ديوان قصائد الشاعر(بخيتان البشري)

يالله بأسمك أبتدي كتب الحروف = ياحي يامعبود رب العالمين
من بعدها بكتب من أبيات شعري= بكتب وصية والمحبة عناوين
يانجد علمي وإسمعي كل علمي = بوصيك يانجد العذية وتكفين
وصيتي خلٍ سكن في ربوعك = اللي سكن في داخل القلب والعين
يانجد خلي حر من نسل الأحرار= من عزوة يانجد بالحيل عالين
إسمه نقشته نقش في داخل القلب= غلاه فاق اللي من الناس غالين
اللي عطاني ودّ وأعطيته الوّد = على نقا ماهو على مدّخل الشين
أرخص لي الغالي وهو حيل غالي= الله عطاه من الغلا فالملايين
ودي و ودي والزمن دوم ضدي = ياسعد من حوله وعنده مقيمين
بنيت له وسط الحشا بيت وقصور=وتفداه روحي لو طلب كامل الزين
ماهمنا فاللي يقولونه الناس = عاشق ومعشوقه وبالعشق راضين
شوفه منُى روحي ولقياه شفي = وملامس ايدينه أمل لو بعد حين
بُعده شقى لكن ماهو بيدي = الله جعلنا عن بعضنا بعيدين
جعل السعادة دايم الدوم فاله= ويكفيه ربي من عيون الحسودين
ويحفظه في كل روحه وجيه = ويجعل حياته من زهور البساتين
اللي على بُعده طوى خافقي طي = مادمت عايش بنتظر شوفه اسنين
يانجد تمت وآخر السطر تذكير= عزي وصيتي وافرشي له رياحين
هذي نهايتها بأزكى الصلاتي =على الرسول الهاشمي ناصر الدين

رش المطر يسقي ضما البيد والبير =ورش الوصل يسقي من الود عطشان
مدري وش الحاصل ومدري وش يصير=لاغبت كن الناس لفت با الاكفان
وإذا حضرت الارض تزهر نواوير=الصبر مفعوله كما شي ما كان
من بعدكم عقلي فقد كل تدبير=وفي قربكم روحي لها بالغلا شان
يالله رجيتك ياحسين التدابير =إنك تعجل لي مشاهد بالأعيان
انا عليك من اقرب الناس با اغير=اخشى عليك من الهوا كيف الانسان
تدري ليّا شفتك تصفق جماهير =فالقلب والشارع ليا الصّبح سهران
جريت صوتي يوم فيك التفاكير= وهيضني القمري على روس الاغصان
يعزف لحونه والهبايب له تذير=يردد اللحانه سعيدٍ وطربان
إحساسي ارهقته بكثر التبارير = اخلق لك الأعذار بأشكال والوان
ترى الهوى قبلي شكوه المناعير=قبلي شكاه ابن سبيل وركان
لك المعزه والمحبة وتقدير=ولك الوفا من قلب با الود هيمان
عجزت لا اصيغ المعاني بتحرير = يعكس لما فالروح ياروح ولهان
أنا انتظرك ولا انتظر للمعاذير =ابنتظر جيتك لو طول الأزمان
دام الزمن دوار وأيامنا تسير = يبقى الأمل في داخل القلب برهان
كتبت ببيوتٍ من الشعر تعبير=صورت فيها بُعدكم كيف لاكان
مهما الزمان يجور ويصير تغيير=عهدً قطعته بيننا خله يصان
تمت وأنا في خاطري شيِ صغير=ارجوك لاتنسى حبيبك بخيتان

	المشاركة الأصلية كتبت بواسطة بخيتان البشري

	قالت سلام وقلت يامرحبابك = يامرحبا مليون ما أظن يكفون قالت تهلي تنتظر ياهلابك= والا لأجل واجب علينا تردون قلت العفو نأسف لحضرة جنابك = ماهو بنا اللي رحبو قلب وعيون لكن وش هو في طريقي حدابك = وتلومني وأنا بشوفتك مفتون قالت عرب حولي ولا اقصد عذابك= وأخاف من بعض العوازل يقولون قلت إنتي اللي ناثرة لي زهابك = هات الذي في خاطرك قبل يدرون قالت غرامك في منامي سرابك = وقلبي وقلبك في هوانا يغرقون إحساس صادق أحتوى شعور جابك = وجيتك على نشوة أمل فيك مرهون ارجوك لا اطرد في حياتي سرابك =حدد مصير اللي صدق بك مايخون قلت إسمعي من بعد بيّن كتابك = والشوق والأشواق يمي يزفون القلب جاوب طرف شوفه سطابك = وأنا الضحية لجلكم بي يضحون أنا أشهد إن اللي غدابي غدابك = وقلوبنا فالحب صاروا يهيمون حظك على حظي بصدفة رمابك =واليوم في درب الأماني يمنّون كانك صدوق ومثل مابي طرابك = حلفت لأصدق والرجاجيل يوفون ليّا هل وبل الود وارعد سحابك = وأسقى بساتين الحشا قبل يضمون لأقطف ورود العشق وادق بابك =وأهديك منها يالغلا ما يكفون

والسلام عليكم

آسف من أول يوم جيتي لذا الدار= من داخل أعماقي نطقها لساني
آسف على ماجاك مني و ماصار= و الله غيرك فالبشر ما عناني
ألا الذي له فالمنيفات مقرار=ابوي واللي باقيٍ من خواني
اشوف فعيونك زمن كله امرار = ياليت شوفك زار قلبي ثواني
يمديك شفت إن الغلا ماله أسعار= دام الغلا في نار حبك رماني
ودي و ودي ! بس ذا حكم الأقدار= شلت الحمول ولا رحمني زماني
ترى الحياة كفاح وجهاد واسرار=وياكم من دنياه غيرك يعاني
ولوشفت ماصابه من الوقت تنهار=لوجاك ما جاء له تموت بثواني
لاتقلد الباقين وتعيش محتار =عن هرجهم احذر وسد الآذاني
ترى الزمن ياناعس الطرف دوار=بالأمس رحت فلان واليوم جاني
خلك معي في حكم الأقدار صبار= و إن رحت عني جات بين المحاني

ذكرتهم لو إنهم مذكروني=قلبي حداه لذكرهم صدق وده
ودو خبر عني وبه خبروني =اللي على قلبي تجنى ببُعده
قولو يقول إن الليالي عطوني =من مُرها الفين والفين لده
وإن الهجوس بحورها حيروني = الفكر ترخي به ومرة تشده
وآحسرتي وينه ولآ ياغبوني=اليوم شوفي يشتكي فيه وجده
ياصاحبي بالله لاتسهجوني=ترى غلاكم واصلٍ فوق حده
تكفون يكفيني ولاترهقوني = صاحبك دمعه لك مواريه خده
في حالتي ما اظنكم تتركوني = واللي بنبنا يالغلا لا تهده
ياليتكم لحظة بها تسعدوني =لو هي ثواني شوف عيني تسده
فاهم لكم ياليتكم تفهموني =بحر الغلا مابين جزره ومده
انتم دواي وعلتي عالجوني =ماعاد لي فالقلب كملة وارده
مير الحقوه بوصلكم ولحقوني=قبل تروح الروح من غير رده
وقدام اموت وباللحد يدفنوني= الحق غلا من هو لكم باح سده

تدرين وش قصة حياتي من سنين = مشكله من غث الأيام تشكيل
تراكمت ولشرحها كيف تقوين = عنوانها يكفيك دون التفاصيل
بيتي حزن وثيابي الهم والعين=شابت من اللي شافته من تهاويل
دربي ألم مدري أنا متجه وين =احاول أرقى مير حظي بي يميل
سماي تمطر بالآسى صار لي حين=وتسيل بجروح الزمن داخلي سيل
أروي ظما كبدي وحاليه مُرين = وزادي هموم الوقت بالزايد تكيل
أنورّ الظلمة شموع وقناديل = "ظلمة" 00 تولعها زنود البهاذيل
أظن ماقلته كفاية وكافين = حروف من دمي لحنها مواويل
تدرين هذا من حياتي عناوين = اخاف لو كملت ينهد بك حيل
عنوانها عندك ولو زدت تبكين = اغليك ماودي دموعك هماليل
يكفي ومايخفى مع الوقت بيبين = تكشف لك الأيام من دون تكميل

ماضاق خاطر من نودّه ونغليه = لو البحر من ضيقته ضاق به ماه
مودّنا غالي و ودّه نخليه = غالي ولو كل العمر مالقيناه
والي تولى للمشاعر موليه = قلب المودّ اللي وداده تولاه
طيبّ خواطرنا بكامل تحليه = بصدق الشعور اللي عليها صدقناه
اللي بصوته همنا دوم يجّليه = وبصوتنا قلبه من الهم نجلاه
كُلاٍ وهمه به خليله مكلّيه = ومابيننا من يترك اللي تكلاّه
واقع ولانحسب لما زَودّ يتليه = ولاهمنّا لو أكثر نشوف يتلاه
ذا ودّ يبلى الوقت قدام يبليه = سبحان من يعلم بما أخفيت وأخفاه
صدق المشاعر والأحاسيس تِعليه = لو الأماني كاسها ماشربناه
إلا مرار ولا عرفنا سبب ليه = ونصبر ولو نبقى العمر ماعرفناه
يسلى الزمن معنا وحنا نسليه = حتى ولو عشنا معه ماسليناه
شوق المودّة جمرها نار نصليه = اللي بها من جمرها برد نصلاه
كلٍ وقسمه بيننا اللي مواليه = كل الموالي من موالي قسمناه

فايز ال محيسن=
سلام ياغايب عن العيـن مـده= نشتاقله في غيبتـه مانسيناه
الصاحب اللي حسب اخونا نعده=مارد للهاتف بعـد ماطلبناه
بخيتان البشري=
يامرحبا دوم الوفا لك نمده = ياللي ولو غبنا ترى مافقدناه
فقلوبنا واخوك ظرفه يحده =خارج وطن يوم الخليوي تركناه
فايز ال محيسن=
عسا البقا والعذر للباب سـده=ياللي على مد الجزيله خبرنـاه
بنشد عن اللي ينقض القول رده=و ارسل لكم مكتوب حنا قريناه
بخيتان البشري=
مد الجزل واجب علينا نرده = للي عرفنا مثل ماحنا عرفناه
ماهمنا لو هو لنا باح سده = قريتو المضمون فيما كتبناه
فايز ال محيسن=
فيك الوفا ياللي ورث طيب جده=ردك وصله مثل ماحنّا بغينـاه
واللي تعدى يم الاجـواد حـده=أما بـرك للحـق والآ كتفنـاه
بخيتان البشري=
درب الوفا ما استصعب الذيب جِده = الذيب جِده أصعب الصعب مثناه
لاجاه علم الأجودي لين حده = ليا حدا حده على ماحديناه

لاعاد تلحقها علوم ومشاريه = ماتحتمل شرهة مشره تشره
بايع لمن يشريه مافاد شاريه=ينباع رخُص ومكسبه رُخص تشرِه
لا انا غلطت ولا الزمن 0 صنع باريه= مايعلم المخلوق خيره وشره
في علم غيبه مانكتب له وقاريه = ويعلم كتابِ ماعِلم كيف نشره
من عزنا حنا معزة نداريه = ويقى بنا من طيب العلم نشره
الآدمي لاصار تطري طواريه =يبغى الثمان تزيد وتصير عشره
الكذب عاري ماكسى عيب عاريه= لابارك الله في خشيرِ يخشره
ترى المطر فرحة اليا حل طاريه=لو كان يسمع هل فديار قشره
بك انطوى ليلِ خذتني مساريه = فجر القناعة طلعته جاب حشره

سنيـن فيهـا ماعرفنـا بعضنـا=مرت ولاندري وش العمر جايـب
وشهور فيها المعرفـة جمعتنـا=فترة بسيطة لين صرنـا حبايـب
دنيـا عجيبـة شفتهـا فرقتنـا=يطيب لي والا على غيـر طايـب
واليوم مادامك عرفـت وعرفنـا=تبقى المعزة في زمان العجايـب
لو كل مانسعـى نحقـق هدفنـا=ماكانت الآمـال تغـدي ذهايـب
ياكم غالـي مثلكـم لـه فقدنـا=وله عندنا وزعة تحجب الحجـايب
وإن سلتني من يقتفي دوم اثرنـا=وقتٍ ردي مع حظ بالحيل خايـب
نجبر بخاطر بالوفا من جبرنـا=مايوم مده بالجزل كـان غايـب
بذكرك انا بالخير وانت افتكرنا = وحفظ لنا المعروف جاتك طلايب
تبقى عزيز ولـك مـودّة حفظنـا=مهما السبب تغلب عليه السبايب
بعد اختلاف الجـو لاشـك تهنـا=وما تاه رأي اللي يفك النشايب
مابين مـوج وعاصفـة فاجأتنـا=وسحاب يمطر في دروب الصعايب
كل الذي قلناه مـن بعـد شفنـا=بين العقل والقلب قرار صايـب