يامن وفاك

29-02-12, 12:50 AM

بسم الله الرحمن الرحيم

يامن وفاك وطيبتك مالهن حد = يامنتهى شوقي وغاية مرادي
يادرة الخفرات مياسة القد = يامن تفرد حبها في فوادي
ياللي بوصف البدر وجهك تفرد = والبدر في وصفه لوجهك يشادي
وجه طغى حسنه وخدٍ مورد = آية جمالٍ والبها منه بادي
ونجلٍ كساهن ناعم الرمش الاسود = باوصافهن من عين طير الهدادي
عين اشقرٍ عوق الحباري ليا هد = حرٍ مقره شامخاتٍ بعادي
لاسلهمن واظفن على حمرة الخد = بسود الهدب يكسي حماره سوادي
وخشمٍ دقاقٍ مثل سيفٍ مجرد = ومبيسمٍ مثل الخويتم وكادي
اليا ابتسم وافتر بجمرٍ توقد = تحته لمع صف البرد له مقادي
حمر الشفايف فوق بيضٍ تناضد = جمرٍ تدثره البرد في ودادي
والعنق عنق اللي من الحس يشرد = ريمٍ مجفلته قنوص البوادي
وشعرٍ كسى الامتان كنه اليا كد = سبيب صفراً شوشت للطرادي
ونهدٍ على ملبوس صدرك تمرد = حليا الزبيدي في فياض الحمادي
وخصرٍ مدى الشبرين فوقه توارد = حوله مداهن لا تلاقن زادي
والردف طعسٍ عقب سيل ملبد = طعسٍ زمى من فوق سهف البيادي
عن زين وصفك يقصر الحصر والعد = ماظن لك من كل جيلك ملادي
حيثك بزاه الوصف وصفك توحد = وتستاهلي قمة جمال البلادي
سبحان من لك باجمل الوصف زود = واوفى مزاياك الكريم الجوادي
كساك من راسك لماطى القدم حد = في غض جسم ريحته ريح كادي
وملح ودلال وخف دمٍ ممجد = وخلق حسين وعز نفس ومبادي
وذوقٍ رفيع وقصر رجلٍ تقصّد = وعقلٍ كبير وحسن رايٍ سدادي
عنبر شرف عريبة الخال والجد = مهرة ومن منتج عراب الجيادي
هني منهو في رسنك متجود = بكفي ودونك كل طلاب حادي
حبيبتي لك ساقني سايق الود = وانتي ملكتيني بصدق الودادي
وحبل الهوى يالوافيه معك ممتد = ماينقطع بافراق والا ابتعادي
وانا بحبك لو قسى وقتي أسعد = لو منه حاربني لذيذ الرقادي
حيثك وفيه ماتجازين بالصد = وماطالني منك الجفا والعنادي

الشاعر/ محمد عبدالرحمن ابونيان - الفيضة