في بيت الشعر عندنا غيوم دخان ومعسل ودخان النار
يرد ابو سلطان :- يا شيخ فكك من هالاشكال يكفي بناتهم كلهن فطس وشغالات ... خلنا نروح لبنان ولا سوريا
عند هالشقر اللي ياخذن العقل ..هذا اذا فيكم عقل ..
ابو سيف :- على رايك لو نبي الغيم رحنا ابها ... خلاص لبنان لبنان دخيل الله شو هيدا وضحكه عاليه
هو انتم رح تصحون بالنهار علشان تدورون غيوم ..
المعزب يقلب بالمحطات .. يصرخ عليه عبدالله بس وقف عندك خل باسكال يا شيخ يا ربي
هذي الحريم ولا بلاش ... مهو حريمنا اللي تقل خيام سود
طيب ليش ما تخلي حرمتك تمشي بدون عبايه ومنديل اذا ماهن عاجباتك ..
لعب الورقة يحمى الوطيس فيه ...
محمد يصرخ على ابو سعود والله العظيم انك غشيت وقطعت هاص .. ابو سعود يرد كذاب والله ما قطعت
ولا غشيت .. محمد لاتحلف ي اشيخ انا شايفك .. طيب اذا كنت صادق .. طلٌق من ام سعود ..
ابو سعود علي الطلاق من ام سعود ما غشيت ولا قطعت هاص باللعبه ..ابو فهد خلاص يا شباب كملوا
بلا هواش ..
وشو بعده بعد ما تطلقت ام سعود لان ابو سعود فعلاً غش .. مسكينه ام سعود كل ليله تتطلق وهي ماتدري
المعزب يبي يلطف الجو شفتوا الحرمه اللي شاركت بمسابقة من سيربح المليون ؟ وطلقها زوجها !!! تدروين ليش ؟؟ لانها اتصلت على صديق
يدق التلفون ويرد المعزب الو ؟؟ يسمع صوت ناعم ويتشقق المعزب ممكن اكلم سلمان ؟
ابشري .. ويتشقق اكثر ..
سلمان لك التلفون كلم يا خذ سلمان السماعه وهو مكشر ويلعب ورقه ويرد ويجلس يتكلم بصوت خفيف وينادي المعزب
ويعطيه السماعه اخذ المعزب السماعه بعد ما قاله سلمان بشويش ... اسمع ولاتتكلم
الصوت الناعم تغني كانت انا مو ولهان انا انا الدنيا من الوله محتاجك ابيك
المعزب يغني شوي شوي معها وهو كاتم الصوت خايف البنت تسمعه
البنت تظن ان سلمان حبيبها معها وسلمان عطى المعزب السماعه حتى يتفرغ شويه للعب حتى تنتهي الاغنيه
وياخذ سلمان السماعه ويقول كلمتين ويقفل الخط ..
مسكينه البنت على بالها ان حبيبها يحبها ويبيها ومستانس لانها كلمته وغنتله اغنيه
عبدالله يا شباب تدرون من كلمني اليوم الجميع :- مين ؟ كلمتني نوال ال..... بنت ...... مدير .........
عرفتوه .... ابو فهد ايه عرفناه معقوله كيف عرفتها عبدالله رقمتها قبل اسبوع بالسوق
واليوم اتصلت علي .. يا عليها صوت وشكلها ناعمه ومؤدبه واول مره تكلم واحد
يا خي دام اوصافها كذا ودامها بنت ناس ليش فاضحها كذا مهو عيب عليك مسكينه هالبنت ماتدري من كلمت
الجميع يصرخون على المعزب صب شاي صب قهوة .. غير راس العسل .... حط جمر على الشيشه ...
غير محطة الجزيره وحط ال بي سي... عيب عليك معزب على الفاضي
المعزب يقف وهو غاضب ... ويصرخ فيهم ويتجه للخروج من بيت الشعر
علي الطلاق من ام سعود زوجة ابو سعود ماني جالس عندكم ..... طفوا نور بيت الشعر يوم تنقلعون
بروح اقابل المنتديات ابركلي منكم ....... ويدخل ويخليهم بسهرتهم في بيته
..................................
(خلونا نشوف ايش كانت علوم الرجال بالسهره هذي)
تقطيع اعراض ناس..
خيانات حب...
حلفان كذب ..
معسل ودخان ...
سفر من اجل البنات فقط ...
تطليق حريم بدون ذنب..
البحث فقط عن قنوات النص نص ..
واشياء اخرى كثيرة ............
لكن فعلاً سهرة شباب وعلـــوم حــريم
وكانت المرأه العنصر الاساسي بالسهره ...
حتى لعبة الورقة كان اسمها البنت السمرا
كثير من السهرات بهذا الشكل وربما هذه السهره ارحم من غيرها
........ الله يهدينا ويهديهم .............

تسلم يدك

مشكور

يعطيك العافية و باااااااااارك الله فيك

الأخ الفاضل :

(( بن فرهود الحربي ))

شكرا ً لك على هذا المقطع الرهيب من واقع حياة المجتمع الشبابي ( الأغلب ) وليس الكل

في زماننا الحاضر , ولكن كل ُُ يغني على ليلاه ...

في واقع الأمر أن المشهد تقريبا ً ... يحاكي صورة قريبة إمتزجت بين الواقع الحاصل والمدبلج

ومبالغات في محلها , وإن كنت أرى أن (( سهرة شباب ))

كفيلا ً بعنوان القصة الرائعة

دون (( علوم رجال )) ..


حفظك الله تعالى ورعاك

الأخ بن فرهود الحربي

مشكور على جهودك الرائعه

يعطيك العافيه

تقبل تحياتي

ودمت بخير

بارك الله فيكم على المرور

الأخ الفاضل بن فرهود الحربي

حقيقة عملت سيناريو فظيع
جعلت الكلمات كأنها صور

مشهد في أغلبه يحاكي واقعنا

شكرا ورعاك الله

بدر القايدي